Pagpangalagad pinaagi sa Miting sa Sakramento

Ang miting sa sakramento naghatag og mga oportunidad nga mokonektar ug mangalagad sa uban.

Imahe

people seated in a heart shape

Mga paghulagway pinaagi ni Edward McGowan

Ang miting sa sakramento maoy panahon alang sa espirituhanong pag-amuma ug personal nga pagpamalandong kabahin sa Manluluwas ug sa Iyang Pag-ula. Samtang moambit kita sa sakramento matag semana, kitang tanan mahatagan og kaayohan (tan-awa sa Doktrina ug mga Pakigsaad 84:110). Apan ang pipila sa atong mga ward ug mga branch nagdala uban kanila og bug-at nga mga palas-anon o wala gayud diha.

Ania ang pipila ka oportunidad kon unsaon nato sa paggamit nianang sagrado nga oras sa pagpangalagad sa uban ug paghimo og kalainan diha sa ilang kinabuhi.

Motabang sa Paghimo sa Miting sa Sakramento nga Mas Maayo alang Niadtong Imong Gialagaran

Ang unang lakang sa pagkat-on unsaon sa pagpangalagad mao ang pag-ila sa mga indibidwal o mga pamilya ug sa ilang mga panginahanglan. Tingali adunay daghang paagi nga makatabang ka sa paghimo sa ilang kasinatian sa pagsimba sa sakramento nga mas maayo pinaagi sa pagkat-on og dugang mahitungod kanila.

Alang ni Mindy, usa ka batan-ong inahan sa kaluha nga gagmayng bata, ang yanong mga paningkamot sa iyang tigpangalagad nga sister mihimo og dako kaayong kalainan sa iyang kasinatian sa miting sa sakramento matag semana.

“Tungod sa iskedyul sa trabaho sa akong bana, ako lamang ang modala sa among kaluha nga mga anak nga babaye ngadto sa simbahan matag semana,” mipasabut si Mindy. “Lisud gyud kaayo ang paningkamot nga makahuman sa tibuok miting sa sakramento nga adunay duha ka lihokan nga mga bata, apan ang akong tigpangalagad nga sister miangkon sa responsibilidad sa pagtabang kanako.

“Molingkod siya tupad namo ug motabang nako sa pag-atiman sa akong mga anak matag semana. Ang iyang pagtupad nako importante kaayo ug nakapagaan gayud sa akong kabalaka sa mga panahon nga saputon o maglangas sila. Morag dili gayud siya mahibalo kon unsa ka dako ang epekto sa iyang mga buhat niining panahona sa akong kinabuhi. Iyang nakita ang akong panginahanglan isip usa ka batan-on, mabalak-on nga inahan, ug mitabang siya sa paghimo sa simbahan nga usa ka malinawon ug malipayon nga dapit alang kanamong tanan.”

Mga Ideya sa Pagtabang Niadtong adunay Piho nga mga Panginahanglan

Pakigtambag sa mga lider sa elders quorum ug Relief Society mahitungod sa mga panginahanglan sa mga miyembro.
Ang mga lider moplano sa mga pakigpulong sa miting sa sakramento aron motabang sa pagtubag sa mga panginahanglan sa mga miyembro. Kon kadtong imong gipangalagaran makabenepisyo sa pagpaminaw sa usa ka piho nga mensahe, ipaambit ang ideya ngadto sa imong mga lider.
Kon nahibalo ka nga ang usa ka tawo adunay kakulian sa panglawas o allergy sa pagkaon nga makapugong kanila sa pagtagamtam sa mga panalangin sa sakramento, pangutan-a sila sa mga detalye ug unsa nga mga pagpahiangay ang mahimo aron mapalambo ang ilang kasinatian sa pagsimba. Ipaambit kini nga impormasyon ngadto sa imong mga lider.¹
Kon ang tawo nga imong gipangalagaran o nailhan nakapundo sa balay, permanente man o temporaryo lang, pangutan-a ang imong bishop kon ang sakramento mahimo ba nga mahatag kanila diha sa balay. Mahimo gani ka nga magsulat atol sa miting sa sakramento ug ipaambit kini diha sa telepono, pinaagi sa email, o sa personal.
Kon ang tawo nga imong gipangalagaran adunay gagmay nga mga bata, mahimo ka nga motanyag sa pagtabang kanila panahon sa miting sa sakramento.
Kon kadtong imong gipangalagaran dili kanunay motambong sa miting sa sakramento, paningkamuti sa pagsabut ug pagkonsiderar og mga paagi nga makatabang ka. Kon nagkinahanglan sila og transportasyon, mahimo ka nga motanyag kanila og masakyan. Kon mibati sila nga wala suportahi sa ilang pamilya, mahimo nimo silang dapiton sa paglingkod tupad nimo. Pwede ka nga mohimo og espesyal nga mga pagdapit aron sa pagtabang kanila nga mobati nga gihangup ug gikinahanglan sa miting sa sakramento.

Imahe

people sitting together

Hinumdumi, ang Yano nga mga Buhat Dako Kaayo og Epekto

Namulong kalabut sa pagpangalagad, si Sister Jean B. Bingham, Kinatibuk-ang Presidente sa Relief Society, mitudlo: “Usahay maghunahuna kita nga kinahanglang mobuhat kita og usa ka butang nga bililhon kaayo ug bayanihon aron ‘maihap’ isip pagserbisyo sa atong mga silingan. Apan ang yano nga mga buhat sa serbisyo mahimong adunay lawom nga mga epekto sa uban—ingon man sa atong mga kaugalingon.”²

Sa usa ka gamay nga ward sa Belgium, si Evita motanyag kanunay nga mohubad alang sa mga bisita ug mga miyembro nga Kinatsila ang pinulongan atol sa mga miting sa Simbahan. Usa ka higayon, si Evita gipaila ngadto sa usa ka tawo nga gikan sa Dominican Republic kinsa nagkat-on pa mahitungod sa Simbahan. Nakahibalo siya og diyutay nga Iningles, apan Kinatsila ang iyang lumad nga pinulongan. Mao nga si Evita mitanyag nga hinay nga mohubad alang kaniya sa miting sa sakramento aron mobati siya nga mas komportable.

“Ang paghubad usahay makahimo sa akong Igpapahulay nga mas okupado,” miingon si Evita. “Apan ang pagsunod sa mga pag-aghat nga mangutana sa uban kon nagkinahanglan ba sila og tighubad nakahatag gayud kanako og pagbati sa kalipay ug kainit sa pagkasayud nga nakahimo ako sa pagtabang kanila nga mobati sa Espiritu ug maganahan sa ilang mga miting.”

Mga Ideya sa Pagtabang pinaagi sa Yano nga mga Buhat

Pakigsulti sa imong mga lider aron mahibalo kinsa ang posibleng nagkinahanglan og dugang nga pagserbisyo atol sa miting sa sakramento. O kon nakaila ka og tawo nga nanginahanglan, siguroa nga ang imong mga lider nahibalo kanila.
Paglingkod nga hilom samtang naghulat ka sa miting nga mosugod. Makatabang kini sa “ubang masulub-ong mga kasingkasing ug magul-anong mga kalag nga naglibut kanato”³ kinsa nagkinahanglan og kalinaw nga moabut pinaagi sa balaang pagtahud sa balaan nga dapit.
Sa Dominggo sa puasa, ikonsiderar ang pagpahinungod sa imong pagpuasa ug mga pag-ampo sa usa ka tawo nga imong gipangalagaran kinsa tingali nagkinahanglan og dugang nga paghupay.
Pag-ampo aron masayud kon adunay tawo nga makabenepisyo sa imong paglingkod tupad o duol kanila panahon sa miting sa sakramento o aduna pay laing paagi nga makatabang ka.

Ang Miting sa Sakramento Pwedeng mahimong Mahinangpon nga Dapit alang sa Tanan

Si Presidente Joseph Fielding Smith (1876–1972) mitudlo, “Ang miting sa sakramento mao ang labing sagrado, labing balaan, sa tanang miting sa Simbahan.”⁴ Tungod niana, importante nga masiguro nga ang tanan nga nanambong sa miting sa sakramento mobati nga gihangup ug naamuma sa espirituhanong paagi—ilabi na sa bag-ong mga miyembro o mga miyembro kinsa taud-taod na nga wala makatambong.

Si Merania sa New South Wales, Australia, nakighigala og usa ka babaye nga nagkat-on mahitungod sa Simbahan diha sa iyang ward. “Nahimo siyang usa sa akong suod nga mga higala karon,” miingon si Merania. “Ganahan ko nga molingkod tupad niya diha sa miting sa sakramento matag semana, ug mangumusta ako kaniya kanunay ug kon aduna akoy mahimo sa pagtabang kaniya.” Wala madugay, ang higala ni Merania nabunyagan. Ang mga paningkamot sa mga miyembro sa ward, ingon man ang mahinangpong palibut sa miting sa sakramento, nakahimo og dako nga parte sa iyang desisyon.

Mga Ideya sa Pagpangalagad sa Mibalik o Bag-ong mga Miyembro

Kon mamulong ka diha sa miting sa sakramento, mahimo nimong dapiton ang mga higala, pamilya, ug uban sa pagpaminaw sa imong mensahe.
Mahimo nimong pangitaon ug hangupon kadtong nag-inusara o kinsa tingali nagkinahanglan og tabang. Pangutan-a kon mahimo ka ba nga motupad sa paglingkod kanila o modapit kanila sa paglingkod tupad nimo.
Kon matapos na ang miting, mahimo nimong dapiton kadtong imong gipangalagaran ug ang uban sa umaabut nga mga kalihokan sa Simbahan, ngadto sa templo, o sa sosyal nga kalihokan.
Kon ang usa ka tawo nga imong gipangalagaran nga dugay na nga wala makatambong mitambong sa miting sa sakramento, mahimo nimo silang pangutan-on kon duna ba silay mga pangutana mahitungod sa unsay gitudlo. Sultihi sila nga makahimo sila kanunay sa pagduol kanimo kon adunay termino, istorya, o parte sa doktrina nga wala nila masabti. Mahimo ninyong pangitaon og dungan ang mga tubag kon gikinahanglan.