Me Ra Raica
Vakasaqara ka masuta na madigi mo caudreva na nomu rarama vei ira na tani me ra raica na sala kivei Jisu Karisito.
Kemuni na taciqu kei na ganequ, sa vakalougatataki na yaloda ka vakavoui mai na Yalo eda sa vakila ena koniferedi oqo.
Rua na drau na yabaki sa oti, e cila mai e dua na rarama vua e dua na cauravou ena dua na veikau. Ena rarama oqori, a raica kina o Josefa Simici na Kalou na Tamada kei Na Luvena, o Jisu Karisito. E biliga vakatikitiki na butobuto vakayalo e ubia tu na vuravura ka qai dusimaka yani na sala vei Josefa Simici—kei keda kece sara. Baleta na rarama e vakaraitaki ena siga oya, eda rawa ni ciqoma na taucoko ni veivakalougatataki e na vuku ni Veisorovaki ni noda iVakabula, o Jisu Karisito.
Mai na savasava ni Veivakalesui mai ni Nona kosipeli, e rawa ni da vakasinaiti ena rarama ni iVakabula. Ia, na rarama oqori e sega walega ni baleti iko kei au. Sa vakarota o Jisu Karisito vei keda “o koya, me caudre vakakina na nomudou rarama e matadra na tamata oqo, me ra raica na nomudou ivalavala vinaka ka vakalagilagia na Tamamudou sa tiko mai lomalagi.”1 Au sa mai taleitaka na malanivosa “me ra raica.” E baleta tiko e dua na veisureti yalodina mai vua na Turaga meda gu dei vakalevu cake ena noda vukei ira na tani me ra raica na salatu ka rawa ni ra lako mai kina vei Karisito.
Niu se yabaki 10, e neitou na madigi me mai neitou vulagi o Elder L. Tom Perry ena Kuoramu ni iApositolo Le Tinikarua ni lako tiko mai ena dua na ilesilesi ki neitou tauni.
Ni mai cava na siga oya, keitou mai dabe vakamatavuvale vata keirau na veiwatini na Perry ena neitou loma ni vale me keitou veiwaseitaka na pie apolo ka cakava o tinaqu, ka mai talanoataka eso na italanoa baleti ira na Yalododonu e veiyasai vuravura o Elder Perry. Au a kurabui.
Sa totolo sara tiko mai na buto ka qai kacivi au ki valenikuro ko tinaqu ka tarogi au ena dua na taro rawarawa: “Bonnie, o sa vakania na toa?”
Au lomabibi; e se bera. Niu sega ni via biuta na yasana e dua na iApositolo ni Turaga, au vakatututaka ni rawa ni lolo na toa me yacova na mataka.
E sauma mai na tinaqu ka vaka e “sega.” Ena gauna oya, sa curu yani o Elder Perry ki valenikoro ena yalo marau, kei na domo makutu, “Au rogoca beka ni dodonu e dua me vakania na toa? E rawa beka ni keirau veitomani kei luvequ tagane?”
Sa dua dina na ka taleitaki qo me vakani na toa! Au cici yani meu kauta mai na neitou cina livaliva dromodromo levu. Ena marau, au liutaki keitou yani ki tuba, niu veiladeyaki ena gaunisala makawa ki na vale ni toa. Ni veimoiyaki e ligaqu na cinalivaliva, keitou takosova yani na veisila ka curuma yani na loga ni veiwiti.
Niu yaco yani ki na sala ni wai lailai ni teitei ka takosova tu na gaunisala, au lade takosova yani me vaka ga au sa dau cakava tu ena vuqa na veibogi sa oti. Au sega mada niu vakila tu na sasaga nei Elder Perry me toboki au ena butobuto, ena gaunisala ka sega tu ni kila. Na noqu cina ka veimoiyaki tu e sega sara ni vukei koya me raica na sala ni wai. Ni sega tu na cina me raica vinaka kina nona gaunisala, e butu sara ga yani ki na ikeli wai ka kaila. Ena taqaya, au vuki mai ka raica na noqu itokani vou ena nona sa dreta tiko mai na yavana ena loma ni keli wai ka kureitaka tiko na wai mai na nona i vava leca bibi.
Ni bibi tu na nona i vava baleta ni sa suasua, sa vukei au o Elder Perry meu vakania na toa. Ena gauna keitou sa oti kina, sa qai kerekere ena loloma, “Bonnie, au gadreva meu raica na gaunisala. Au gadreva na cina me cinavi ena vanua au taubale tiko kina.
Au a cilava tiko na noqu rarama ia e segai e na sala e rawa ni vukei Elder Perry kina. Oqo, noqu kila ni sa gadreva o koya na cina me rawa ni raica vinaka na gaunisala, au sa cinava tikoga na cina ena veivanua me raica o koya ka keitou yaco rawa yani ki vale ena nuidei.
Kemuni na taciqu kei na ganequ, e yabaki vuqa noqu sa vakasamataka vakatitobu na ivakavuvuli au vulica mai vei Elder Perry. Na veisureti ni noda Turaga meda vakacaudretaka na nodra rarama e sega walega ni noda veimoiyaka tu yani na rarama ka vakavuna tu me rarama vakarabailevu tu ko vuravura. E baleta tiko na kena cinavi vakamatau na rarama oqori vei ira na tani me rawa ni ra raica na sala vei Karisito. Sai koya na vakasokumuni i Isireli ena yasa ruarua ni ilati—na nodra vukei na tani me ra raica na ikalawa ki liu ena vakayacori kei na maroroi ni veiyalayalati ni Kalou.2
Sa cauraka na iVakabula, “Raica koi Au na rarama; Au sa biuta vei kemudou e dua na ivakarau mo dou muria.”3 Meda raica mada e dua na Nona ivakaraitaki.
Na marama ni Samaria ena ikeli wai e sega ni kilai Jisu Karisito ka raici mai vei ira na lewevuqa me sega ni wili ena nona vanua. E sotavi koya ko Jisu ka vakavuna me rau veitalanoa. E tukuna o Koya vua me baleta na wai. Sa qai vakararamataki koya vakalevu cake ena Nona qai vakaraitaki Koya ni sa “wai ni bula.”4
E kilai koya tu ena yalololoma o Karisito kei na veika e gadreva. E sotava na marama oqo ena vanua e tu kina ka tekivu vosa vua me baleta na veika e kilai levu tu. Kevaka e yala ga ekea, ke a dua na gauna vinaka. Ia, ke a sega ni vakavuna na nona lako yani ki na koro, “Dou mai bau laki raica … : sai koya oqo na Karisito, se segai?”5 Vakamalua mai, ena nodrau veitalanoa, sa qai kilai Jisu Karisito mai na marama oqo, e dina ga ni cala tu mai ena veigauna sa oti, e yaco me iyaragi ni rarama, me vakararamataki na sala vei ira na so tale me ra raica.6
Meda raica mada e rua na tamata ka vakamuria na ivakaraitaki ni iVakabula ena veiwaseitaki ni rarama. Dua na gauna sa oti, e dabe tiko na noqu itokani o Kevin e yasana e dua na daunibisinisi ena gauna ni vakayakavi. E leqataka o koya na veika me veitalanoataka me rua na auwa. Ni vakamuri tiko na veivakauqeti, e taroga o Kevin, “Tukuna vei au me baleta nomu matavuvale. Era lako beka mai vei?
E lailai sara na ka e kila na turaga oqo me baleta na vanua e lako mai kina, sa taura sara mai o Kevin na nona talevoni, ka kaya, “E tiko qo e dua na app e rawa ni semati ira na tamata ki na nodra vuvale. Daru raica mada na cava e rawa ni caka.”
Ena dua na veitalanoa balavu, e taroga na itokani vou nei Kevin, “Na cava sa rui bibi kina na vuvale ki na nomu lotu?”
E sauma o Kevina, “Keimami vakabauta ni da na bula tiko ni oti na mate. Ni da vasaqarai ira na noda qase eliu ka kauta na yacadra ki na dua na vanua tabu e vakatokai na valetabu, e rawa ni vakayacori na cakacaka vakalotu ni vakamau ka na kauta vata mai na noda matavuvale ni oti na mate.”7
E tekivu o Kevin ena dua na ka e rau taleitaka vata kei na nona itokani vou. Sa qai kunea o koya na sala me vakadinadinataka na loloma kei na rarama ni iVakabula.
Na karua ni talanoa e baleti Ella, e dua na dau qito basketball ena koliji. E tekivu na nona ivakaraitaki ena nona ciqoma nona veikacivi ni kaulotu ena nona lako tu vakavuli. E digia o koya me dolava na nona veikacivi kei na nona timi. Era sega saraga ni kila tu e dua na ka baleta na Lotu i Jisu Karisito ka sega ni kila vinaka se cava na ibalebale ni gagadre nei Ella me veiqaravi. E masu vakawasoma me kila na sala me rawa ni vakamacalataka kina na nona veikacivi ni kaulotu vei ira nona lewe ni timi me rawa ni ra vakila na Yalotabu. Nona isau ni taro?
“Au a cakava e dua na PowerPoint,” e kaya o Ella, “baleta ga niu sa rui wananavu.” E tukuna o koya me baleta na nona rawa ni veiqaravi ena dua vei ira na 400-vakacaca na tabana ni kaulotu kei na nona rawa ni vulica e dua na vosa vou. E vakamacalataka talega o koya na udolu vakaudolu na daukaulotu era sa veiqaravi tiko. Sa qai tinia o Ella ena dua na itaba ni iVakabula kei na ivakadinadina lekaleka: “Na basketball e dua vei ira na ka bibi ena noqu bula. Au toki mai ki na yasa oqo ni noda vanua kau biuta tu yani noqu matavuvale meu mai qito vua na dauniveivakavulici kei na timi oqo. Oi rau na ka e bibi cake vei au mai na basketball sai koya na noqu vakabauta kei na noqu vuvale.”8
Oqo, kevaka o ni vakasamataka tiko, “Oqo na ivakaraitaki talei ni 1,000 na-watt, ia, o au edua ga na mata ni cina 20 na-watt,” nanuma ni vakadinadinataka na iVakabula, “Raica sai Au ga na rarama mo ni dulaka cake.”9 E vakananuma o Koya vei keda ni na kauta mai o Koya na rarama kevaka eda na dusimaki ira na tani Vua.
E tiko vei kedaru na rarama me wasei ena gauna sara ga oqo. E rawa ni da vakararamataka na ikalawa ka tarava me vukea e dua me toro voleka vei Jisu Karisito, kei na ikalawa tale ka tarava, ka lako yani.
Taroga mada vei iko, “Ocei e gadreva na rarama e tiko vei iko me kunea na sala era gadreva ia era sega ni raica rawa?”
Kemuni na noqu itokani lomani, na cava e sa rui bibi kina meda vakararamataka na noda rarama? E tukuna vei keda na Turaga “era sa lewe vuqa sara … e vuravura, era sa sega ni kila rawa na ka dina, ni ra sa sega ni kila na vanua me ra vakasaqara kina.”10 E rawa ni da veivuke. E rawa ni da vakacaudre taka na noda rarama me rawa ni ra raica mai na tani. E rawa ni da veisureti yani.11 E rawa ni da taubale vata kei ira na lako tiko ena ilakolako ki vua na iVakabula, se vakacava sara na kena tatao. E rawa ni da vakasokumuni Isireli.
Au vakadinadinataka ni na vakalevulevuya na noda sasaga lalai kece sara na Turaga. Ena vakauqeti keda na Yalo Tabu meda kila na veika meda cakava ka tukuna. Na veisasaga oqori ena rawa ni vakavuna me da butu tani mai na noda veivanua logaloga vinaka, ia, e rawa ni da nuidei tiko ni na vukei keda na Turaga me caudre noda rarama.
Sa ka levu na noqu vakavinavinakataka na nona rarama na iVakabula, ka liutaka tiko na Lotu ena ivakatakila.
Au sureti keda kece meda vakamuria na ivakaraitaki nei Jisu Karisito ka meda qarauni ira na tiko wavoliti keda ena yalo loloma. Vakasaqara ka masuta na madigi mo caudreva na nomu rarama vei ira na tani me ra raica na sala kivei Jisu Karisito. A yalataka ko Koya: “Ko koya sa muri au ena sega ni lako ena butobuto, ena tu ga vua na rarama ni bula.”12 Au vakadinadinataka na noda iVakabula, o Jisu Karisito, e sala, vunidina, vunibula, rarama, kei na loloma kei vuravura. Ena yacai Jisu Karisito, emeni.