Monalivaliva Ga: iTabagone Qase Cake
Va na Lesoni ni Rarama ena Gauna ni Butobuto
Ni vakaruguti vuravura tu na o loaloa ni matetaka, e tu na sala me vakacilavi kina na rarama.
E vakaitikotiko mai Voronezh Oblast, Rusia o koya e vola.
Niu vakataubaletaka tiko noqu koli ena dua na gauna lekaleka sa oti, au raica ni curubasikata mai e dua na o loaloa na rarama ni matanisiga. E vakananuma vei au na matetaka ka veitauvi tiko oqo. E dina ga ni na butobuto ka dragali beka me vaka na o na ituvaki ni bula, na loloma ni Turaga vei keda e kaukauwa cake sara me vaka na matanisiga.
E dua na ivosavosa vaka-Valagi kilai levu “Na o kece e tiko kina e dua na laini siliva,” kena ibalebale ni dredre kece e rawa ni vakavulica vei keda e dua na ka yaga. Niu vakasamataka na veika e vukei au meu vakacegu tiko ena vica na vula sa oti kei na veika e sega soti ni veivuke, au qai raica e va na dina bibi au vakila ni na vakalougatataka tiko na noqu bula ni sa oti makawa yani na leqaleqa oqo.
1. Eda na Taqomaki ni da Muria na Parofita.
Na itukutuku raraba me baleta na icavacava ni vuravura kei na itukutuku lasutaki ni sala eso me vakarusai kina na manumanu ni mate e sega ni vakavinakataka na noqu rai me baleta na bula. Kevaka sara mada ga e kena inaki na itukutuku oqo mera vukei na tamata me ra taqomaki ka bulabula vinaka, era sa qai vakarerei au ga vakalevu. Kena ivakaraitaki, niu raica oti na ikaono ni italanoa baleta na kena rawa ni vakamatea na manumanu ni korona vairusi eso na ivakaboi ni kakana, au nanuma na noqu lomaleqataka kevaka e levu tu na ivakaboi ni kakana oqori ena kovate, me ikuri ni noqu taroga tiko se sa roro dina mai na noqu gauna ni mate.
Ena koniferedi raraba ni vica na yabaki sa oti, a veisureti kina o Peresitedi Russell M. Nelson me da lolo 10-siga mai na tabana ni itukutuku raraba e dau kauta mai na vakanananu ca ka tawasavasava ki na noda vakanananu.1 Na nona ivakasala e rogo vei au me vaka e dua na ivakaro, au sa mani sega kina ni vakayagataka na sala vakaitukutuku ka dau kania vakalevu na noqu gauna. Sa yaco meu marau vakalevu cake ka sega soti ni lomaleqa.
Ia oqo au sa raica ni gadrevi meu vakasavasavataka tale na noqu ivakarau vakompiuta. Au railesu ena qoroqoro ka kurabui: Sa kila rawa tiko beka ena gauna o ya o Peresitedi Nelson ni na yaco me ivurevure ni yalorarawa kei na ca na tabana vakaitukutuku raraba nikua, ena gauna ni bula leqaleqa oqo? Ka dina sara eda na taqomaki ni da muria na parofita. Nodra vosa na noda iliuliu ni Lotu e vaka e dua na rarama ni matanisiga, e curubasikata na veilecayaki ka vakararamataka na salatu ki na vakacegu.
2. Na Vakavakarau ena Valuta na Rere
E dua tale na ka e vakavuna meu sega ni logaloga vinaka sai koya noqu rogoci ira tiko na tamata era, me vaka ena gauna i Noa, era vakalialiai ira tale eso ena nodra vakavakarau kei na yalodei. Au vakabauta ni so na tamata era sa tekivu tara cake na ivakarau ni rai vakasabusabu me baleta na veisiga ni mataka. O ira era yalomatua vakaidina era vakamuria na nodra ivakasala na parofita ka tovolea vakamaqosa mera bula rawati ira.
Ena loma ni veiyabaki, era sa vakavulici keda na iliuliu ni Lotu me da vagalalataki keda mai na dinau, me da vuli vakavinaka cake me da rawata vakavinaka na veika e baleti keda kei ira na tani, me maroroi toka eso na kakana kei na wai, ka maroroi ilavo kevaka e rawa. Au kila na duidui e na veigauna kece sara, ka kakua ni vakatara na lewenivanua me dau maroroi kakana kei na iyaya tale eso ni na so na vanua. Ia ena loma ni vakatatabu sara mada ga vaqori, e kena irairai ni rawa vei keda yadua me da raica e dua na ka eda rawa ni cakava me da vakavakarau vakavinaka cake me baleta na veisiga ni mataka.
Au vakila niu taqomaki vakavinaka ena noqu sasaga meu talairawarawa ka rawa niu goleva na Turaga ena yalodei niu kere veivuke. Na vakavakarau oqo e vaka e dua tale na rarama ni matanisiga, e curubasikata na rere ka solia na inuinui.
3. Na iVakarau ni Bula ena Vakabasikata na Duidui
Sa vakatubura e lomaqu na vakavinavinaka vakalevu cake na matetaka oqo ena vukudra na tamata era dau vakayaloqaqataki au ena itukutuku veilaveti, rai vakayalo, kei na veivakalasai bulabula. O ira na itokani lomani oqo era dau vakararamataka na noqu siga. Era vakananuma vei au ni rawa ni da digitaka na sala me da sotava kina na veika cava ga e yaco wavoliti keda tu.
Au a tovolea meu muria na ivakaraitaki oqo ni sa mai muduki tu vakawawa na veisoqoni vaka-Lotu. Au a sega ni sikalutu ki na noqu taro vakacala ka “na cava na vuna” kei na “caka vakacava”, au a digitaka meu vakanamata ga ena yasana vinaka ni vuli kosipeli yavutaki e vale. Au rawa ni raica ena gauna oqo ni kena susugi cake tikoga e dua na ivakarau ni bula vinaka, dina ga ni dredre ena so na gauna, a rawa kina meu kaukauwa tikoga vakayalo vakatauvatani kevaka au a laiva me lewai au na yaloca. Me vaka e dua na ikatolu ni rarama ni matanisiga, e dua na ivakarau ni bula vinaka e rawa ni takali kina na lomatarotaro ka qai vakayadrata tale na yaloda.
4. Yalo Tabu e Dua na iTo Kaukauwa
Ena dua na siga niu yalorarawa voli ka galili, au mani nanuma meu vakarorogo ki na matasere ni Valecavu ena sala ni kakaburaki ena initaneti. E dau vukei au na sere kei na ivakatagi meu vakila na veivakayarayarataki ni Yalo Tabu. A yaco tiko e dua na veitalanoa bula ena sala ni kakaburaki, ka lasa noda raica toka nodra vakaraitaka eso na tamata mai na veiyasai vuravura na nodra loloma kei na vakavinavinaka! Au vakila niu duavata kei ira. Ni vueta na mosi ni yaloqu na veivakayarayarataki ni Yalo Tabu, sa yaco meu mamarau cake ka vakacegu.
Au sa raica e veigauna ni kevaka au sasaga meu sureta na Yalo Tabu ki na noqu bula, ena vukei au o Koya ena cava ga au gadreva. O koya e dua na ito kaukauwa ka sa dau tuvakarau me kauta mai vei keda na isolisoli ni vakacegu, logaloga vinaka, kei na veiciqomi. Me vaka na rarama ni matanisiga, sa rawa Vua me vakaseyavutaka na buwawa ka vakatakila na ka e dina.
Vaqara na Rarama ni Matanisiga
Na Turaga e kaukauwa cake mai na veika rarawa kecega. Me vaka e tukuna na ikarua ni qaqani sere 45:
Noqu rarama ni levu na o
Na vakabauta bai sivita tu
Ka rai sara yani kivei Jisu
Na butobuto sega ni rawai au.2
Au diva ke rawa ni da taubale vata nikua. E rawa ni da rai cake ki lomalagi, vakacilavi siga, ka veivosakitaka na dina ka na vakararamataka na noda bula. Au kila ni yaco vei iko na vakasama totoka me wasei vei ira tale eso na rarama o ya. De rawa ni o raitayaloyalotaka na taubale vakaoqo ena gauna tarava e osota kina na vunilagi na cava vakayalo. Sa tiko vata kei keda na Turaga, ka sega ni dodonu me da rere.