Ol Haelaet blong Namba 190 Yia Jeneral Konfrens

Presiden Russell M. Nelson i bin gat wan klia toktok blong talem long jeneral konfrens: “Lisin Gud long Hem.”

“Yumi mas lukaotem, long evri wei we yumi save mekem, blong harem mo lisin gud long Jisas Kraes we i stap toktok long yumi tru long paoa mo givhan blong Tabu Spirit,” Presiden Nelson i tijim.

“Stamba tingting blong konfrens ia mo evri nara jeneral konfrens i blong helpem yumi blong harem mo lisin gud long Hem” (pej 7).

Long wan konfrens we i lukluk nomo long Fas Visen mo Restoresen, oli bin tijim yumi se yumi save harem mo lisin gud, semmak olsem we Josef Smit i bin mekem long Tabu Bus. Taem we ol risal blong wan wol sik we i spolem ol milian pipol, oli bin tijim yumi blong harem mo lisin gud long Hem blong save faerem rod long medel blong ol trabol blong yumi. Wetem wan lukluk we i go long wan klia mo gud fiuja blong tugeta, Jos mo wanwan long yumi, oli bin tijim yumi blong mekembak ol hadwok blong yumi blong harem mo lisin gud long Hem, mo blong stap folem Hem.

“Plante pat blong Epril 2020 jeneral konfrens ia we i givim insperesen,” Presiden Nelson i talem, … “bae yumi talem sot long fo tabu toktok we heven i talem:‘!Lisin gud long Hem!’ Mifala i prea se bae stret lukluk blong yufala i stap long Papa long Heven, we i bin talem ol toktok ia, mo stret lukluk blong yufala long Pikinini blong Hem we Hem i Lavem Tumas, Jisas Kraes, bae i stap bigwan long memori blong yufala abaot evri samting we i bin hapen.”

Taem yufala i stap stadi long ol mesej blong konfrens ia mo lukaot blong “harem, lisin gud, mo mekem folem ol toktok blong Sevya,” bae yufala i faenem se promes blong profet i kam ril insaed long laef blong yu we “fraet i go daon mo fet i kam antap” (pej 114).

• Presiden Nelson i presentem wan niu simbol blong Jos long pej 73.

• Presiden Nelson i presentem wan ofisol toktok long saed blong Restoresen long pej 91.

• Presiden Nelson i lidim wan wol tabu asembli long pej 92.

• Presiden Nelson i anaonsem eit niu tempol long pej 115.

• Lanem moa abaot wei we yumi save helpem ol narawan blong #HearHim long HearHim.ChurchofJesusChrist.org.