Monalivaliva Ga: iTabagone Qase Cake
Kunei na iNuinui ena Dela ni Uto ni Yavavala
Ni sotava o Itali na dredre e kauta mai na COVID-19, au raica e dua na vuna meu tatakube tikoga ena inuinui.
E vakaitikotiko mai Catanzaro, Itali, o koya e vola.
Au taleitaka na vosa veivakacegui a wasea vei iratou na nona tisaipeli ni oti na Nona tucaketale o Jisu: “Dou vakacegu” (Joni 20:19). E sega beka ni veivakurabuitaki ni dau yalataka ga vei ira dau muri Koya na noda iVakabula na vakacegu? E dua na ka au a sotava ena dua na gauna lekaleka sa oti e vakananuma vei au na dina oqo.
Vakanuinui ka Vakatikitikitaki Tu
Ena dua na bogi niu sara TV tiko, era veivosakitaka tiko na daunitukutuku na COVID-19 kei na kena revurevu e Itali, na vanua au vakaitikotiko kina. Era veivosakitaka na iwiliwili levu ni tamata era sa mate mai na manumanu ni mate kei na kena sa tubu cake tiko na iwiliwili ni tamata sa vakadeitaki ni sa tauvi ira. E dina ga ni vakarerevaki, au a sega ni leqataka sara vakalevu ena gauna oya. Ia rauta ni rua na macawa e muri, sa ca vakalevu cake, ka vakatalega kina na noqu lomaleqa.
E rarawa na yaloqu kau taqaya.ena maliwa ni ka kece oqo Au a lomaleqataka sara vakalevu deu na tauvimate. Sa qai vakadua ena noqu bula meu rere na lako ki cakacaka. Meu vakaqaniliga kei na iubi ni gusu kei na ucu ena veigauna kece au lako kina i tuba. Ena macawa ka tarava sa tabu vakadua na veilakoyaki ena vanua taucoko ka vakatikitikitaki vakaukauwa sara na tamata taucoko.
Ena gauna oqo sa sega ni vakatarai me keimami biuta na neimami itikotiko vakavo ga me keimami laki voli kakana vakadua e veimacawa. Sa dredre dina ni da sa tu ga vakadua i loma. Na soqoni kece ni Lotu sa mai tu vakawawa, oqori sa vakavuna meu yalorarawa, ia sa qai vakaleqai au sara vakalevu na sogo ni valetabu baleta niu sa nakita tiko meu na tiko ena nodratou vauci e dua na matavuvale au a vakavulica ena noqu kaulotu. Au vakila na luvuci ena rarawa kei na sega ni inuinui ena vuku ni ituvaki ni bula e vuravura.
Veilauti na Sere kei na iVakatagi
Dua na mataka niu wili ivolanikalou ka vakarogoca e dua na sere ka vakatokai na “Peace in Christ,” Au masu ka kerea vua na Tamada Vakalomalagi, “Meu na tudei tiko vakacava ena inuinui ena gauna dredre oqo?”
Oqori na gauna sa tekivu meu vakarogoca kina vakavinaka na qaqa ni sere:
E solia vei keda na inuinui o Koya.
Ni sa yali na inuinui.
E solia vei keda o Koya na kaukauwa
Ni da sa sega ni rawa ni toso.
E solia vei keda o Koya na ivakaruru
Ena gauna ni cava ni bula.
Ni sa sega na vakacegu e vuravura,
Sa tu vei Karisito na vakacegu.1
Au vakila ni vakadinadinataka vei au na Yalotabu ni dina na vosa oqo. Au irova noqu itokaniyaca ni kaulotu makawa ka rogoca ena noqu vakasama na veimalanivosa oqo: “Romina, au vinakata me tu vei iko na vakacegu vata ga ko a solia vei ira tale eso ena nomu kaulotu ena nomu wasea na noqu itukutuku ni vakanuinui. Ena vinaka mai na veika kece. Au na sega ni laivi iko duadua tu.”
Ia oqo, au vinakata meu wasea na itukutuku ni vakanuinui oqori! E dina niu sa rere vakalevu ka lomaleqa ena gauna oqo ni veika dredre e vuravura, au kila vakaidina ni da tu vata kei Jisu Karisito, sa tiko na inuinui! Vuki ki Vua Mo rogoci Koya! Muri Koya. Sa rawa meda kune vakacegu Vua. E tiko na kaukauwa ena vakabauti Koya, ni o kitaka vakakina, ena solia vei iko na kaukauwa mo nuidei tiko (raica na Ica 12:4).
Tatakube Toka ena iNuinui
Nona vosa tiko baleta na inuinui, e vakavulica kina o Elder Dieter F. Uchtdorf ena Kuoramu ni iApositolo Le Tinikarua, “Nuitaka na Kalou, na Nona vinaka, kei na Nona kaukauwa e vakabulabulataki keda ena yaloqaqa ena gauna ni veibolebole dredre.”2 Ena vakarerevaki ni gauna oqo, e rawa ni da digitaka na yaloqaqa ka vakararavi ki na yalayala ni Turaga. Ni sa dredre na bula, eda na sega ni kerea vua na Tamada Vakalomalagi me veisautaka na ituvaki ni noda bula, ia, eda rawa ni kerei koya me veisautaka na noda ivakarau ni bula. Sa rawa meda vuli ka tubu cake ena ituvaki cava ga.
Au kila ni sa tiko vata kei keda na Kalou, ka lomani ira na Luvena — io kivei keda eda tiko e na uto sara ni matetaka. Au kila ni na vinaka na veika kece ena Vukuna. Kau kila niu na rawa ni tatakube tikoga ena vakacegu e dau yaco mai ena vakabauti Jisu Karisito. Ena vuku ni nona Veisorovaki sega ni vakaiyalayala, au na sega ni sotava duadua na veika dredre.