Serem mesej blong Restoresen mo Laef bakegen long Ded.

Truaot long Jeneral Konfrens ia yumi bin toktok mo singsing wetem glad se olfala profesi i hapen: “kambak blong evri samting,”¹ abaot karem i kam “tugeta evri samting long Kraes,”² abaot kambak blong ful gospel, prishud, mo Jos ia blong Jisas Kraes long wol ia, evri samting we i stap insaed long “Restoresen.”

Be Restoresen i no nomo blong olgeta long yumi we oli stap glad insaed long hem tedei. Revelesen blong Fas Visen i no bin blong Josef Smit hemwan be oli givim olsem laet mo trutok blong eniwan we i “nogat waes.”³ Buk blong Momon hem i propeti blong evri man. Ol prishud odinens blong fasin blong pemaot man mo kam olsem wan god, oli bin rere long hem blong evri man, mo tu olgeta we oli nomo stap long wol ia. Jos ia blong Jisas Kraes blong Ol Lata–dei Sent mo ol blesing blong hem, oli blong evriwan we oli wantem. Presen ia we i Tabu Spirit i blong evriwan. Restoresen i blong wol, mo mesej blong hem i gat bigfala nid long hem tudei.

“Taswe, hem i impoten tumas blong talem ol samting ia i go long evri man we oli stap laef long wol, blong mekem se oli mas save se i no gat wan bodi blong mit mo bun we i save stap wetem God, hemia nomo sapos i tru long ol gudfala wok, mo sore, mo gladhat blong Tabu Mesaea, we i givim laef blong hem long saed blong bodi blong mit mo bun, mo i tekembak bakegen tru long paoa blong Spirit, blong mekem se hem i save mekem laef bakegen blong ol dedman i hapen.”⁴

From long dei we brata blong Profet, Samuel Smit, i fulumap basket blong hem wetem ol niu kopi blong Buk blong Momon we oli jes printim mo i bin wokbaot blong serem ol niufala skripja, ol Sent oli no bin stop blong wok “blong letem ol man blong wol ia oli save long saed blong ol samting ia.”

Long 1920, Elda Deved O. MaKei blong Kworom blong Olgeta Twelef Aposol, i statem wan longfala yia tua blong ol misin blong Jos. Long Mei 1921, hem i bin stap stanap long wan smol simetri long Fagali’i, Samoa, long fored blong naes gref blong tri smol pikinini, gel mo tufala boe blong Tomas mo Sara Hilton. Ol smol wan ia—bigwan i gat tu yia—i bin ded taem Tomas mo Sara i bin stap wok olsem wan yang misinari kapol long ol yia eitin handred.

Bifo hem i aot long Yuta, Elda MaKei i promesem Sara, naoia wan wido, se bae hem i visitim gref blong ol pikinini blong hem long Samoa from se hem i no bin gat janis blong gobak longwe. Elda MaKei i bin raet i gobak long hem,“Ol trifala pikinini blong yu, Sista Hilton, long wan kwaet we i naes tumas … oli gohed long gudfala misinari wok blong yu we i bin stat kolosap teti yia i pas finis.” Afta hem i ademap wan ves we hem nomo i raetem:

Stori ia i wan long ol taosen, handred blong taosen, we i tokbaot taem ia, ol tresa, mo ol sakrifaes blong laef ova long ol las 200 yia blong serem mesej blong Restoresen. Tingting blong yumi blong kasem evri nesen, jeneresen, lanwis, mo pipol i no go daon tedei, olsem moa bitim 68,000 oli witnes long hem, yang man, woman, mo ol kapol we oli stap wok naoia olsem ol ful‑taem misin; oli ol memba blong Jos we oli folem invitesen blong Filip blong kam mo luk;⁶ mo tru ol milian dola we oli spendem evri yia blong helpem wok ia long wol.

Nomata se ol invitesen blong mifala i no fosem man, mifala i hop se bae ol man oli faenem i pulum tingting blong olgeta. Blong hemia i hapen, mi biliv se ol trifala samting ia i gat nid: faswan, lav blong yu; seken, eksampol blong yu; nambatri, yus blong yu long Buk blong Momon.

Invitesen blong yumi i no save stap olsem wan samting we i interes‑long yumiwan, be, oli mas stap olsem wan aksen blong lav blong yumiwan.⁷ Lav ia, oli save olsem jareti, stret lav blong Kraes, i blong yumi blong askem. Oli invaetem yumi, iven oli komandem yumi, blong “prea long Papa wetem ful paoa blong hat, mekem se yumi save fulap wetem lav ia.”⁸

Olsem wan eksampol, mi serem wan eksperiens we Sista Lanett Ho Ching, we i stap givim seves naoia wetem hasban blong hem, Presiden Ho Ching, we i prisaed ova long Samoa Apia Misin. Sista Ho Ching i talem:

“Ol yia i pas, yangfala famli blong mifala” i bin muv i go long wan smol haos long Hawae. Garaj blong haos blong mifala oli bin tanem i kam wan studio apatmen, we wan man, nem blong hem Jonathan i stap laef long hem. Jonathan i bin neba blong mifala long wan nara ples. Ol filing se i no wan mistek se Lod i putum mifala tugeta, mifala i disaed blong stap moa open long saed blong ol aktiviti blong mifala mo membasip blong mifala insaed long Jos. Jonathan i glad tumas long frensip blong mifala mo laekem blong spendem taem wetem famli blong mifala. Hem i laekem lanem abaot gospel, be hem i no bin intres blong komitim hemwan long Jos.

“Wetem taem, Jonathan i bin kasem wan sotnem ’Anggel Jonathan’ wetem ol pikinini blong mitufala. Taem famli blong mifala i stap gohed blong gro, intres blong Jonathan long wanem mifala i stap mekem i gro tu. Invitesen blong mifala long ol holidei pati, bon dei, program blong skul, mo ol Jos aktiviti i bin go kasem famli haos naet mo baptaes blong ol pikinini.

“Wan dei, mi kasem wan fon kol i kam long Jonathan. Hem i nidim help. Hem i gat sik suga, mo hem i bin kasem bigfala soa long leg, we i nidim blong oli katem leg blong hem blong hem i laef. Famli blong mifala mo ol memba blong wod we oli stap kolosap i bin wokbaot wetem hem long taem hadtaem ia. Mifala wanwan i tekem taem blong go long hospital, mo ol prishud blesing oli bin hapen. Taem Jonathan i stap kam gud, wetem help blong Rilif Sosaeti, Mifala i klinim fulwan apatmen blong hem. Ol brata blong prishud oli bildim wan rel i go long doa blong hem mo han rel long ples blong swim. Taem Jonathan i kambak long haos, hem i fulap wetem sapraes.

“Jonathan i stat blong tekem ol misinari lesen bakegen. Wik bifo long Niu Yia, hem i ringim mi mo askem, ’?Bae yu mekem wanem long dei bifo Niu Yia?’ Mi rimaenem hem long saed blong yia pati blong mifala. Be, hem i ansa, ‘Mi wantem yu blong kam long baptaes blong mi! Mi wantem statem niu yia long wan stret wei.’ Afta 20 yia blong ’kam mo luk,’ ’kam mo help,’ mo kam mo stap,’ naesfala sol ia i bin rere blong kasem baptaes.”

Long 2018, taem oli singaotem yumi blong kam olsem misin presiden mo kompanion long Samoa, Helt blong Jonathan i stap go daon. Mifala i bin askem hem blong stap strong mo wet kasem taem mifala i kambak. Hem i gohed blong kolosap wan yia, be Lod i bin stap rere long hem blong kam hom. Hem i bin ded kwaet nomo long Epril 2019. Ol gel blong mi oli atendem fenerol blong ‘anggel Jonathan’ mo singsing semmak singsing we mifala i bin singsing long hem long taem blong baptaes blong hem.”

Mi serem wan seken kondisen blong serem mesej blong Restoresen wetem sakses wetem kwestin ia: ?Wanem nao bae i mekem invitesen blong yu i gat paoa long wan man? ?I no yu, eksampol blong laef blong yuwan? Plante we oli bin harem mo kasem ol mesej blong Restoresen oli intres long wanem oli luk long wan memba o long ol memba blong Jos Ia blong Jisas Kraes. Maet i wei we oli stap tritim ol narawan, ol samting oli talem o no talem, fasin blong stap kwaet long taem we i had, o fes blong olgeta nomo.⁹

Nomata long wanem we i stap, yumi no save ronwe long tingting se yumi nidim blong andastanem mo laef folem ol prinsipol blong gospel we i kambak olsem we yumi mekem blong mekem se invitesen i save invaetem ol man. I wan samting we oli oltaem tokbaot olsem semmak fasin. Sapos lav blong Kraes i stap insaed long yumi, ol narawan bae oli save se lav blong yumi long olgeta i tru. Sapos laet blong Tabu Spirit i bonem insaed long yumi, bae i wekemap laet blong Kraes long olgeta.¹⁰ ?Wanem yu stap givim long semmak fasin long invitesen blong yu blong kam eksperiensem glad blong gospel blong Jisas Kraes we i fulwan.

Nambatri kondisen mi wantem talem i blong yusum tru ol tul blong jenis fulwan we Lod i disaenem blong las gospel dispensesen ia, Buk blong Momon. Hem i Pruf we kolosap yu save tajem blong koling blong Josef Smit olsem wan profet mo pruf we i save tanem tingting blong tabu mo Laef Bakegen long Ded blong Jisas Kraes. Kamaot klia blong Plan blong Fasin Blong Sevem man blong Papa long Heven i moa hae bitim eni samting. Taem yu serem Buk blong Momon, yu stap serem Restoresen.

Taem Jason Olsen i bin wan yang boe, hem i kasem plante woning plante taem long ol famli memba mo ol narawan agensem fasin blong kam wan Kristin. Hem i gat tu gud fren, be, oli ol memba blong Jos Ia blong Jisas Kraes blong Ol Lata Dei-Sent, mo oli oltaem tokbaot relijin. Ol fren blong hem, Shena mo Dave, tufala i stretem ol toktok we ol narawan ol bin givim long Jason agensem fet long Jisas Kraes. Long en, tufala i givim long hem wan kopi blong Buk blong Momon, mo talem: “Buk ia bae i ansarem ol kwestin blong yu. Plis ridim.” Hem i no wantem be i akseptem buk ia mo putum insaed long basket blong hem, mo i bin stap ia blong plante manis. Hem i no bin wantem blong lego long haos, nogud famli blong hem bae i luk, mo hem i no bin wantem blong mekem Shea mo Dave i harem nogud sapos i givimbak buk i ia. Long en, hem i agri wetem tingting blong bonem buk.

Wan naet, wetem wan laeta long wan han mo Buk blong Momon long narawan, hem i rere blong putum faea long buk taem hem i harem wan voes long maen we i talem, “Yu no bonem buk blong mi.” Sapraes, hem i stop. Afta, tingting se hem i mekemap voes ia, hem i wantem bakegen blong laetem laeta. Bakegen voes ia i kam insaed long maen blong hem: “Go long rum blong yu mo ridim buk blong mi.” Jason i putumaot laeta, wokbaot i kambak long rum blong hem, openem Buk blong Momon, mo stat blong rid. Hem i gohed dei afta dei, plante taem long ol eli aoa blong moning. Taem Jason i kam long en mo prea, hem i talem, “mi bin fulap, stap long hed blong mi kasem andanit long leg blong mi wetem Spirit. … Mi bin fulap long laet. … I bin wan long ol glad eksperiens we mi bin gat long laef blong mi.” Hem i bin baptaes mo afta kam wan misinari.

Ating i no nid blong talem se nomata long tru lav mo tru fasin, plante, o kolosap evri invitesen blong yumi blong serem mesej blong Restoresen, bae oli no akseptem. Be tingbaot hemia: evriwan i gud inaf blong kasem invitesen ia—“evriwan i semmak long fes blong God,”¹¹ Lod i glad wetem evri efot we yumi mekem, nomata long risal; wan invitesen we oli no akseptem, i no wan risen blong stop toktok wetem hem; mo sapos wan i no intres tedei, i save kam wan intres long fiuja. Nomata long wanem, lav blong yumi i mas stap oltaem.

Bae yumi neva fogetem se Restoresen i bin kamaot long wan bigfala hadwok mo sakrifaes. Hemia, i wan topik blong wan nara taem. Yumi glad tedei long frut blong Restoresen, wan long ol impoten man we paoa i bin wan taem bakegen kam blong fasem long wol mo long heven.¹² Olsem Presiden Gordon B. Hinckley i bin talem long taem i pas, “Sapos i nomo gat wan samting i kamaot long evri sore mo wok mo so blong restoresen be paoa blong siling blong tabu prishud blong fasem tugeta ol famli blong oltaem, bae praes blong hem bae i stret long evri samting we i bin hapen.”¹³

Promes blong Restoresen i fasin ia nao blong pemaot man tru long Jisas Kraes. Laef Bakegen long Ded blong Jisas Kraes i pruf se Hem nao, i tru se Hem nao i gat paoa blong pemaot evriwan we bae oli go long Hem—pemaot olgeta long harem nogud, fasin blong no gat jastis, sin, mo iven ded. Tedei hem i Pam Sandei; wan wik stat tedei hem i Ista. Yumi tingbaot, yumi oltaem tingbaot, safaring mo ded blong Kraes blong pem praes from ol sin blong yumi, mo yumi selebretem Sandei ia we i moa naes bitim evri Sandei, dei ia blong Lod, we Hem i bin laef bakegen long ded. From Jisas Kraes i laef bakegen long ded, Restoresen i gat mining, laef blong yumi long wol i gat mining, mo long en, we yumi stap laef long wol ia i gat mining.

Josef Smit, bigfala profet blong Restoresen, i givim testemoni we i kavremap evri samting, blong taem blong yumi tedei abaot Kraes: “Se hem i laef! From we mitufala i bin luk hem, we i stap long raet han blong God.”¹⁴ Wetem tingting i stap daon, mi ademap witnes blong mi long hemia blong Josef mo hemia blong evri aposol mo profet bifo hem, mo evri aposol mo profet we oli kam afta long hem, se Jisas blong Nasaret i Mesaea blong Promes , Wan Stret Pikinini ia Nomo blong God, mo Ridima blong evri man, we i bin laef bakegen long ded.

Mifala i talem tru se olgeta we oli prea mo stadi long mesej ia blong Restoresen mo tekem aksen wetem fet, bae oli gat blesing ia blong kasem wan witnes blong olgetawan se hem i tabu mo stamba tingting blong Hem blong mekem wol ia i rere from Seken Kaming blong Lod mo Sevya blong yumi, Jisas Kraes, olsem Hem i promesem.¹⁵ Laef bakegen long ded blong Kraes i mekem se ol promes ia blong Hem, oli truwan. Long nem blong Jisas Kraes, amen.