Elda Adeyinka A. Ojediran

Epril 2020 jeneral konfrens i bin wan wiken we Elda Adeyinka A. Ojediran bae i neva save fogetem.

Konvet ia blong Jos, oli jes sastenem hem olsem wan Jeneral Atoriti Seventi—hemia i fas man Naejeria mo Lata-dei Sent blong Wes Afrika. Bigbigfala fasin blong hem blong talem tangkyu mo gat glad i bin kam moa bigwan taem Presiden Russel M. Nelson i bin anaonsem nambatri tempol long Naejeria, we bae oli bildim long Benin Siti.

“Mi no bin ting nating long hemia,” Elda Ojediran i talem wetem bigfala smael. “Blong harem profet blong yumi i talem se bae oli bildim wan nara tempol long Naejeria, hemia i bin naes we i naes. Long mi, i konfemem se wok blong Lod i stap muv hariap. Wanem we yumi nidim blong mekem i blong mekem ol pikinini blong God oli rere from Seken Kaming blong Pikinini blong Hem.

Hem i bon i kam long wol ia long Ibadan, Naejeria, long 5 Epril 1967, mo papa mo mama blong hem i Adeniyi mo Caroline Anike Ojediran; Adeyinka Ayodeji Ojediran i bin kasem wan digri long botani (stadi blong ol plant) long Yunivesiti blong Ilorin long 1991, mo afta i winim wan masta long bisnis administresen digri long Ladoke Yunivesiti blong Teknoloji. Hem i bin gat wan longfala wokbaot long faenens mo bisnis administresen olsem wan profesonol jata akaonten. Hem i bin stap wok olsem wan bisnis faenens maneja blong Shell Nigeria bifo oli singaotem hem olsem wan Jeneral Atoriti.

Tri yia afta long baptaes blong hem, hem i bin mitim Olufunmilayo Omolola Akinbebije long wan sosol wok miting. Tufala i stat blong deit, be wok long ol defren siti i minim se “mitufala i stap toktok nomo long telefon.”

Kapol ia i mared long Naejeria long 1998, mo tufala i bin sil long Joanesbeg Saot Afrika Tempol long 14 Novemba 2002. Tufala Ojediran i gat wan gel nomo.

Elda Ojediran i glad tumas from evri koling blong Jos we hem i bin kasem stat long taem we hem i bin joenem Jos long 1990, taem hem i bin gat 23 yia nomo. Wanwan eklesiastik wok we hem i bin kasem i bin helpem hem blong groap, mo i bin givim hem ol tabu janis blong helpem ol narawan blong oli developem olgeta long ol wanwan koling mo diuti we oli kasem.

Elda Ojediran, we i bin stap olsem wan Eria Seventi long tetaem blong koling blong hem, i bin stap tu olsem kaonsela long wan misin presidensi, stek presiden, kaonsela long wan stek presidensi, bisop, kaonsela long wan bisoprik, mo wan branj presiden.