Vua na Daukaulotu Lesi Vou Vakasauri

Ena itekivu ni 1997, au a dua na daukaulotu e Albania. Keirau taleitaka vakalevu kei na noqu itokani na vanua, na pai totoka ni jisi kei na sipinaji kei na rorogo ni ivosavosa keirau sa saga vagumatua me keirau vulica. Ka bibi duadua, keirau taleitaka na cakacaka vata kei ira na tamata mai kea.

Ni toso na gauna, sa tubu me kaukauwa cake na duidui ena draki vakapolitiki mai kea. Keirau tovolea me keirau vakanamata toka ga ena wasei ni kosipeli ia sa sega ni rawa ni levei na itukutuku ni nodra sa kaukauwa cake tikoga na dau vakaduiduile ena vanua taucoko. Sa qai vakatabuya na matanitu na veitosoyaki, ka tekivu me tubu na vakacaca. Sa mua na matanitu ki na ivalu ni vanua.

Kena itinitini, ena ika 14 ni Maji, sa tokitaki tani na tabana ni kaulotu. Au na sega ni guilecava na qiri sa tukuni mai kina ni sa kena gauna ni vakasoqoni vata me keimami sa kau tani vakatotolo. E vusolo noqu vakasama kei na vakanananu. E dina niu vinakata meu taqomaki vinaka, ia e voroka na utoqu na noqu sa na biuti ira tu mai na veimatavuvale keimami sa mai veilomani, vakabibi ena gauna drakidrakita vaqo. Sa na sega mada ga na veivakamocetaki.

Na ilakolako mai na vanua oya e oka kina na vuka ena elikoputa ki na dua na waqa ni usa waqavuka ka dua na lele lekaleka ki Itali ni bera na ilesilesi vou ki na veitabana duidui ni kaulotu. Au qai laki tini yani e Igiladi. E totolo wale, ka taleitaki toka, ia e vakavuqa ga ni dredre. E dua na iotioti ni noqu vakanananu me baleti Albania na noqu sarava ni sa tabogo yani e ruku ni elikoputa na vanua, kau vakananuma se na vakacava beka o ira na tamata keimami sa biuti ira tu mai.

Ena duidui beka na matailalai ni veika o ni sotava mai vei au, au kila ni so vei kemuni era vakila tu na veilecayaki ni yalo ena gauna oqo. Au sa nuitaka kina ni veika au vakarau wasea ena voqa tale tu ga vei kemuni. Oqo e ono na ivakavuvuli ka vukea noqu kunea na vakacegu ni oti na veivakurabuitaki ni veiveisau kei na veivukiyaki ni noqu gauna ni kaulotu tudei.

1. Sema vei ira tale eso. Ena yaco beka mai na vakanananu rarawa ka veilecayaki ka vakavuna nomu via tuvakasuka mai vei ira eso. Ia, e bibi me da sema tikoga, vakabibi ena gauna lekaleka ka tarava o na veisau kina. Dolele yani vei ira na tamata dau veikauwaitaki era na laveti iko cake vakayalo. Ena tekinolaji sa tu nikua, ena sega ni dua na iulubale! O na kunea beka e dua mo vakatovotovotaka kina nomu maqosa ena vosa tani eso. Ena rawa sara beka ga ni o veitaratara tiko kei ira o ni a veiqaravi vata kei ira o a vakavulica. E dina ni o na logaloga ca toka beka ena gauna oqo, ia o sega ni tiko duadua. Kevaka sara mada ga era sega ni kila nomu matavuvale kei na itokani na sala mera tokoni iko vakavinaka kina, au kila ni vuqa vei ira era kauwaitaki iko ka vinakata me kua ni dua na leqa.

2. Wasea tikoga na nomu ivakadinadina. Se cava ga na vanua o tiko kina ni o wilika oqo, au sega ni vakabekataka ni ra wavoliti iko na tamata era na vakalougatataki ena nomu ivakarau ni rai vakaiko. Kakua ni madua mo wasea na veika o sa vulica ka vakila me vaka e dua na daukaulotu tudei—se cava ga na balavu se lekaleka ni nomu gauna ena buturara. Ni o lakocuruma na veika eso ena gauna lekaleka se qai oti toka ka raica na liga ni Kalou ena nomu bula, wasea na veika oqori vei ira na nomu daulomani. De dua beka na lesoni o vulica mai na nomu ilakolako sai koya na ka e vinakata me rogoca e dua.

3. Vakabauta ni kilai iko na Tamada Vakalomalagi. Kila na cava? E kila na Kalou ni na yaco oqo! E kila na veika kece e yaco tiko ena nomu bula. Ka kila vakavinaka na nomu iVakabula ko Jisu Karisito, na veika sara ga o vakila tiko. Erau sala vata kei iko ena nomu lakova tiko na salatu oqo ka rawa ni vakacegui iko mai vua na Yalo Tabu. E rawa beka ni dede na mosi ni yalo, sega ni dua na kena leqa. Vakabauta na Turaga ena Nona kaya, “Au na tiko e yasamudou imatau ka tiko talega e yasamudou imawi, ia na Yaloqu ena tiko e yalomudou; era na vakavolivoliti kemudou na noqu agilosi ka laveti kemudou cake” (Vunau kei na Veiyalayalati 84:88).

4. Dau vosota ena nomu gauna ni rarawa. O vakila ni o dau cudru? Rarawa? Yalo ca? Se o vakasamataka, “Oqo e sega ni dodonu!”? E rairai o vakasamataka tiko e dua na ivakarau duatani sara kei na yalo. Kila ni veika cava ga o sa vakila voli ena gauna oqo e vakabau. O lolosi tiko, ka bibi sara mo yalomalua ena nomu sasaga voli tiko ena gauna oqori. Ena gauna vata ga, qarauna mo kakua ni vakalevulevuya na veika o sotava se vakasamataka vakabibi na veika sa oti ka vakaleqa kina na ka o rawa ni cakava nikua. Kevaka o vakila ni dredre mo vakaitavi ena veisala bulabula, kerea na nomu bisopi se peresitedi ni tabana ni kaulotu me vukei iko mo semati vua e dua na kenadau ni veivakasalataki. E sega ni dodonu me madualaki na kere veivuke.

5. Saga mo sureta na Yalotabu. Tomana tiko nomu dromuci iko ena cakacaka ni kosipeli. Kevaka o sa lesi vou tale, talairawarawa tikoga ki na lawa ni kaulotu. Raica na sala ena veisiga mo vakaraitaka vua na Yalo ni o vinakati Koya me tiko vata kei iko, ka vola na veivakauqeti o ciqoma mai Vua. Na nomu volekata na Yalo ena vukea nomu vakatulewataka na nomu veisiga ni mataka ka kune vakacegu ena kemu ituvaki ena gauna oqo.

6. Yalodei ni o se “lesi tikoga ki na cakacaka.” Ena dua na gauna balavu, au nanuma voli ni noqu “veikacivi” na vanua au a lesi meu veiqaravi kina vaka-daukaulotu. Au diva meu a kila taumada ni noqu veikacivi dina o ya meu qaravi ira na luve ni Kalou ena vanua cava ga au tu kina. Niu sa luvata oti na noqu itokaniyaca loaloa, au se vauci voli ga ena noqu veiyalayalati ni papitaiso meu taura na yaca i Jisu Karisito ka raici ira na tani ena sala vata ga ena raici ira kina ko Koya ena veisiga yadua. Ke tiko e dua na nomu ilesilesi vou ni kaulotu se o sa vagalalataki mai na veiqaravi tudei, vakadeitaka ni rawa ni vakayagataki nomu taledi me tarai cake kina na matanitu ni Kalou ena vanua cava ga o lako kina.

Au nanuma ni dua na ka veivakayalolailaitaki ena neimami biuti Albania o ya ni keimami sa biuti ira na Yalododonu vou era sa na sokota oqo na kosipeli ka sega kina na neimami veivuke. Ia kila na cava? Era cakava e dua na cakacaka veivakurabuitaki. E dina ga ni keimami sega ni tiko e kea me vukei ira, sa tiko vata kei ira na Kalou. Ena noqu biuta mai ena sivia na 20 na yabaki sa oti, sa toso sara na cakacaka ena vanua ko ya, ka ra sa kaukauwa sara na Yalododonu.

O koya, kemuni na daukaulotu, tomana tikoga nomu vaqara na vei cakacaka vakalou e tu e matamu. Era se tu na tamata era gadreva tu na domomu, ka se levu na marau me kunei. Vakayagataka na ka matalia oqo me madigi me vakatitobutaki kina na nomu veiwekani kei na Kalou. Me vakalougatataki kemuni ni o toso tikoga ki liu ena vakabauta.