Lako Mai vei Karisito—Bula vaka Yalododonu Edaidai

Vinaka vakalevu, Elder Soares, na nomuni ivakadinadina mana ka vakaparofita ni iVola i Momani. Ena dua na gauna sa qai oti ga oqo, a noqu na madigi vakamarerqeti meu tara e dua na draunipepa ni ivola taumada ni iVola i Momani. Ena tabanivola vakatabakidua oqo, ena matai ni gauna ena tabagauna oqo, a volai tu kina na veivosa qaqa oqo i Nifai, “Au na lako ka kitaka na ka sa vakarota na Turaga, ni’u kila ni sega ni dau soli ivakaro na Turaga vei ira na luve ni tamata vakavo kevaka e sa vakarautaka rawa mada na sala me ra rawata kina na ka sa vakarota vei ira ko koya.”¹

iVakatakilakila

Na draunipepa ni iVola i Momani ena ituvaki Taumada

Niu taura tu na draunipepa oqo, au a vakasinaiti ena marau cecekia ena vuku ni veika ea vakayacora na gonetagane yabaki 23 oqo o Josefa Simici, ka a vakadewataka na iVola i Momani ena “isolisoli kei na kaukauwa ni Kalou.”² Au vakavinavinakataka talega na vosa i tagane gone ko Nifai, ka a kerei me vakayacora e dua na itavi dredre ena rawati ni peleti parasa mai vei Lepani.

Sa kila tu o Nifai ni kevaka me na tomana tikoga na nona vakanamata kivua na Turaga, ena qaqa o koya ena vakataucokotaki ni vakaro oqo. A dei tu na vakanamata i Nifai kivua na iVakabula ena nona bula taucoko dina ga ni a sotava na veitemaki, bolebole vakayago, kei na veivakacacani mai vei iratou e so na nona matavuvale.

Sa kila deivaki tu o Nifai o Koya me vakararavi kina.³ Ni tukuna oti tu “A tamata vakaloloma dina koi au! Io, sa rarawa na yaloqu ena vuku ni noqu itovo vakayago,”⁴ a vakadeitaka o Nifai, “Sa dau totaki au na noqu Kalou; sa tuberi au ena noqu rarawa mai na loma ni lekutu; ka a maroroi au mai na wasaliwa titobu.”⁵.

Me vaka ni da sa dau muria na Karisito, eda sa sega ni vakuwai mai na bolebole kei na dredre eso ni noda bula. Sa dau gadrevi tu meda cakava na ka dredre eso ia kevaka eda qarava duadua ga ena veivakadrukai ka tawarawa vakaidina. Ni da ciqoma na veisureti ni iVakabula meda “lako mai kivei au,” ⁶ena vakarautaka o Koya na veitokoni, lomavinaka, kei na vakacegu e veiganiti. Ena noda veivakatovolei bibi sara mada ga, sa rawa ni da vakila na veicuqeni totoka ni Nona loloma ni da vakararavi Vua ka vakadonuya na Lomana. Sa rawa ni da vakila na reki e vakarautaki tu vei ira na Nona tisaipeli yalodina, ni sai Karisito na reki.”⁷

Ena 2014, niu veiliutaki tiko ena dua na tabana ni kaulotu, a sotakaya na noqu matavuvale e dua na ituvaki veisau tawanamaki. Ni vakasisisi sobu voli ena dua na vanua cecere, a lutu na luvei keirau gonetagane duadua ka sotava e dua na mavoa vakarerevaki ki na nona mona. Ni torosobu tikoga na ituvaki ni nona bula, era a maqusa na vakailesilesi ni bula mera qarava sara na veisele.

A tekiduru na neitou matavuvale ena fuloa ni rumu ni valenibula lala, ka keitou sovaraka na lomai keitou kivua na Kalou. Ena loma ni gauna drakidrakita ka mosimosi oqo, keitou a vakasinaiti ena loloma kei na vakacegu ni Tamada Vakalomalagi.

Keitou sega tu ni kila na cava e sa tu mai liu se keirau na raica bula tale na neirau gonetagane. Sa matata tu vei keitou ni sa tiko na nona bula ena liga ni Kalou kei na kena macala, ena dua na rai tawamudu, ena vakavotukana sara vei koya kei keitou talega. Mai na isolisoli ni Yalotabu, keitou a tu vakarau me keitou na ciqoma se cavaga na kena macala.

E a sega ni ka rawarawa! E vakavuna na vakacala ka oqo me rua na vula na tiko i valenibula ena gauna vata oya keirau veiliutaki tiko vei ira e sivia ni 400 na daukaulotu. A sotava na luvei keirau e dua na yali ni vakasama bibi. Na nona sasaga bula e oka kina e dua na dredre balavu ni vakaukauwa yago, vosa, kei na qaravitavi eso. Ea tiko voli ga na vei bolebole eso, ia ni toso tiko na gauna keitou sa vakadinadinataka na caka mana.

Keitou kila tu vakamatata ni vei bolebole eso eda na sotava ena sega ni vakavotukana me vaka na noda gagadre. Ia, ni da vakanamata tu ga vei Karisito, eda na vakacegui ka raica na caka mana ni Kalou, se cava ga na kena ituvaki, ena Nona gauna kei na Nona sala.

Ena tiko na gauna eso eda na sega ni raica rawa ni na cava vinaka e dua na ituvaki ni gauna oqo ka na rawa ni da tukuna sara, vakataki Nifai, “Sa rarawa na yaloqu ena vuku ni noqu itovo.”⁸ Ena rairai tiko na gauna eso esa na noda inuinui duadua ga kina o Jisu Karisito. Sa dua dina na veivakalougatataki ni tiko na inuinui oya ka meda vakararavi Vua. Sai Karisito duadua ga ena vakayacora na Nona yalayala. Sa vakadeitaki tu na Nona vakacegu kivei ira kece ka lako mai Vua.⁹

Era sa gadreva vakalevu tu na noda iliuliu meda vakila kece na vakacegu kei na lomavinaka e basika mai na noda vakararavi kei na noda vakanamata kivua na iVakabula o Jisu Karisito.

Ena nona vosa isogo ni soqoni ena imatai ni nona koniferedi raraba vaka-Peresitedi ni Lotu, a kaya kina vakamatata o Peresitedi Nelson, “Na noda itukutuku ki vuravura e rawarawa ka lomadina: eda sureti ira na luvena kece na Kalou ena yasa ruarua ni ilati me ra lako mai vua na iVakabula, ciqoma na veivakalougatataki ni valetabu savasava, taukena na reki tudei, ka vakadonui ki na bula tawamudu.”¹⁰

Na veisureti oqo meda “lako mai kivei Karisito” esa vakatabakidua tu kivei ira na Yalododonu Edaidai.¹¹ Me vaka ni da lewe ni Lotu ni iVakabula, eda sa vakayaco veiyalayalati vata kei Koya ka yaco meda sa Luvena tagane kei na yalewa vakayalo.¹² Sa noda talega na madigi meda cakacaka vata kei na Turaga ena nodra sureti o ira e so mera lako mai kivei Koya.

Ni da cakacaka vata kei Karisito, sa dodonu me vakanamata sara vakabibi na noda sasaga ki na noda dui itikotiko. Ena tiko na gauna eso era na sotavi bolebole kina na lewe ni matavuvale kei na itokani voleka. Na domo eso ni vuravura, ka vakakina na nodra dui gagadre, ena rawa ni vakavuna mera yalo tarotaro taka na dina. Sa dodonu meda vakayacora na veika me na vukea kina na nodra vakila ruarua na loloma ni iVakabula kei na noda loloma. Au vakananuma mai na serenilotu “Dou Veilomani” e vakatavulici keda, “E vaka oqo dou noqu tisaipeli ni dou sa veilomani tiko.”¹³

Ni da lomani ira tu na vaqaqa voli na dina, na meca ni reki kecega ena rawa ni vakavuna meda nanuma ni da sa biuta ira sobu o ira eda lomana kevaka eda tomana tikoga na noda bulataka vakataucoko voli na kosipeli ka vakatavulica na kedra dina.

Na noda sasaga ni vakayarayarataki ira na tani mera lako mai vei Karisito se lesu vei Karisito ena vakatakilai vakalevu ena noda yalayala meda na tikoga ena salatu ni veiyalayalati.

Ke sa noda gagadre dina meda na vueti ira eda lomana, sa dodonu meda vakadeitaki keda taumada vei Karisito ena tauri matua ni Nona Lotu kei na taucoko ni Nona kosipeli.

Ni lesuvi tale na italanoa kei Nifai, eda kila ni gagadre nei Nifai me vakararavi vua na Turaga ea vu talega mai na nodrau dau vakararavi vakatabakidua ki vua na Turaga o irau na nona itubutubu kei na nodrau ivakaraitaki ni dau muri-veiyalayalati. Oqo e vakatakilai vakavinaka sara ena raivotu ni vunikau ni bula nei Liai. Ni kania oti tu na vuanikau kamikamica ka rekitaki, “sa veiraiyaki vakavolivoliti [koya], de na rawa [ni] bau raici iratou talega na [nona] vuvale” o Liai.¹⁴ E a raici Seraia, Semi, kei Nifai ni ratou duri tu “ka vaka me ratou sega ni kila na vanua me ratou lako kina.”¹⁵ A qai tukuna o Liai, “Au sa yalovi iratou; kau a kaya talega yani vei iratou ena domo levu me ratou lako mai vei au, ka mai kania na vuanikau.”¹⁶ Nanuma matua toka ni a sega ni biuta na vunikau ni bula o Liai. A tiko vakayalo o koya kei na Turaga ka sureti iratou na nona matavuvale me ratou lako mai ki na vanua e tiko kina o koya me kania kina na vuanikau.

Na vunica ena lawakitaka eso mera biuta na rekitaki ni kosipeli ena kena vakaduiduitaki na ivakavuvuli i Karisito kei na Nona Lotu. Ena saga o koya meda vakadinata ni sa rawa meda toka dei vakaikeda ena salatu ni veiyalayalati, ena noda dui bula vakayalo, ka tuvakai koya mai na Nona Lotu.

Ena veisiga e muri oqo, sa vakalesui mai na Lotu i Karisito me rawa ni vukei ira na luve ni veiyalayalati i Karisito mera toka ga ena salatu ni Nona veiyalayalati.

Ena Vunau kei na Veiyalayalati eda wilika, “Raica, oqo na noqu ivunau—ko koya sa veivutuni ka lako mai vei au, sai koya nalewe ni noqu lotu.”¹⁷

Ena vuku ni Lotu i Karisito e vuravura, eda sa vakaqaqacotaki ena veika e sotavi vaka mataisoqosoqo ni Yalododonu. Eda rogoca na Domona mai vei ira na Nona parofita, daurairai, kei na dauvakatakila. Vakabibi sara, sa soli vei keda ena Nona lotu na veivakalougatataki veiganiti ni Veisorovaki i Karisito e rawa ni vakilai duadua ga ena qaravi tavi ni cakacaka tabu vakalotu eso.

Na Lotu i Jisu Karisito ni Yalododonu Edaidai esa Lotu i Karisito e vuravura, sa vakalesui mai ena veisiga e muri oqo me yaga ki na luvena taucoko na Kalou.

Au vakadinadinataka ni da sa “lako mai kivei Karisito” ka bula vaka Yalododonu Edaidai, eda na vakalougatataki ena Nona loloma vaikuritaki, Nona reki, kei na Nona vakacegu. Me vakai Nifai, sa rawa ni da vakayacora na vei ka dredre eso ka vukei tale eso mera cakava vakakina, baleta ni da sa kila o cei eda rawa ni vakararavi kina.¹⁸ O Karisito sa noda rarama, noda bula, ka noda dauniveivakabulai.¹⁹ Ena yacai Jisu Karisito, emeni.