Melkesedek Prishud mo Ol Ki
Insaed long Jos, atoriti blong prishud, oli yusum anda long daereksen blong wan prishud lida we i stap holem ol ki blong prishud ia.
Mi jusum blong toktok moa long saed blong prishud blong God, topik ia we trifala spika i bin tijim yumi finis abaot wei we prishud i blesem laef blong ol woman, ol yang woman, mo ol yang man.
Prishud i wan tabu paoa, we God i givim wetem tras blong yusum blong wok blong God blong mekem gud long ol pikinini blong Hem. Prishud i no olgeta ia we oli odenem olgeta long wan ofis long prishud, o olgeta ia we oli stap yusum atoriti blong hem. Ol man we oli holem prishud, oli no prishud ia. Yumi no mas singaotem ol man we oli odenem olgeta se oli prishud, be i stret nomo blong talem se oli man we oli holem prishud.
Paoa blong prishud i stap insaed long tugeta ples ia, insaed long Jos mo insaed long famli oganaesesen. Be prishud paoa mo prishud atoriti i wok defren insaed long Jos mo i defren insaed long famli. Evri samting ia, folem ol prinsipol we Lod i bin stanemap. Stamba tingting blong plan blong God, i blong lidim ol pikinini blong Hem blong kasem laef we i no save finis. Ol famli long wol ia, oli impoten pat blong plan ia. Jos i stap blong givim doktrin, mo ol odinens we i nid blong mekem ol famli rilesensip oli kasem ol taem we i no save finis. Olsem ia nao, famli oganaesesen mo Jos Ia blong Jisas Kraes, oli gat rilesensip we i sapsapotem tufala. Ol blesing blong prishud—olsem gospel we i fulwan, mo ol odinens, olsem baptaes, konfemesen, mo fasin blong kasem presen we i Tabu Spirit, tempol endaomen, mo mared we i no save finis—oli stap blong ol man mo ol woman tu blong yusum.1
Prishud we yumi stap tokbaot long ples ia, i Melkesedek Prishud, we oli bin putumbak long stat blong Restoresen blong gospel. Josef Smit mo Oliva Kaodri, Pita, Jemes mo Jon nao oli bin odenem tufala, mo talemaot se tufala “i holem ol ki blong kingdom, mo blong dispensesen blong taem blong evri wok blong God i kamtru” (Doktrin mo Ol Kavenan 128:20). Olgeta senia Aposol ia, oli bin kasem atoriti ia we i kam long Sevya Hemwan. Evri nara atoriti o ofis insaed long prishud, oli hang long Melkesedek Prishud (luk long Doktrin mo Ol Kavenan 107:5), from se “Melkesedek Prishud i holem raet blong stap olsem wan presidensi, mo i gat paoa mo atoriti ova long evri ofis insaed long jos, hemia long eni taem blong wol ia, blong lidim ol samting long saed blong spirit” (Doktrin mo Ol Kavenan 107:8).
Insaed long Jos, atoriti ia blong prishud ia we i hae moa, Melkesedek Prishud, mo hemia blong prishud we i moa daon, o Aronik Prishud, oli yusum anda long daereksen blong wan prishud lida, olsem wan bisop o wan presiden, we i holem ol ki blong prishud ia. Blong andastanem praktis blong prishud atoriti insaed long Jos, yumi mas andastanem prinsipol ia blong ol ki blong prishud.
Ol Melkesedek Prishud ki blong kingdom, Pita, Jemes mo Jon nao oli givim i kam, be hemia i no bin ful kambak blong ol prishud ki. Sam ki blong prishud oli bin kam afta. Afta long dedikesen blong fas tempol long dispensesen ia long Ketlan, Ohaeo, ol trifala profet—Moses, Elaeas, mo Elaeja—oli putumbak “ol ki blong dispensesen ia,” we i tekem ol ki blong pulum Isrel i kam tugeta, mo wok blong ol tempol blong Lod (luk long Doktrin mo Ol Kavenan 110), olsem we Presiden Eyring i jes tokbaot wetem paoa blong winim tingting.
Eksampol we yumi save gud long saed blong wok blong ol ki ia, i stap long wok blong mekem ol prishud odinens. Wan odinens i wan tabu aksen we i soem se yumi mekem ol kavenan mo kasem promes blong kasem ol blesing. Insaed long Jos, evri odinens ia, oli stap mekem anda long raet blong prishud lida we i holem ol ki blong odinens ia.
Wan odinens, plante taem olgeta we oli mekem oli olgeta we oli odenem olgeta long wan ofis blong prishud we i stap mekem wok anda long daereksen blong wan we i holem ol prishud ki. Eksampol. Olgeta we oli holem wok long ol defren ofis blong Aronik Prishud, bae oli mekem wok blong odinens blong sakramen anda long ol ki mo daereksen blong bisop, we i holem ol ki blong Aronik Prishud. Semfala prinsipol ia, i go wetem ol prishud odinens we ol woman oli stap mekem insaed long tempol. I nomata se ol woman oli no holem wan ofis insaed long prishud, oli mekem ol tabu tempol odinens anda long raet blong presiden blong tempol, we i holem ol ki blong ol odinens blong tempol.
Wan nara eksampol blong prishud atoriti anda long daereksen blong wan we i holem ol ki, oli ol tijing blong ol man mo ol woman we oli singaotem olgeta blong tijim gospel, insaed long ol klas long hom wod blong olgeta, o long misin graon. Ol nara eksampol, oli olgeta we oli holem ol lidasip posisen insaed long wod, mo oli yusum prishud atoriti blong olgeta long lidasip blong olgeta folem ol koling blong olgeta, mo anda long wok blong setem apat man mo daereksen blong prishud lida ia we i holem ol ki insaed long wod o stek. Hemia nao hao oli yusum atoriti mo paoa blong prishud, mo hao pipol i kasem blesing insaed long Jos Ia blong Jisas Kraes blong Ol Lata-dei Sent.2
Prishud atoriti, oli stap yusum mo ol blesing oli kamtru insaed long ol famli blong ol Lata-dei Sent. Taem mi talem famli, mi minim wan man we i holem prishud mo wan woman we tufala i mared, wetem ol pikinini blong tufala. Mo tu, i tekem ol defren wan long ol gud rilesensip ia, olsem olgeta we oli olsem from wan ded o wan divos.
Prinsipol ia, se prishud atoriti, bae oli save yusum nomo anda long daereksen blong wan we i holem ol ki blong wok ia, i stamba fandesen insaed long Jos, be hem i no olsem insaed long famli. Eksampol: Wan papa we i holem prishud i prisaed mo yusum prishud insaed long famli blong hem tru long atoriti blong prishud we hem i stap holem. Hem i no nid blong gat daereksen o raet long wan we i holem ol ki blong prishud blong hem i mekem ol defren wok blong hem insaed long famli. Olgeta ia i tekem tu, blong stap givim kaonsel long ol memba blong famli blong hem, blong holem ol famli miting, o givim ol hiling blesing long ol memba blong famli o ol narawan.3 Ol atoriti blong Jos oli tijim ol memba blong famli, be oli no daerektem wok blong yusum prishud atoriti insaed long famli.
Semfala prinsipol ia, oli yusum tu taem wan papa i no stap mo mama i lida blong famli. Mama i prisaed long hom blong hem, mo i nambawan blong tekem paoa mo blesing blong prishud i kam insaed long famli blong hem tru long endaomen mo siling blong hem insaed long tempol. Hem i no gat raet blong givim ol prishud blesing, we wan we i holem wan ofis nomo long prishud i save givim, be hem i save mekem evri nara wok blong famli lidasip. Taem hem i mekem olsem, hem i stap yusum paoa blong prishud blong gud blong ol pikinini we hem i stap prisaed ova long olgeta long posisen blong hem olsem wan lida insaed long famli.4
Sapos ol papa oli ona mo wok strong long prishud blong olgeta insaed long famli blong olgetawan, bae i muvum misin blong Jos i semmak nomo olsem eni nara samting we oli save mekem. Ol papa we oli holem Melkesedek Prishud, oli mas yusum atoriti blong olgeta wetem “fasin blong winim tingting, fasin blong save wet long taem, kaen fasin mo tingting we i stap daon, mo tru mo stret lav” (Doktrin mo Ol Kavenan 121:41). Hae standet ia blong save yusum prishud atoriti i moa impoten insaed long famli. Olgeta we oli holem prishud, oli mas obei long ol komanmen blong mekem se oli gat paoa blong prishud blong givim ol blesing long ol memba blong famli blong olgeta. Oli mas gat, mo tijim blong gat ol famli rilesensip we i gat lav blong mekem se ol memba blong famli bae oli wantem askem blesing long olgeta. Ol papa mo mama oli mas leftemap tingting ia blong gat moa prishud blesing insaed long famli.5
Long ol konfrens miting ia, taem yumi stap lukaotem wan selta, blong sot taem, blong bigfala wari blong yumi from bigfala wol sik ia, oli bin tijim yumi ol bigfala prinsipol blong taem we i no save finis. Mi leftemap tingting blong wanwan long yumi i gat ae blong yumi “i lukluk nomo” blong kasem ol trutok ia blong taem we i no save finis, blong mekem se bodi blong yumi, “oli fulap long laet” (3 Nifae 13:22)
Long Tabu Tok blong Hem long ol grup blong ol pipol olsem we oli raetem insaed long Baebol, mo insaed long Buk blong Momon, Sevya i bin tijim se bodi blong yumi long wol ia, i save fulap long laet, o fulap long tudak. Yumi, i tru, i wantem se i fulap long laet, mo Sevya blong yumi i bin tijim yumi olsem wanem yumi save mekem hemia i hapen. Yumi mas lisin long ol mesej abaot ol trutok blong taem we i no save finis. Hem i yusum eksampol blong ae blong yumi, we tru long hem, yumi tekem laet i kam insaed long bodi blong yumi. Sapos “ae blong yumi i lukluk nomo”—o long nara toktok, sapos yumi stap putum evri tingting blong stap kasem laet mo andastanem we i no save finis—Hem i eksplenem se, “ful bodi blong yu bae i fulap wetem laet” (Matiu 6:22; 3 Nifae 13:22). Sapos “ae blong yu i nogud”—i minim se sapos yumi stap luk long ivel mo tekem kaen ia insaed long bodi blong yumi—Hem i givim woning: “laet we i stap insaed long yu i stap tudak” (ves 23). Long nara toktok, laet o tudak insaed long bodi blong yumi, i dipen long wei we yumi stap luk—o akseptem—ol trutok we oli no save finis, we oli stap tijim yumi long hem.
Yumi mas folem invitesen blong Sevya blong lukaotem mo askem blong andastanem ol trutok blong taem we i no save finis. Hem i promes se, Papa blong yumi long Heven i wantem blong tijim evriwan, ol trutok ia we oli stap lukaotem (luk long 3 Nifae 14:8). Sapos yumi wantem hemia, mo sapos ae blong yumi i lukluk nomo blong akseptem, ol promes blong Sevya i we, ol trutok blong taem we i no save finis “bae oli open” long yumi (luk long 3 Nifae 14: 7–8).
Long narasaed, Setan i wantem blong mekem tingting blong yumi i konfius, o i wantem lidim yumi go rong long saed blong ol impoten mata olsem ol wok blong prishud blong God. Sevya i givim woning abaot “ol giaman profet we oli kam long [yumi] long ol klos blong sipsip, be long insaed, oli ol wael dog stret” (3 Nifae 14:15). Hem i givim yumi tes ia blong helpem yumi jusum trutok long medel blong ol defren tijing we oli save mekem yumi konfius: Bae yufala i save olgeta tru long ol frut blong olgeta, Hem i tijim (3 Nifae 14:16). “Wan gudfala tri i no save karem ol rabis frut, mo tu, wan rabis tri i no save karem ol gudfala frut” (ves 18). From hemia, yumi mas luk long ol risal— “ol frut”—blong ol prinsipol we oli stap tijim mo ol profet we oli stap tijim olgeta. Hemia i bes ansa blong plante long ol samting we mifala i stap harem agensem Jos mo ol doktrin mo polisi mo lidasip blong hem. Folem tes we Sevya i bin tijim. Luk long ol frut—ol risal.
Taem yumi tingting long ol frut blong gospel, mo Jos Ia blong Jisas Kraes we i kambak, yumi stap glad long wei we Jos, long laef taem blong ol memba blong hem we oli stap laef, oli gro stat long ol lokol kongregesen long Maonten long Wes i go long ples we bigfala namba blong ol 16 milian memba blong hem oli stap long hem, long ol nesen we oli no long Yunaeted Stet. Wetem wan gro olsem, mifala i bin filim se i gat moa paoa blong Jos i helpem ol memba blong hem. Mifala i stap help blong obei ol komanmen, blong mekem ol responsabiliti blong prijim gospel we i kambak, blong pulum Isrel i kam tugeta, mo blong bildim ol tempol raon long wol.
Wan profet i stap lidim yumi, Presiden Russell M. Nelson, we lidasip blong hem, Lod i bin yusum blong mekem progres we yumi bin filim ova long tufala yia blong lidasip blong hem. Naoia, bae yumi gat blesing blong harem Presiden Nelson, we bae i tijim yumi hao blong mekem wok i go insaed long Jos Ia blong Jisas Kraes, we i bin kambak long ol taem ia blong jalenj.
Mi testifae long saed blong trutok blong ol samting ia mo joenem yufala blong prea from profet blong yumi we bae yumi harem afta, long nem blong Jisas Kraes, amen.