Elder Jeremy R. Jaggi

Ni a yabaki tinivakacaca voli o Elder Jeremy R. Jaggi, na ganena yabaki vitu, o Kristen, a tauva e dua na manumanu ni mate ka tara sara na nona mona. A kaya na vuniwai ni na sega ni bula rawa o koya.

A tekiduru o Jeremy gone ena yasa ni nona imocemoce ena nodratou itikotiko vakamatavuvale e Salt Lake City, Utah, Amerika, ka kerea vua na Turaga me kila na cava na vuna me mate kina o koya ni se gone sara. Ia, a ciqoma e dua na veivakalougatataki ni matabete o ganena, ka qai bula.

Oqori a veimuataki vei Jeremy yabaki 17 me “tu vakadodonu kei na Kalou,” ka liutaki koya me wilika vagumatua na iVola i Momani ena imatai ni gauna. E muri a veiqaravi o koya vakadaukaulotu tudei ena Tabana ni Kaulotu e Ohio Cleveland.

A lesu kina tekiduru ena masu o Jeremy mai vu ni yalona ena vica na yabaki e muri me vaka ni a tiko bibi sara na watina o Amy, ena ikatolu ni luvedrau. “Ena gauna o ya, au a vakila e dua na vakacegu levu—e dua na vakacegu ka rawa ni vakamacalataki ga me liga loloma ni Tamada Vakalomalagi e ovici au vata kei na katakata ni Yalo Tabu,” a kaya o koya.

Na vakacegu oya a tauri koya ena gauna lailai ga a bula tiko kina na gonelailai kei na vula vica ni lolosi ni oti e dua tale na vakasucu dole nei watina. “Eda sa vakatovolei kece ena noda sala,” a kaya o koya, “ia eda nanuma tikoga ‘me ka ni reki sara’ [Jemesa 1:2] ni sa vakarautaka na iVakabula e dua na sala meda rawata kina na vakacegu kei na marau.”

A sucu o Jeremy Robert Jaggi e Salt Lake City, Utah, Amerika, e nai ka 23 ni Maji, 1973, vei Robert Stanley Jaggi kei Judy Anne Roos. A vakamautaki Amy Anne Stewart o koya ena Valetabu e Salt Lake e nai ka 12 ni Jiune, 1995. Erau nodratou itubutubu e lima na gone.

E a ciqoma o Elder Jaggi e dua na koroi ni bejila ni vulici ni ivakarau kei na tiko bulabula mai na Univesiti ni Utah kei na dua na koroi cecere ni veiliutaki vakabisinisi mai na Pepperdine Univesiti. E a liutaka tiko o koya na tabana ni veivoli ni iwasewase ni Alkermes ka manidia vakabisinisi ni iyauqaqa ena kabani ni HCA ena gauna a kacivi kina.

Sa veiqaravi oti o Elder Jaggi vaka-Vitusagavulu ni iwasewase, peresitedi ni Tabana ni Kaulotu e Ogden Utah, ivukevuke ni sekeriteri liu ni iteki, bisopi, peresitedi ni kuoramu ni italatala qase, qasenivuli ni semineri, daunivakasala ena dua na mataveiliutaki ni cauravou ena tabanalevu, qasenivuli ni vakavakarau ki na kaulotu ena iteki, ka iliuliu ni kaulotu ni tabanalevu.