Fa’aineinehia nō te noa’a mai te mau mea ato’a i hina’arohia ra
E tae mai taua mau ha’amaita’ira’a fa’atuea ra ’a tūtava ai tātou i te rave fa’aoti i tā tātou hōpoi’a ta’ata hō’ē e ha’api’i ’e e here i te ’evanelia a Iesu Mesia i fa’aho’ihia mai.
Tē rahi noa atu ra te mau fa’anahora’a ’e te mau ’ohipa a Te ’Ēkālesia a Iesu Mesia i te Feiā Mo’a i te mau Mahana Hope’a Nei i fa’atumuhia i ni’a i te ’utuāfare ’e turuhia e te ’Ēkālesia, mai tei ’itehia i roto i te mau fa’atanora’a i fa’aarahia i te mau ’āmuira’a rahi i ma’iri a’enei. ’Ua parau te peresideni Russell M. Nelson ia tātou : « E rave rahi atu ā i mua ia tātou… E ’amu i tā ’outou huero vītāmī. E taurumi ri’i. E ’ohipa ’ana’anatae mau e tīa’i mai ra ».1
Tē pure nei au ’e tē ani nei au i te tauturu a te Vārua Maita’i ’a feruri ’āmui ai tātou i te mau fa’ahope’ara’a ’ōhie e rave rahi o teie mau fa’atanora’a i roto i te ’Ēkālesia a te Fatu i fa’aho’ihia mai.
Te ha’api’ira’a ’evanelia fa’atumuhia i ni’a i te ’utuāfare, turuhia e te ’Ēkālekia
’Aita i maoro a’enei, ’ua ’āpiti mai Elder Craig C. Christensen iā’u i roto i te hō’ē ’āmuira’a feiā fa’atere autahu’ara’a, ’e ’ua fa’a’ohipa ’oia e piti uira’a ’ōhie nō te tūra’i i te parau tumu nō te fa’atumura’a i ni’a i te ’utuāfare, turuhia e te ’Ēkālesia. ’Ua nā ’ō ’oia ē, ’eiaha tātou e ho’i i te fare i muri mai i te purera’a i te sābati e ui atu ai : « E aha tā ’outou i ’apo mai nō ni’a i te Fa’aora ’e tāna ’evanelia i te purera’a i teie mahana ? », e ui maoti rā tātou i te fare purera’a : « E aha tā ’outou i ’apo mai nō ni’a i te Fa’aora ’e tāna ’evanelia i teie hepetoma i tō ’outou fare ? » Te fa’atura-ti’a-ra’a i te mahana sābati, te fa’anahora’a ha’api’ira’a ’āpī ’e te fa’atanora’a i te mau hora purera’a, tē tauturu pā’āto’a nei te reira ia tātou ’ia ha’api’i i te ’evanelia i te fare ’e i te fare purera’a.
E hōpoi’a tā te melo tāta’itahi o Te ’Ēkālesia a Iesu Mesia i te Feiā Mo’a i te mau Mahana Hope’a Nei ’ia ha’api’i ’e ’ia ora i te mau ha’api’ira’a a te Fatu, ’e ’ia fāri’i nā roto i te mana ti’a i te mau ’ōro’a nō te fa’aorara’a ’e te fa’ateiteira’a. ’Eiaha tātou e tīa’i nā te fa’anahora’a ’Ēkālesia e ha’api’i ’aore rā e parau ia tātou i te mau mea ato’a tītauhia ia tātou ’ia ’ite ’e ’ia rave nō te riro mai ’ei pipi ha’apa’o ’e nō te fa’a’oroma’i itoito ē tae noa atu i te hope’a.2 ’Aita, tei ia tātou iho nei rā te hōpoi’a ’ia ha’api’i i tei tītauhia ’ia ha’api’i, ’ia ora mai tā tātou i ’ite e mea tītauhia, ’e ’ia riro i te ta’ata tā te Fatu e hina’aro ’ia riro tātou. ’E tei te fare te vāhi mau nō te ’apo i te ha’api’ira’a, nō te ora ’e nō te riro mai i terā ta’ata.
I tōna tamari’ira’a, ’ua ha’api’i Iosepha Semita nō ni’a i te Atua i roto i tōna ’utuāfare. Nā tāna mau tauto’ora’a nō te ’ite mai i te hina’aro o te Atua i fa’a’imi ia Iosepha i te parau mau i roto i te mau ha’apa’ora’a keresetiano, i fa’aferuri māite iāna nō ni’a i te mau pāpa’ira’a mo’a ’e i fa’apure iāna i te Atua ma te ateate. I te ho’ira’a te taure’are’a ra Iosepha Semita i tōna fare mai te rā’au mo’a ra, i muri noa iho i te fāra’a te Metua ’e te Tamaiti iāna, ’ua paraparau mātāmua ’oia i tōna metua vahine. ’A ti’a noa ai ’oia « i te pae auahi, ’ua ui maira [tōna] metua vahine ē e aha te pe’ape’a. Pāhono ihora [Iosepha] ē : ‘’Eiaha e pe’ape’a, e mea maita’i te mau mea ato’a—e mea maita’i au.’ I reira [’oia] i parau atu ai i [tōna] metua vahine ē : ‘’Ua ’itehia mai iā’u iho [te hō’ē ha’api’ira’a]’ »3 Tē hōro’a nei te ’ohipa i tupu nō Iosepha i te hōho’a rahi nō te ’apora’a ha’api’ira’a tā tātou e pe’e. ’O tātou ato’a nei, tītauhia ’ia ’ite tātou nō tātou iho.
Te fā rahi o te fa’anahora’a a te Metua i te Ao ra, ’o te riro-atu-ā-ra’a ïa tāna mau tamari’i mai iāna ra te huru. ’E nō reira, tē hōro’a mai nei ’oia i te mau rāve’a tumu nō te tupu i te rahi ’e nō te haere i mua. Tē rahi noa atu ra te faufa’a o ta tātou pūpūra’a nō te ’apora’a ’e te orara’a i te parau mau, i roto i te hō’ē ao « ’ārepurepu »4 ’e tē rahi noa atu ra te ta’a ’ore ’e te ’ino. E’ita e ti’a ia tātou ’ia ti’aturi ē, e haere noa mai tātou i te mau purera’a ’e e haere tātou i te mau fa’anahora’a ’e nā te reira e hōro’a ia tātou i te ’ite pae vārua ’e te pāruru nō te « pāto’i atu i te ’enemi i te mahana ’ino ra ».5
« E hōpoi’a mo’a nā te mau metua i te aupurura’a i tā rātou mau tamari’i i roto i te here ’e te parau ti’a ».6 E tauturu te mau feiā fa’atere o te ’Ēkālesia ’e te mau ’orometua ’e te mau ’ohipa fa’auruhia i te mau tauto’ora’a a te ta’ata hō’ē ’e a te ’utuāfare ’ia tupu rahi i te pae vārua. ’E noa atu ē, tītauhia te tauturu ’a haere ai tātou pā’āto’a i mua nā ni’a i te ’ē’a nō te fafaura’a, te hōpoi’a rahi hope nō te fa’atupura’a i te pūai pae vārua ’e te tāpe’a maoro, tei ni’a ïa ia tātou tāta’itahi.
’A ha’amana’o nāhea Nephi, te tamaiti a te peropheta Lehi, i hina’aro ai e hi’o ’e e ’ite nōna iho, nā roto i te mana o te Vārua Maita’i, i te mau mea tā tōna metua tāne i ’apo mai i roto i te ’ōrama nō te rā’au o te ora. E mea pāpū roa, ’ua hina’aro Nephi ’e ’ua ha’amaita’ihia ’oia i tōna taure’are’ara’a nā roto i te hi’ora’a ’e te mau ha’api’ira’a a « nā metua maitata’i ».7 ’Āre’a rā, mai ia Iosepha Semita te huru, ’ua hia’ai ’oia i te ’apo mai ’e i te ’ite nōna iho.
Mai te peu te mau mea ato’a tā ’outou ’e tā’u i ’ite nō ni’a ia Iesu Mesia ’e tāna ’evanelia i fa’aho’ihia mai, ’o te mea tā te tahi atu ta’ata i ha’api’i ’aore rā i parau ia tātou, ’ua patuhia ïa te niu o tō tātou ’itera’a pāpū nōna ’e nō tāna ’ohipa hanahana i te mau mahana hope’a nei, i ni’a i te one.8 E’ita e ti’a ia tātou ’ia tūru’i noa ’aore rā ’ia tāparu noa i te māramarama ’e te ’ite ’evanelia o te tahi atu ta’ata—noa atu ē e ta’ata tā tātou i here ’e i ti’aturi.
’Ua ha’api’i pāpū maita’i te peropheta Iosepha Semita ē, tītauhia i te mau feiā mo’a tāta’itahi ’ia māramarama ’ōna iho i « te mau ’ōpuara’a [’e te fā] a te Atua nā roto i tō tātou haerera’a mai i te ao nei ».9
« Tai’o noa atu ’e māramara noa atu tātou i te mau mea ato’a tei pāpa’ihia mai te tau mai ā o Adamu, nō ni’a i te aura’a i rotopū i te ta’ata ’e te Atua ’e te mau melahi i te tahi vaira’a a muri atu, e mea iti roa ïa te mea tā tātou i ’ite nō ni’a i te reira. E ’ore roa te tai’ora’a i te ’ā’amu o vetahi ’ē, ’aore rā te heheura’a tei hōro’ahia ia rātou, e hōro’a ia tātou i te hō’ē ’itera’a hōhonu nō tō tātou aura’a mau ’e te Atua. E roa’a te ’ite nō teie mau mea nā roto ana’e i te rāterera’a nā roto i te mau ’ōro’a a te Atua tei fa’ata’ahia nō taua tumu ra. »10
’O te fa’atupura’a i teie fā pae vārua rahi nō te mau ta’ata ’e nō te mau ’utuāfare te hō’ē o te mau tumu niu tē rahi noa atu ra te mau fa’anahora’a ’e te mau ’ohipa a Te ’Ēkālesia a Iesu Mesia i te Feiā Mo’a i te mau Mahana Hope’a Nei i te fa’atumuhia i ni’a i te ’utuāfare ’e turuhia e te ’Ēkālesia, i teie ho’i pu’e tau ta’a ’ē nō te tau tura’a nō te ’īra’a o te mau tau.
Te mau hope’a nō te ha’api’ira’a fa’atumuhia i ni’a i te ’utuāfare ’e turuhia e te ’Ēkālekia
E parau poto ri’i au i te tahi mau hope’a mātāmua nō te ha’api’ira’a ’evanelia e rahi noa atu i te fa’atumuhia i ni’a i te ’utuāfare ’e turuhia e te ’Ēkālesia.
Te pū ha’api’ipi’ira’a misiōnare rahi hope, ’o tō tātou ïa mau fare ; te mau pū ha’api’ipi’ira’a misiōnare piti, tei Provo ïa, i Manille, i Mexico City, ’e tē vai atu ra. Tā tātou piha Ha’api’ira’a Sābati manuia roa a’e, e mea maita’i ïa ’o tā tātou tuatāpapara’a ta’ata hō’ē ’e tuatāpapara’a ’utuāfare i tō tātou nohora’a ; te mau piha Ha’api’ira’a Sābati pa’epa’e rahi, ’o terā ïa e fa’atupuhia ra i te mau fare purera’a, e ti’ara’a piti rā tō rātou.
Tei tō tātou fare i teienei te mau pū ’ā’amu ’utuāfare. Tē vai ato’a nei te tahi tauturu nō tā tātou ’ohipa ’ā’amu ’utuāfare i tō tātou mau fare purera’a.
Te mau piha fa’aineinera’a nō te hiero, e tupu ïa i tō tātou mau fare ; e nehenehe ato’a e fa’aterehia te mau piha fa’aineinera’a faufa’a rahi nō te hiero i te mau fare purera’a, e ti’ara’a piti rā tō rātou.
E mea faufa’a i teie mau mahana hope’a nei ’ia fa’ariro i tō tātou mau fare ’ei vāhi mo’a i reira e noa’a ai ia tātou ’ia « ti’a i te mau vāhi mo’a ra ».11 Rahi noa atu te faufa’a o te ha’api’ira’a fa’atumuhia i ni’a i te ’utuāfare ’e turuhia e te ’Ēkālesia nō tō tātou pūai pae vārua ’e tō tātou pārurura’a i teienei, e rahi atu ā te reira ananahi.
Te ha’api’ira’a ’e te fa’aineinera’a hiero fa’atumuhia i ni’a i te ’utuāfare ’e turuhia e te ’Ēkālekia
E feruri na i te tanora’a te parau tumu « fa’atumuhia i ni’a i te ’utuāfare ’e turuhia e te ’Ēkālesia » i ni’a i tā tātou fa’aineinera’a ta’ata hō’ē ’e te vai-ti’amā-ra’a nō te fāri’i i te mau ’ōro’a mo’a ’e te mau fafaura’a i te fare o te Fatu.
’Oia mau, e mea manuia a’e te fa’aineinera’a hiero i te fare. E rave rahi rā melo o te ’Ēkālesia tei pāpū ’ore e aha tē nehenehe e parau ’e e aha e’ita e nehenehe e parau nō ni’a i te hiero i rāpae i te hiero.
Tē fa’ata’a nei te peresideni Ezra Taft Benson nō te aha tē vai ra teie pāpū-’ore-ra’a :
« E vāhi mo’a te hiero, ’e e mea mo’a te mau ’ōro’a i roto i te hiero. Nō tōna huru mo’a, e ’ōti’ati’a ri’i tātou i te tahi taime ’ia parau i te hō’ē mea nō ni’a i te hiero i tā tātou mau tamari’i ’e te mau mo’otua.
« Nō reira, e rave rahi ta’ata ’o tei ’ore e fa’atupu i te hina’aro mau ’ia haere i te hiero, ’e ’aore rā, ’ia haere ana’e rātou i reira, e haere rātou ma te ’ite iti noa nō te fa’aineinera’a ia rātou nō te mau tītaura’a ’e te mau fafaura’a tā rātou e rave.
« Tē ti’aturi nei au ē, mai te mea ē, tē vai ra te hāro’aro’a ’e ’aore rā, te ’ite au, e riro te reira ’ei tauturura’a rahi nō te fa’aineine i tō tātou mau feiā ’āpī nō te hiero… [’e] nō te fa’atupu i roto ia rātou i te hina’aro ’ia ’imi i tō rātou mau ha’amaita’ira’a autahu’ara’a mai ia Aberahama i ’imi i tōna ».12
E piti rēni arata’i niu e nehenehe e tauturu ia tātou ’ia tāpae i te māramaramara’a ti’a tūra’ihia e te peresideni Benson.
Rēni arata’i #1. Nō tō tātou here i te Fatu, e paraparau noa tātou nō ni’a i tōna fare mo’a ma te mana’o tura. ’Eiaha tātou e fa’a’ite ’aore rā e fa’ata’a i te mau tāpa’o ta’a ’ē e ’āpiti nei i te mau fafaura’a tā tātou e fāri’i i roto i te mau ’ōro’a mo’a o te hiero. ’Eiaha ato’a tātou e paraparau i te mau mea mo’a ’o tā tātou i parau fafau atu i roto i te hiero ’eiaha e fa’a’ite atu.
Rēni arata’i #2. ’O te hiero te fare o te Fatu. E fa’atoro te mau mea ato’a i roto i te hiero i ni’a i tō tātou Fa’aora, ia Iesu Mesia. E nehenehe tā tātou e paraparau nō ni’a i te mau fā tumu ’e te ha’api’ira’a tumu ’e te mau parau tumu o te mau ’ōro’a nō te hiero ’e te mau fafaura’a.
’Ua hōro’a te peresideni Howard W. Hunter i te parau a’o ē : « Fa’a’ite ana’e i tā tātou mau tamari’i i te mau fāri’ira’a pae vārua e roa’a mai i roto i te hiero. ’E ha’api’i ana’e ia rātou ma te pāpū rahi a’e ’e te taiā ’ore i te mau mea ’o tā tātou e nehenehe e parau tano atu nō ni’a i te mau fā nō te fare o te Fatu ».13
I terā u’i ’e terā u’i, mai te peropheta Iosepha Semita ē tae mai i te peresideni Russell M. Nelson, ’ua ha’api’i-rahi-hia te fā ’e te ha’api’ira’a tumu nō ni’a i te mau ’ōro’a o te hiero ’e te mau fafaura’a e te feiā fa’atere o te ’Ēkālesia.14 Tē vai nei e rave rahi mātēria nene’i, fa’aro’o, video ’e tē vai atu ra, nō te tauturu ia tātou ’ia ha’api’i nō ni’a i te mau ’ōro’a fa’aineinera’a, te mau ’ōro’a hiero, te mau fa’aipoipora’a ’e te mau ’ōro’a tā’atira’a.15 Tē vai ato’a nei te parau nō ni’a i te pe’era’a i te Fa’aora nā roto i te fāri’ira’a ’e te fa’aturara’a i te mau fafaura’a ’ia pe’e i te ture nō te ha’apa’o, te ture nō te tusia, te ture nō te ’evanelia, te ture nō te vi’ivi’i ’ore ’e te ture nō te ha’amo’ara’a.16 ’Ia ha’amātau te mau melo ato’a o te ’Ēkālesia i te mau mātēria maita’i roa e vai ra i ni’a ia temples.ChurchofJesusChrist.org.
’Ua tūra’i te peresideni Russell M. Nelson i te parau nō te ’aifāitora’a faufa’a tumu i roto i te nātura mo’a o te mau ’ōro’a o te hiero ’e te mau parau faufa’a nō ni’a i te mau hiero tei pūharahia e te ’Ēkālesia, e mea ti’a ’e e mea tano ’e e mea matara i te mau ta’ata ato’a. ’Ua nā ’ō ’oia : « Tē parau nei au ē… e mea ti’a [i te mau melo] ’ia tai’o i te mau pāpa’ira’a i roto i te fa’atoro Bibilia nō ni’a i te hiero, mai te ‘Fa’atāhinura’a’, te ‘Fafaura’a’, te ‘Tusia’ ’e te ‘Hiero’. E hina’aro ato’a paha te hō’ē ta’ata e tai’o i te Exodo pene 26–29, ’e te Levitiko, pene 8. Tē fa’a’ite maita’i ra te Faufa’a Tahito, ’e tae noa atu te buka a Mose ’e a Aberahama i roto i te Poe Tao’a Rahi, i te tau ’āu’iu’i o te ’ohipa nō te hiero ’e i te huru mure ’ore o te mau ’ōro’a ».17
Nō reira, ’a feruri na e nā ’ō mai tā ’outou tamaiti ’aore rā tamāhine : « ’Ua parau mai te tahi ta’ata i te fare ha’api’ira’a ē, e ’ahu huru ’ē e ’ō’omohia nei i roto i te hiero. Terā iho ā ? » Tē vai nei te hō’ē video i ni’a ia temples.ChurchofJesusChrist.org, te i’oa ’o « Te mau ’ahu nō te hiero [Sacred Temple Clothing] ». Tē fa’ata’a nei teie mātēria maita’i roa ē, mai muta’a mai ā, ’ua ha’apa’o te mau tāne ’e te mau vahine i te pehe mo’a, te mau pure huru ta’a ’ē, te mau ’ahu ’ōro’a, te mau ravera’a ’e te mau ’ōro’a e fa’a’ite i tō rātou mana’o roto hōhonu roa e pūpū i te Atua. Nō reira, tē turu nei te ’Ēkālesia i te fa’aineinera’a fa’atumuhia i ni’a i te ’utuāfare nō te fāri’i i te mau ha’amaita’ira’a hanahana o te hiero nā roto i te arata’ira’a ’ōhie ’e te mau mātēria fa’ahiahia mai teie video. ’Ua matara noa te mau parau ha’amāramaramara’a nō ’outou.18
’A tūtava ai tātou i te haere nā roto i te marū o te Vārua o te Fatu,19 e ha’amaita’ihia tātou nō te māramarama ’e nō te fa’atupu i tō tātou nei fare i te ’aifāitora’a tītauhia nō te mea e tano ’e te mea ’aita e tano e paraparau nō ni’a i te mau ’ōro’a ’e te mau fafaura’a o te hiero.
Te parau fafau ’e te ’itera’a pāpū
Tē mana’o nei au ē, tē vai ra vetahi o ’outou e uiui nei te mana’o ē, e noa’a ānei i tā ’outou ha’api’ira’a ’evanelia ’ia fa’atumuhia i ni’a i te ’utuāfare ’e ’ia turuhia e te ’Ēkālesia. Penei a’e ’o ’outou ana’e te melo nō te ’Ēkālesia i tō ’outou fare, ’aore rā ’aita tō ’outou hoa fa’aipoipo e pāturu nei ia ’outou, ’aore rā e metua ’ōtahi ’outou, ’aore rā tē ora ’ōtahi nei ’outou ’ei melo ’ōtahi ’aore rā ’ei ta’ata tei ta’a, ’e tē uiui nei paha tō ’outou mana’o nāhea ’outou i teie mau parau tumu. E tāne fa’aipoipo paha ’oe ’e tā ’oe vahine fa’aipoipo e hi’o nei i te tahi ’e te tahi ma te uira’a : « E ti’a ānei ia tāua ’ia rave i te reira ? »
’Oia mau ïa ! Tē parau fafau atu nei au ē, e mani’i mai te mau ha’amaita’ira’a ha’amana i roto i tō ’outou orara’a ’e e ’ite-pāpū-hia te reira. E matara te mau ’ūputa. E ’ana’ana mai te māramarama. E rahi atu ā tō ’outou ’aravihi nō te haere tāmau ā i mua ma te itoito ’e te fa’a’oroma’i.
Tē fa’a’ite pāpū nei au ma te ’oa’oa ē, e tae mai taua mau ha’amaita’ira’a fa’atuea ’a tūtava ai tātou i te rave fa’aoti i tā tātou hōpoi’a ta’ata hō’ē e ha’api’i ’e e here i te ’evanelia a Iesu Mesia i fa’aho’ihia mai. E ti’a mau ia tātou ’ia « fa’aineinehia nō te noa’a mai te mau mea ato’a i hina’arohia ra ».20 ’O tā’u ïa e parau fafau nei ’e e fa’a’ite pāpū nei i te i’oa mo’a o te Fatu ra Iesu Mesia, ’āmene.