Na Cava e Vakavulica Vei Au na Lotu e Vale me Baleta na Soqoni Vata

iVakatakilakila

Na marama e taura ka dolava tu na ivolanikalou

Na lako i Lotu e dua na ka bibi ena noqu loma ni macawa. Au dau taleitaka na sota vata kei ira na itokani kei na matavuvale ka vakatikitikitaki na lomaocaoca ni vuravura me ia na sokalou vata.

Sa tekivu me veisau na veika kece ena vuku ni matetaka. Ena gauna o ya, se bera ni levu sara e tauvi ira na coronavirus e Sweden, ka se caka tikoga na vuli, au sega kina ni taura vinaka sara kina se cava na vuna era nanuma kina na iliuliu ni Lotu me muduki tu mada vakawawa na soqoni. Ena sabalia tu ni veika kecega e veiyasai vuravura, au sa maqusa sara me sota kei ira na noqu itokani ena Sigatabu. Ia au qai vulica ni sa muduki tu vakawawa na veisoqoni vaka-Lotu ka keimami na sokalou ga e vale. Au a rarawa ka cudru vakalailai.

Ni sa yaco mai na Sigatabu, au dara na noqu ivinivo kei na noqu iukuuku, va katalau, ka mai dabe vata kei rau na noqu itubutubu. Au raica ni a vakarautaka vakavinaka o tamaqu na sakaramede ka ubi na madrai kei na wai ena dua na isulu vulavula, ka cega tu na nona ivolanikalou ki na masu ni sakaramede.

Sega ni dede sa yaco mai na gauna me lagati na sere ni sakaramede. Ni sa tekivu dovia o tamaqu na madrai, au vakila vakaukauwa sara na Yalotabu. E vaka ni tukuna tiko vei au na Veisorovaki i Jisu Karisito sa baleti au sara ga. Sa tekivu meu tagi, ia ena gauna au rai yani kina vei tinaqu, au raica ni sa tagi talega ka matadredredre mai vei au—e rawa ni vakila talega na Yalo okoya.

E dina niu a sega ni duavata taumada, au sa qai kila oqo ni vakayagataki ni sakaramede mai vale e dua na madigi totoka ka vakaibalebale. Ena veimacawa sa oti oqo, au sa vakila na vakavinavinaka levu cake me baleta na matabete kei na kosipeli vakalesui mai, ka solia vei keda na vakacegu kei na sautu ena veigauna dredre. Au sa vakila talega na loloma e tu vei Tamada Vakalomalagi me baleti ira kece na Luvena. Kau sa vakavinavinaka vakauasivi me baleta na parofita, ka vukei keda meda kila na ka me da cakava, ni da sega tiko mada ga ni kila na vuna.

Mai na gauna e yaco mai kina na ivakaro taumada me da lotu e vale, sa tarai ira e udolu na tamata na COVID-19 ka teteva yani e voleka ni veimatanitu kecega e vuravura. Ia niu taleitaka na veivolekati ena lotu e vale kei ira e vica ga na noda daulomani, au sa qai kila talega ni sega ni tautauvata kei na lako i lotu ka laki sokalou vata vakatabanalevu se tabana. Sa laveti cake rau tale ena soqoni ni sakaramede kei na soqoni tale eso ni na sega ni sosomitaki rawa.

E vakavulica o Elder D. Todd Christofferson ena Kuoramu ni iApositolo Le Tinikarua, “Sa inaki bibi e tiko kina e dua na Lotu ni Turaga o ya me bulia e dua na itikotiko ni Yalododonu me ra veivakatataki cake kina vakai ira ena “sala dodonu ka rabalailai sa basika ki na bula tawamudu.’[2 Nifai 31:18].”¹

Au sa qai kila ni lotu e bibi cake sara mai na noda laki sota ga vakaveitokani ena veimacawa. E baleta na noda vakayagataka na sakaramede, ka vakila ni da okati, veitokoni, ka tarai cake e dua na itikotiko ni vakabauta ena matanitu ni Kalou. Au na vakavinavinaka tikoga ena veivakalougatataki ena noda rawa me tiko na lotu e vale ena gauna oqo ni COVID-19 kei na veivakasama vovou au sa ciqoma me baleta na bibi ni soqoni vata. Ena bibi cake tale na soqoni ni sakaramede ena gauna sa na rawa kina ni da sota vata tale.