Monalivaliva Ga: iTabagone Qase Cake
Vakanamata me ra Vauci Vata
E dina ga ni sa veisau na neirau ituvatuva, keirau a veivolekati cake vakakina vua na Kalou.
iTaba vakaraitaka o ira na ivakaraitaki
E vakaitikotiko mai Kantō, Japan o koya e vola.
A dodonu me keirau vauci ena valetabu mai Sapporo Japani kei na noqu itau ena vula oqo. Sa qai tekivu veisau na itutu ni bula ena vuku ni coronavirus. Ni yaco mai na ituvaki veilecayaki yadua, au na vakasaqara na veidusimaki ni Kalou ena masu, wili ivolanikalou kei na vakarorogo ki na vosa ni koniferedi raraba. Au a tokaruataka na iwalewale oqo ena veigauna niu cakava na vakatulewa me baleta na veisiga ni mataka. Sa mani sogo na veivaletabu. Nikua keirau se waraka me keirau vauci. Ia au sa raica na sala e vukei keda kina na Kalou ena veigauna dredre oqo.
Na Veivakalougatataki ena Loma ni Veilecayaki
Sa bau dredre dina na gauna oqo. Ia au sa sotava talega e vuqa na veivakalougatataki. Sa vukei au meu kila na veivakalougatataki oya noqu volavola ena ivolaniveisiga ka sa veivakamamautaki ena veigauna dredre oqo.
E dua na veivakalougatataki au sa raica oya ni sa kaukauwa cake na keirau ivau kei na noqu itau. E duidui na vanua keirau dui vakaitikotiko kina, duidui na bula keirau dui bulataka, ka sega ni rawa ni keirau sota. Ia sa lomai keirau me keirau dau masu vata ka veivosakitaka na veika keirau sa vulica tiko mai na neirau vulica na kosipeli. Keitou a vakatulewa vata. E dina ga ni keirau a dui tutu tikoga vakayago, sa titobu cake na keirau ivau, ka vaka me sa voleka mai o koya.
Toso ki Liu
Kena itinitini, keirau sa mani lewa me keirau vakamau vakamatanitu. Au sega ni kila se gauna cava sa na qai rawa kina ni keirau vauci ena valetabu, ia au sa vakanamata kina.
Au vakabauta ni levu na ka e rawa ni da vulica mai na matetaka raraba oqo. Au vakabauta ni tiko e dua nona ituvatuva na Turaga me da vinaka kina, se cava ga e yaco ena vuravura e wavoliti keda — “ni sa lomani ira na kai vuravura o koya sa solia kina na nona bula me vakayarayarataki ira kina na tamata kecega ki vua” (2 Nifai 26:24).
Au vakabauta ni vinakata na Turaga me vukei keda kece me da kune marau ena loma ni gauna dredre vakaoqo. Au sa kunea oti na vakacegu ena noqu vaqara na veivakalougatataki sa tu vei au. Kevaka o sotava tiko na veivakatovolei vata vaqori ena gauna oqo, kakua ni lomaleqa. Io na matetaka raraba oqo e rawa ni vaqaqacotaka na nomu ivakadinadina.