Elda Jeremy R. Jaggi

Taem we Elda Jeremy R. Jaggi i bin wan yangfala boe, sista blong hem we i gat seven yia, Kristen, i bin kasem wan bebet we i kakae bren blong hem. Ol dokta oli talem se bae hem i no save laef.

Yangfala Jeremy i bin nildaon long saed blong bed blong hem long famli hom long Sol Lek Siti, Yuta, YSA, mo i bin plis long Lod blong save from wanem sista blong hem i mas ded we hem i yangfala tumas olsem. Be, sista blong hem i bin kasem wan prishud blesing, mo i laef.

Hemia i wan bigfala samting blong Jeremy we i gat 17 yia blong “i putum hem i stret wetem God,” mo i lidim hem blong i series blong ridim Buk blong Momon blong fasfala taem. Afta long hemia, hem i bin stap olsem wan fultaem misinari long Ohaeo Klevelan Misin.

Jeremy bae i gobak long ni blong hem, i prea wetem ful hat afta taem we waef blong hem, Amy, i bin statem wok blong bonem nambatri pikinini, we i stap kam bifo taem blong hem. “Long stret taem ia, mi bin filim wan bigbigfala pis—wan pis we mi save tokbaot nomo se i olsem ol han blong lav blong wan Papa long Heven i stap raonem mi mi kavremap mi wetem gud filing blong Tabu Spirit,” hem i talem.

Pis ia i tekem i go tru long smol taem ia we bebi ia i bin laef, mo ol manis blong krae sore we i kam afta from oli lusum wan nara bebi. Hem i talem: “Yumi evriwan, yumi gat ol tes we oli kam long ol defren wei, be yumi kaontem yet se i wan glad [Jemes 1:2] we Sevya i putum wan rod blong yumi gat pis mo hapines.”

Jeremy Robert Jaggi i bin bon long Sol Lek Siti, Yuta, YSA, long 23 Maj 1973, mo papa mo mama blong hem i Robert Stanley Jaggi mo Judy Anne Roos. Hem i bin maredem Amy Anne Stewart long Sol Lek Tempol, long 12 Jun 1995. Tufala i papa mo mama blong faef pikinini.

Elda Jaggi i bin kasem wan saens digri long saed blong saens mo helt blong fasin blong man, hemia long Yunivesiti blong Yuta, mo i kasem wan masta bisnis administresen digri long Pepperdine Yunivesiti. Hem i bin stap long hed blong rijin seksen blong salem samting blong Alkermes mo i stap manejem wan bisnis blong salem graon long HCA Investments long taem we oli bin singaotem hem long koling ia.

Elda Jaggi i bin stap olsem wan Eria Seventi, presiden blong Yuta Ogden Misin, asisten stek eksekutiv sekretari, bisop, presiden blong kworom blong ol elda, seminari tija, kaonsela long wan wod Yang Man presidensi, stek misinari priperesen tija, mo wan wod misin lida.