Elder L. Todd Budge
Hitu ’Ahuru Hui mana fa’atere rahi
I tōna ’āpīra’a, ’ua ha’api’i te metua o Todd Budge iāna nāhea i te ’imi i te hina’aro o te Fatu. I roto i tōna orara’a, ’ua tāmata ’oia i te rave i te reira i roto i tāna mau fa’aotira’a ato’a.
Tau matahiti i muri mai, i muri iho i tō rāua tāna vahine ha’amaura’a i tō rātou ’utuāfare e pae tamari’i, ’ua tae mai te mau mana’o pae vārua e fa’aru’e i tōna tōro’a ’ohipa nō te mau fare moni ’e te ’ohipa moni. E tītau teie tauira’a i te fa’atusiara’a rahi nōna nō te ha’amau iāna i roto i te hō’ē tōro’a ’āpī.
I muri a’e i te tauto’ora’a rahi ’e te fa’aineinera’a nō te taui i te tōro’a, ’ua fārerei a’era Elder Budge i te ta’ata ’aravihi hō’ē roa nō te hōro’a mai i te arata’ira’a. ’Ua parau mai terā ta’ata ē, ’ia fa’aea noa Elder Budge i roto i tōna tōro’a i te fare moni, ma te fa’aha’amana’o iāna ē, e roa’a iāna te mau rāve’a e rave rahi nō te hōro’a i te parau a’o ’e nō te tauturu i te ta’ata. « Tītauhia te mau ta’ata ha’avare ’ore i roto i te tapiho’ora’a », te parau ïa a terā ta’ata.
’Ua ’apo mai Elder Budge i taua fārereira’a ra ’ei tāpa’o aroha nō ’ō mai i te Fatu. « ’Ia mana’o vau, ’ua hina’aro ’oia ’ia ’ite tei hea roa tō’u ’ā’au », tāna ïa parau. « I te ’itera’a te Fatu i tō’u ’ā’au, ’aita ’oia i tītau i terā tusia, ’ua ti’aturi atura vau e ti’a iāna ’ia fa’a’ohipa iā’u nō tāna mau ’ōpuara’a ma te taui ’ore i tō’u tōro’a. »
Nā roto i tōna tōro’a, ’ua ti’a iāna ’ia riro ’ei fa’aurura’a maita’i i roto i te ’ohipa tapiho’ora’a, ’e ’ua matara ato’a mai te mau ’ūputa nō te porora’a ’evanelia i Tāpōnē.
’Ua fānauhia Lawrence Todd Budge i te 29 nō Tītema 1959, i Pittsburg (California, Marite), e Lowell Jensen ’e Deanna Price Budge. ’Ua mātau ’oia ia Lori Capener i tō rāua matahiti mātāmua i te fare ha’api’ira’a teitei nō Brigham Young. Va’u ’āva’e i muri mai i tōna ho’ira’a mai nā te misiōni nō Tāpōnē i Fukuoka, ’ua fa’aipoipo rāua i te hiero nō Logan (Utah). E ono tā rāua tamari’i.
I te noa’ara’a tāna parau tū’ite i BYU i te matahiti 1984, e parau tū’ite Licence nō te fa’arava’ira’a faufa’a, ’ua ’ohipa Elder Budge nō Bain & Company Japan ; Citibank, N.A. ; ’e nō GE Capital. ’Ua riro mai ’oia ’ei peresideni ’e ’ei ta’ata fa’atere rahi nō Tokyo Star Bank Limited i te matahiti 2003, ’e ’ua tāvini ’oia ’ei peresideni nō te tōmite fa’atere o te fare moni mai te matahiti 2008 i te matahiti 2011.
’Ua tāvini Elder Budge ’ei Hitu ’Ahuru ārea, ’ei peresideni nō te misiōni nō Tāpōnē i Tokyo, ’ei peresideni titi, ’ei ’episekōpo, ’ei peresideni pupu peresibutero ’e ’ei peresideni Feiā ’Āpī Tamaroa nō te titi.