Elder Adeyinka A. Ojediran

Na koniferedi raraba ni Epereli 2020 a “dua na mua ni macawa guiguilecavi dredre” vei Elder Adeyinka A. Ojediran.

A tokoni kina na lewenilotu curuvou oqo me Vakaitutu Raraba ena Vitusagavulu—a imatai ni kai Nigeria kei na Yalododonu Edaidai mai na Ra kei Aferika. Na nona vakavinavinaka kei na reki cecekia a qai tubu cake sara ni kacivaka o Peresitedi Russell M. Nelson na ikatolu ni valetabu e Nigeria me na tara ena Siti o Benin.

“Au a sega ni namaka oya,” a kaya o Elder Ojediran, ena matadredredre. “Meda rogoca ni kaya na noda parofita ni na tara e dua tale na valetabu e Nigeria, sa bau totoka dina sara. Vei au, e sa dua na veivakadeitaki ni sa toso totolo sara tiko na cakacaka ni Turaga. Sa tu taucoko na noda itavi e vuqa mera vakarautaki na luve ni Kalou me baleta na iKarua ni Lesu Mai ni Luvena.”

A sucu o Adeyinka Ayodeji Ojediran e Ibadan, Nigeria, enai ka 5 ni Epereli, 1967, vei Amos Adeniyi kei Caroline Anike Ojediran, ka ciqoma e dua na koroi ni bejila ni veikau ena Univesiti ni Ilorin ena 1991 ni bera ni qai rawata na koroi ni masita ni veiliutaki vakabisinisi mai na Univesiti ni Tekinoloji e Ladoke Akintola. A cicivaka o koya e dua na cakacaka ena veika vakailavo kei na veiliutaki vakabisinisi vaka dua na daunilavo ka kenadau sara. A cakacaka voli vaka dua na manidia ni veika vakailavo ni bisinisi ni Shell Nigeria ni bera nona kacivi me dua na Vakaitutu Raraba.

Ni oti e tolu na yabaki ena nona papitaiso, a sotavi Olufunmilayo Omolola Akinbebije o koya ena dua na soqo ni bula veimaliwai. Erau a mani tekivu veitau sara, ia na cakacaka ena siti e duidui a vakavuna me “keirau veitaratara ga ena talevoni.”

Erau a qai mani vakamau e Nigeria ena 1998 ka a vauci vata ena Valetabu e Johannesburg Ceva kei Aferika e nai ka 14 ni Noveba, 2002. E dua na luvedrau yalewa o rau na Ojediran.

E vakavinavinakataka o Elder Ojediran na veikacivi kece ena Lotu a ciqoma o koya mai na gauna a lewena kina na Lotu ena 1990 ni sa yabaki 23 o koya. Na veilesilesi vakalotu yadua e sa vukei koya me tubu cake ka sa solia vua na madigi vakalou me vukei ira tale eso mera toro cake ena nodra dui veikacivi kei na itavi.

O Elder Ojediran, ka a veiqaravi voli vaka-Vitusagavulu ni iWasewase ena gauna a kacivi kina, a veiqaravi talega vaka dua na daunivakasala ena dua na mataveiliutaki ni tabana ni kaulotu, peresitedi ni iteki, daunivakasala ena dua na mataveiliutaki ni iteki, bisopi, daunivakasala ena matabisopi, ka peresitedi ni tabana.