Paglangoy Sama sa Kabayong Dagat

Imahe

Swimming Like a Seahorse

Si Robin mitutok sa swimming pool. Misulay siya nga dili maghunahuna unsa ka layo ang iyang languyon. Ang importante nga makakuha siya og badge. Ang seepferdchen (kabayong dagat) nga badge mopakita sa tanan sa Germany nga makahibalo siya molangoy nga siya ra.

Makahimo ko niini! Naghunahuna si Robin. Miginhawa siya og lawom og milukso.

SPLASH!

Ang bugnaw nga tubig nindot bation sa ingon ka init nga adlaw.

Buhata lang usa ka metro matag higayon, misulti si Papa kaniya. Ayaw dayon hunahunaa ang tanang 25 metros.

Gipabilin ni Robin nga nakaubos ang iyang ulo. Gilihok niya ang iyang mga bukton ug mga tiil sama sa iyang gipraktisan sa daghang bulan. Matag pipila ka segundo moisa siya sa iyang ulo aron moginhawa.

Patid. Kabya. Patid. Kabya.

Sa kalit lang, ang magtutudlo sa paglangoy mitayhop sa iyang pito. Mihangad si Robin sa kasurprisa.

“Maayo kaayo,” miingon ang iyang magtutudlo.

Nabuhat niya!

Mikatawa si Robin ug mihimo og pipila ka pagbalitok ilawom sa tubig aron sa pagsaulog. Usa siya ka kabayong dagat!

Pag-uli ni Robin, nagdali siya sa pagpangita ni Papa.

“Pa, tan-awa!”

Gibutang sa papa ni Robin ang iyang martilyo. Pagkakita ni Papa sa seepferdchen nga badge, mipahiyum siya og dako.

“Sa imong unang pagsulay?” Migakos pag-ayo si Papa kang Robin. “Unsay gusto nimong buhaton aron sa pagsaulog?”

Mihunahuna og kadiyot si Robin. “Ang gusto gayud nakong buhaton mao ang pag-adto sa pool uban nimo. Gusto nakong ipakita nimo ang akong mahimo.”

Mas midako ang pahiyom ni Papa. “Karon usa gayud kana ka pagsaulog alang natong duha. Kon makahigayon na ko, mangadto ta.”

Giisa-isa ni Robin ang iyang kumo sa hangin. Dili siya makahulat nga matahi ang iyang badge sa iyang swimsuit ug makiglangoy ni Papa.

Milabay ang pipila ka adlaw. Nagsige og pangutana si Robin mahitungod sa pool, apan kanunay nga adunay makababag. Daw okupado kanunay si Papa.

Usa ka buntag miluhod si Robin diha sa iyang higdaanan aron mag-ampo. Sa pagtapos sa pag-ampo, midugang siya og usa pa ka butang.

“Palihug hatagi ang akong papa og ekstra nga panahon aron makaadto kami sa swimming pool. Sa ngalan ni Jesukristo, amen.”

Sa pagbuka ni Robin sa iyang mga mata, nadunggan niya si Papa nga nanuktok sa pultahan.

“Mangadto na ta sa pool. Gusto kong makakita nimo nga naglangoy!”

Nasurprisa pag-ayo si Robin. “Pa! Dili ka makatuo niini. Mao pay pag-ampo nako nga makakuha ka og ekstra nga panahon aron makaadto ta.”

Nanguyugpos si Papa ug misandig sa may pultahan. “Karon, dili ba makapaikag kana? Abi nimo, nakadungog ko og hilum, klaro nga mensahe gikan sa Espiritu Santo nga kinahanglang dad-on ka nako sa pool. Morag angay na gyud ta nga moadto!”

Nindot kaayo ang ilang lakaw. Gipakita ni Robin kang Papa kon unsaon niya sa paglangoy ang 25 metros nga dili mohunong. Nakadayeg si Papa. Ug nakadayeg si Robin sa mga balitok ni Papa ilawom sa tubig. Makahimo si Papa og lima nga magsunod!

“Nalipay ko nga ang Langitnong Amahan mihatag nimo og ekstra nga panahon karon,” miingon si Robin.

“Sa tinuod lang,” miingon si Papa, “gipasagdan nako ang akong kaugalingon nga maokupado kaayo. Nagtuo ko nga ang Espiritu Santo mipahinumdom nako nga kinahanglang mogahin kita og panahon alang sa usag usa, dili ba? Mosaad ko nga akong buhaton ang akong parte.”

Mipahiyom si Robin. “Ako sab.”

Mikunot ang palibut sa mga mata ni Papa sa pagpahiyom. “Usa pa ka butang. Nakasulti na ba ko nimo nga wala pa gyud ko mapildi sa sabyagay og tubig?”

Mibawos og pahiyom si Robin. “Wala pa matapos ang adlaw!” ●