Ha’apāpū i te hō’ē ha’avāra’a ti’a

I te ’āva’e ’Ātopa i ma’iri a’e nei, ’ua tītau mai te peresideni Russell M. Nelson ia tātou ’ia feruri, e nāhea tō tātou orara’a e ta’a ’ē ai ’āhiri ē, ’ua ’īriti ta’ue-hia tō tātou « ’ite tei roa’a mai nā roto mai i te Buka a Moromona » ?¹ ’Ua feruri au i teie uira’a, mai ia ’outou e rave rahi, ’ua pāpū iā’u. Hō’ē ferurira’a tei ho’i tāmau noa mai—’ia ’ore te Buka a Moromona ’e tōna māramarama nō ni’a i te ha’api’ira’a tumu a te Mesia ’e tōna tusia tāra’ehara, e fāriu ïa vau i hea ?

Te ha’api’ira’a tumu a te Mesia—’oia ho’i, te mau parau tumu nō te fa’aorara’a ’e te mau ’ōro’a o te fa’aro’o i te Mesia, te tātarahapa, te bāpetizora’a, te hōro’a o te Vārua Maita’i, ’e e mau pāpū e tae noa atu i te hope’a—’ua ha’api’ihia te reira e rave rahi taime i roto i te mau pāpa’ira’a mo’a o te Fa’aho’i-fa’ahou-ra’a mai, terā rā, ma te pūai ta’a ’ē i roto i te Buka a Moromona.² E ha’amata te ha’api’ira’a tumu nā ni’a i te fa’aro’o i te Mesia, ’e tōna mau tuha’a tāta’itahi ato’a, tei te huru ïa o te ti’aturi i roto i tōna tusia tāra’ehara.

Mai tā te Peresideni Nelson i ha’api’i mai, « Tē hōro’a nei te Buka a Moromona i te māramaramara’a hope roa a’e ’e te mana nō ni’a i te tāra’ehara a Iesu Mesia, ’o tē nehenehe e ’itehia i te mau vāhi ato’a ».³ Rahi atu tō tātou māramaramara’a i te hōro’a hanahana a te Fa’aora, rahi ato’a atu tō tātou ’itera’a, i roto i tō tātou ferurira’a ’e i roto i tō tātou ’ā’au,⁴ i te ti’a mau o te ha’apāpūra’a a te peresideni Nelson ē, « e mana tō te mau parau mau o te Buka a Moromona nō te fa’aora, nō te tāmāhanahana, nō te fa’aho’i, nō te tauturu, nō te ha’apūai, nō te fa’anā, ’e nō te fa’aitoito i tō tātou vārua ».⁵

Hō’ē hōro’a faufa’a ’e te hau a te Buka a Moromona i tō tātou hāro’aro’ara’a i te tāra’ehara o te Fa’aora, ’o tāna ïa ha’api’ira’a ē, tē fa’atupu nei te tusia aroha a te Mesia i te mau tītaura’a ato’a o te parauti’a. Mai tā Alama i fa’ata’a mai : « ’E nō reira, nā te Atua iho e tāra’e mai i te mau hara a tō te ao nei, ’ia tupu te rāve’a aroha, ’ia fa’ati’ahia tei tītauhia e te parauti’a ra, ’ia vai ā te Atua ’ei Atua maita’i, ’ei Atua parauti’a, ’e ’ei Atua aroha ho’i ».⁶ E’ita te fa’anahora’a nō te aroha a te Metua⁷—tā te mau pāpa’ira’a mo’a e parau ato’a nei ē, te fa’anahora’a nō te ’oa’oa⁸ ’aore rā, te fa’anahora’a nō te fa’aorara’a⁹—e tupu maori rā, ’ua fa’ati’ahia te mau tītaura’a a te parauti’a.

Terā rā, e aha mau te « mau tītaura’a a te parauti’a »? ’A feruri na i te ’ohipa i tupu i ni’a ia Alama. Ha’amana’o na ē, i tōna ’āpīra’a, tē haere ra ’o Alama « i te ha’apaura’a i te ’Ēkālesia ».¹⁰ Inaha, ’ua parau ’o Alama i tāna tamaiti ia Helamana ē, « e māuiui ihora tō’u ’ā’au i te reira i te mau ’ati o hade » nō te mea, « i tāparahi na ho’i au i nā tamari’i e rave rahi nā [te Atua] » nā roto i te arata’i-’ē-ra’a « ia rātou i te pohe » .¹¹

’Ua fa’ata’a ’o Alama ia Helamana ē, i te pae hope’a ’ua tae mai te hau i roto iāna i te taime « ’ua ha’amana’o » ’oia i tōna metua tāne i te ha’api’ira’a « i te taera’a mai […] ’o Iesu Mesia […] ’ei tāra’ehara nō tō te ao nei ».¹² ’Ei ta’ata tātarahapa ’ua tāparu Alama i te aroha o te Mesia¹³ ’e ’ua ’oa’oa ’e ’ua marū ihora i tōna ’itera’a ē, ’ua tāra’e te Mesia nō tāna mau hara ’e ’ua ’aufau i te mau mea ato’a tā te parauti’a e tītau ra. Teie fa’ahou ā, e aha tā te parauti’a i tītau ia Alama ? Mai tā Alama iho i ha’api’i i muri a’e ra ē, « e ’ore e ti’a i te hō’ē mea vi’ivi’i ’ia ō i te bāsileia o te Atua ».¹⁴ Nō reira, te tahi o te tāmarūra’a ’o Alama, ’oia ho’i, ’āhiri ’aita te aroha e tae mai e tāpe’a te parauti’a iāna e ora i pīha’i iho i tō tātou Metua i te ao ra.¹⁵

Nō ni’a noa ānei iāna iho te fa’atumura’a o te ’oa’oa o Alama—i ni’a i tōna ha’apaera’a i te fa’autu’ara’a ’e tōna ti’ara’a e ho’i i te Metua ra ? ’Ua ’ite tātou ē, ’ua ’oto ato’a o Alama nō te mau ta’ata tāna i ruri ’ē atu i te parau mau.¹⁶ E’ita rā Alama iho e nehenehe e fa’aora ’e e fa’aho’i fa’ahou i te mau ta’ata ato’a tāna i ruri ’ē. E’ita tāna iho e nehenehe e ha’apāpū ē, e hōro’ahia ia rātou te hō’ē rāve’a maita’i nō te ha’api’i mai i te ha’api’ira’a tumu a te Mesia, ’e ’ia ha’amaita’ihia nā roto i te orara’a i tōna mau parau tumu ’oa’oa. ’Aita e ti’a iāna ’ia fa’aho’i mai ia rātou tei pohe ma te ha’amatapōhia nā tāna mau ha’api’ira’a hape.

Mai tā te peresideni Boyd K. Packer i ha’api’i i te hō’ē taime : « Te mana’o tei fa’aora ia Alama… teie ïa : Fa’aho’i fa’ahou i te mea e’ita e roa’a ia ’oe ’ia fa’aho’i, fa’aora i te pēpē e’ita e roa’a ia ’oe ’ia fa’aora, tātā’i i te mea tā ’oe i ’ōfati ’e e’ita e roa’a ia ’oe ’ia tātā’i, o te ’ōpuara’a mau ïa o te tāra’ehara o te Mesia ».¹⁷ Te parau mau ’oa’oa tā Alama i « ha’amana’o » e ’ere roa ē, tōna ana’e tāmāra’ahia, ’ua ti’a ato’a rā i te feiā tāna i ha’apēpē ’ia fa’aorahia.

E rave rahi matahiti hou ’a fa’aorahia ai o Alama nā roto i teie ha’api’ira’a tumu tāmāhanahana, ’ua ha’api’i te Ari’i Beniamina nō ni’a i te fa’aorara’a rahi tei pūpūhia mai e te tusia tāra’ehara a te Fa’aora. ’Ua parau te Ari’i Beniamina ē, ’ua hōro’ahia mai « te parau maita’i ’e te ’oa’oa rahi » iāna nā « te hō’ē melahi nō ’ō mai i te Atua ».¹⁸ I roto i taua mau parau maita’i ra tē vai ra te parau mau ē, e māuiui ’e e pohe te Mesia nō tā tātou mau hara ’e te mau hapehape nō te ha’apāpū ē, e « tae mai te ha’avāra’a ti’a i ni’a i te mau tamari’i a te ta’ata nei ».¹⁹

E aha mau tā te hō’ē « ha’avāra’a ti’a » e tītau ? I roto i te ’īrava i muri iho, ’ua fa’ata’a te Ari’i Beniamina ē, nō te ha’apāpū i te hō’ē ha’avāra’a ti’a, ’ua tāra’e te toto o te Fa’aora « nō rātou tei hi’a nō te hara a Adamu » ’e nō rātou « ’o tei pohe ma te ’ite ’ore i te hina’aro ’o te Atua ia rātou, ’oia ho’i ’o tei hara ma te ’ite ’ore ».²⁰ ’Ua ha’api’i ’oia ē, e tītau ato’a te ha’avāra’a ti’a ē, « e riro ato’a te toto o te Mesia ’ei tāra’ehara nō » te mau hara a te mau tamari’i ri’i.²¹

Tē ha’api’i nei teie mau pāpa’ira’a i te hō’ē ha’api’ira’a tumu hanahana—e fa’aora te tusia tāra’ehara a te Fa’aora, ’ei ō hōro’a noa, ia rātou tei hara ma te ’ite ’ore, ia rātou, mai tā Iakoba i parau ra, « ’aita e ture ».²² Te ti’a’aura’a nō te hara tei te huru ïa o te māramarama tei hōro’ahia ia tātou ’e tei te huru ato’a o tō tātou ti’ara’a ’ia fa’a’ohipa i tō tātou ti’amāra’a.²³ ’Ua ’ite tātou i teie parau mau fa’aora ’e te tāmāhanahana maoti te Buka a Moromona ’e te tahi atu mau pāpa’ira’a o te Fa’aho’i-fa’ahou-ra’a mai.²⁴

’Oia mau, i te vāhi ’ua hōro’ahia te hō’ē ture, i te vāhi ’aita tātou i ’ite i te hina’aro o te Atua, e hōpoi’a ïa tā tātou i reira. Mai tā te Ari’i Beniamina i ha’apāpū mai : « ’Atae ho’i ’oia tei ’ite ē, ’ua mārō ’oia i te Atua ! E ’ore ho’i e tae te ora i taua ta’ata ra, maori rā nā roto i te tātarahapa ’e te fa’aro’o i te Fatu ra ia Iesu Mesia ».²⁵

E parau maita’i ato’a teie nō te ha’api’ira’a tumu a te Mesia. E’ita te Fa’aora e fa’aora noa ’e e fa’aho’i noa ia rātou ’o tē rave i te hara ma te ’ite ’ore, terā rā, nō te feiā e rave i te hara i te māramarama, e hōro’a ato’a te Fa’aora i te fa’aorara’a, ’ia tātarahapa rā ’e ’ia fa’aro’o rātou iāna.²⁶

Pāpū ē, ’ua ha’amana’o o Alama i teie nā parau tumu. E fāri’i mau ānei ’o Alama i te mea tāna e parau nei ē, « te ’oa’oa… maita’i »²⁷ ’āhiri ’oia i feruri ē, ’ua fa’aora te Mesia iāna, terā rā ’ua vaiiho pēpē noa e a muri noa atu ia rātou tāna i ruri ’ē atu i te parau mau ? Pāpū roa ē, e’ita. Nō te fāri’i ’o Alama i te hau hope roa, e mea ti’a ïa i te feiā tāna i ha’apēpē ’ia fāri’i ato’a i te rāve’a e ora ai rātou.

Terā rā, nāhea mau rātou—’aore rā, rātou tā tātou i ha’apēpē—i te fa’aorahia ? Noa atu ē, ’aita tātou i hāro’aro’a hope roa i te fa’anahora’a mo’a e fa’aora ai ’e e fa’ati’a ai te tusia tāra’ehara a te Fa’aora, ’ua ’ite tātou ē, nō te ha’apāpū i te hō’ē ha’avāra’a ti’a, e tāmā te Fa’aora i te mau uru rā’au o te ’ite ’ore ’e i te mau tātaramoa māuiui o te mau pēpē tā vetahi ’ē i fa’atupu.²⁸ Nā roto i te reira e ha’apāpū ’oia ē, e hōro’ahia i te mau tamari’i ato’a a te Atua i te rāve’a, ma te hō’ē ’itera’a māramarama, nō te mā’iti ’ia pe’e iāna ’e ’ia fāri’i i te fa’anahora’a rahi o te ’oa’oa.²⁹

Nā teie mau parau mau i hōro’a i te hau ia Alama. ’E nā teie ato’a mau parau mau e hōro’a ato’a mai ia tātou i te hau rahi. ’Ei mau tāne ’e ’ei mau vahine nō te tino nei, e tito ri’i tātou, ’aore rā, i te tahi taime, e tupu te tama’i rahi i rotopū ia tātou, ’e e pēpē roa tātou. E nehenehe te mau huru metua ato’a e fa’a’ite pāpū ē, te māuiui tā tā tātou mau hape e fa’atupu, e ’ere ïa i te mata’u-noa-ra’a i tō tātou iho fa’autu’ara’a, te mata’u ato’a rā ē, ’ua fa’aiti paha tātou i te ’oa’oa o tā tātou mau tamari’i, ’aore rā, ua tāpe’a paha tātou ia rātou ’ia ’ite ’e ia hāro’aro’a i te parau mau. Te fafaura’a hanahana o te tusia tāra’ehara a te Fa’aora, ’oia ho’i, nō ni’a i tā tātou mau hape ’ei mau metua, e’ita ’oia e fa’ahapa i tā tātou mau tamari’i, ’e tē fafau nei ’oia ’ia fa’aora ia rātou.³⁰ ’E noa atu ē, ’ua hara rātou i mua i te māramarama—mai ia tātou pā’āto’a e nā reira nei—’ua mahora noa tōna rima aroha³¹ ’e e fa’aora ’oia ia rātou mai te mea ē, e fāriu rātou i ni’a iāna ’e ’a ora ai.³²

Noa atu ē, e mana tō te Fa’aora nō te fa’a’āfaro i te mea e’ita e nehenehe ia tātou ia tātā’i, tē fa’aue mai nei ’oia ia tātou ’ia ’imi i te mau rāve’a ato’a nō te fa’ariro i te fa’aho’ira’a ’ei tuha’a nō tā ’outou tātarahapara’a.³³ ’Aita tā tātou mau hara ’e tā tātou mau hapehape e taui noa i tō tātou autā’atira’a ’e te Atua, e taui ato’a rā i tō tātou autā’atira’a ’e o vetahi ’ē. I te tahi taime, e mea ’ōhie roa te ’ohipa e tītauhia ia tātou nō te fa’aora ’e nō te fa’aho’i, te tahi noa parau tātarahapa, terā rā, i te tahi atu taime, e nehenehe te fa’aho’ira’a ’e tītau e rave rahi matahiti tauto’ora’a nā roto i te ha’eha’a.³⁴ Noa atu rā i te reira, nō tē tahi mau hara ’e te mau hapehape e rave rahi tā tātou, ’aita e ti’a ia tātou ’ia fa’aora hope roa i te feiā tā tātou i ha’apēpē. Te fafaura’a nehenehe a te Buka a Moromona ’e a te ’evanelia i fa’aho’ihia mai, ’o tē hōro’a mai i te hau, teie ïa, ’oia ho’i, e fa’a’āfaro te Fa’aora i te mau mea ato’a tā tātou i ’ōfati.³⁵ ’E e fa’a’āfaro ato’a ’oia ia tātou mai te mea ē, e fāriu atu tātou i ni’a iāna ma te fa’aro’o ’e te tātarahapa i te ’ino tā tātou i fa’atupu.³⁶ Tē hōro’a mai nei ’oia i teie nā tao’a hōro’a e piti nō te mea tē here nei ’oia ia tātou pā’āto’a i te hō’ē here maita’i hope³⁷ ’e nō te mea ’ua hina’aro ’oia e ha’apāpū i te hō’ē ha’avāra’a parauti’a o te fa’atura i te parauti’a ’e i te aroha. Tē fa’a’ite pāpū nei au ē, e parau mau teie nā roto i te i’oa o Iesu Mesia ra, ’āmene.