Elder Hans T. Boom
Hitu ’Ahuru Hui mana fa’atere rahi
I te va’ura’a o tōna matahiti, ’ua fa’anu’u te ’utuāfare o Elder Hans T. Boom mai Amsterdam i te ’oire nō Breda, i te mau pae apato’a nō Hōrane. E Hōrane tōna metua tāne tei pa’ari i Inidonesia ’e tei fa’afāriuhia i te ’Ēkālesia, ’ua mana’o ’oia ē, tītauhia i tōna ’utuāfare ’ia reva i rāpae i te ’oire rahi ’e ’ia ho’i i te fenua ’āi’a o tōna mau tupuna.
Te mau taime ’a pārahi ai Elder Boom ’e tōna ’utuāfare i roto i terā ’āma’a iti, ’ua riro ïa ’ei vāhi ha’api’ipi’ira’a nō te tāvinira’a i roto i te ’Ēkālesia—e tāvinira’a tāna i pūpū i tōna orara’a tā’āto’a ’e o tāna e tāmau noa i te hōro’a i roto i tōna pi’ira’a ’āpī ’ei Hitu ’Ahuru Huimana fa’atere rahi.
« Te mau mea ato’a ’ua riro mai au ’e te mau mea ato’a tā’u e fāna’o, maoti ïa te Atua ’e te mau rāve’a tāna i hōro’a mai nō te ha’api’i ’e nō te tupu i te rahi », tē nā reira ra ’oia.
’Ua fānauhia ’oia i te 13 nō Tiurai 1963, i Amsterdam nā Hans ’e Ankie Boom, ’o Hans Theodorus Boom te piti o te tamari’i pa’ari a’e i roto i nā tamari’i e maha a Boom mā. ’Ua ha’api’i tōna metua i te ’evanelia i tō rātou fare ma te fa’aitoito i tā rāua mau tamari’i ’ia rave itoito i te ’ohipa.
I te 18ra’a o tōna matahiti, ’ua tāvini Elder Boom i roto i te misiōni nō Peretāne i London East. Ma’a ’āva’e i muri mai i te otira’a tāna misiōni, ’ua fārerei ’oia i tāna vahine ’o Ariena Johanna « Marjan » Broekzitter, i te hō’ē ’āmuira’a feiā ’āpī pa’ari a te ’Ēkālesia. ’Ua fa’aipoipohia rāua i te 27 nō Tiunu 1984, i Rhoon (Hōrane) ’e ’ua tā’atihia rāua toru mahana i muri mai i roto i te hiero nō Lonedona (Peretāne). E toru tā rāua tamāroa.
’Ua ’ohipa Elder Boom ’ei pāpa’i parau nō te upo’o fa’atere nō Markenhage College ’e ’ei ta’ata tihepu nō Franchise Development Benelux. I te taime o tōna pi’ira’a ’ei huimana fa’atere rahi, tē ’ohipa ra ’oia ’ei fa’atere ’ohipa ho’o nō MacLean Agencies.
’Ua tāvini Elder Boom ’ei Hitu Ahuru Area, ’ei tauturu i roto i te hō’ē peresidenira’a titi, ’ei peresideni Feiā ’Āpī Tamaroa nō te titi, ’ei peresideni ’āma’a ’e ’ei tauturu i roto i te hō’ē peresidenira’a ’āma’a. I te taime o tōna pi’ira’a, tē tāvini ra ’oia ’ei ’orometua nō te institut ’e ’ei rave ’ohipa nō te mau ’ōro’a i te hiero nō La Hague (Hōrane).