Ika-150 nga Kasumaran sa Organisasyon sa Young Women
Ni Sister Bonnie H. Cordon
Kinatibuk-ang Presidente sa Young Women
Ang Langitnong Amahan adunay dakong buhat nga ipabuhat kaninyo agig pagpangandam alang sa Ikaduhang Pag-anhi sa atong Manluluwas.
Samtang maghunahuna ko sa kahibulongang mga butang nga nahimo sa atong Langitnong Amahan alang sa Iyang mga anak, ang akong kasingkasing napuno sa hingpit nga katingala ug pagpasalamat kon unsa kamahal sa Ginoo ang Iyang mga anak nga babaye. Siya nagmahal KANINYO!
Ug tungod kay Siya nagmahal kaninyo, gidasig Niya ang mga lider sa Simbahan 150 ka tuig na ang milabay sa pagmugna sa organisasyon sa Young Women aron sa pagtabang kaninyo nga mahimong tawo nga gusto sa Dios nga kamo mamahimo. Si Propeta Brigham Young (1801–77) miawhag kanato sa paglig-on sa atong mga pagpamatuod pinaagi sa pagsunod sa ebanghelyo: “Adunay panginahanglan alang sa batan-ong mga babaye sa Israel sa pag-angkon og buhi nga pagpamatuod sa kamatuoran. … Gusto nako nga ang atong mga batang babaye makaangkon og kahibalo sa ebanghelyo alang sa ilang kaugalingon.”1 Miingon usab siya, “Mas daghang pagpamatuod ang maangkon pinaagi sa paglihok kay sa pagluhod.”2
Ang organisasyon sa Young Women mipahiangay sulod sa mga katuigan aron matubag ang mga panginahanglan sa piho nga mga panahon. Apan bisan kon ang programa gipahiangay, ang tumong niini alang sa batan-ong mga babaye wala mausab—sa pagtabang kaninyo nga makaangkon og buhing pagpamatuod ug, uban sa pagtuo, magpadayon diha sa dalan sa pakigsaad. Samtang mailhan ninyo kon si kinsa kamo ug molihok inubanan sa pagtuo, inyong madawat ang mga panalangin nga giandam sa Langitnong Amahan alang ninyo.
Mga Klase sa Young Women Paglabay sa Katuigan
Sa pagsugod sa Young Women, gitawag kini og “Retrenchment Association” uban sa tumong nga “molambo sa tanan nga maayo ug matahum.” Sa sayong bahin sa mga 1900, nahimo kining Young Ladies’ Mutual Improvement Association, ug ang mga klase sa wala madugay naglakip sa batan-ong mga babaye nga nag-edad og 12 ngadto sa 24. Ang mga ngalan sa mga klase nausab paglabay sa katuigan ug naglakip sa Camp Fire Girls, Beehives, Guardians, ug Gleaners. Samtang mitubo ang Simbahan ug ang batan-ong mga babaye nag-abut sa ubang mga nasud ug mga pinulongan, gibuhat nila ang ilang labing maayo sa pagpahiangay, ang mga ngalan sama sa Mia Maid nahimong “Rosenmädchen” (Mga Babayeng Rosas) sa German, sama pananglit.
Karon, nga adunay batan-ong mga babaye sa hapit tanang nasud, ang mga klase giorganisar sumala sa panginahanglan sa matag ward o branch, ug ang tanan nailhan sa makapahiusa nga ngalan nga Young Women.
Ang mga gikinahanglan usab alang sa mga programa sa Young Women nausab paglabay sa katuigan. Sa tuo mao ang pipila niini.
Niadtong 1915:
-
Pagkat-on sa pagsangon ug paggiya og pundok sa mga kabayo.
-
Pagsag-ulo og mga tudling sa kasulatan.
Gikan sa mga 1940 ngadto sa mga 1960:
-
Palamboa ang inyong pagsalig sa kaugalingon pinaagi sa pag-angkon og maayo nga postura (paglingkod, pagbarug, ug paglakaw).
-
Pagpraktis sa pagkamatinahuron isip timailhan sa usa ka babaye.
Sa mga 1980:
-
Pagbasa og duha ka mga pamphlet sa misyonaryo ug tudloi ang laing higala o paryente sa unsay inyong nakat-unan.
-
Pagpraktis og pisikal nga kahimsog dili mominos 30 minutos matag adlaw, lima ka adlaw matag semana sulod sa tulo ka semana.
Niadtong 2009:
-
Tun-i ang kaimportante sa kaputli ug hiyas.
-
Basaha ang tibuok Basahon ni Mormon. Isulat sa journal ang inyong mga hunahuna.
2020
-
Bag-o nga programa gipaila.
Ang Programa sa Kabataan ug Kabatan-onan
Samtang nagtan-aw kamo niini nga mga kinahanglanon gamit ang espirituhanong panglantaw, inyong mamatikdan nga sila adunay komon nga tema. Ang kaniadto ug ang karon nag-abut, nagkahiusa sa pagtabang sa batan-ong mga babaye nga mas mapaduol ngadto ni Jesukristo ug molambo sa espiritwal, intelektwal, sosyal, ug pisikal nga paagi.
Niadtong 2019 usa ka bag-ong programa sa personal nga kalamboan gipaila nga nagdapit kaninyo nga mahimong mapaningkamuton sa kaugalingon ug masaligon sa Manluluwas. Gidapit kamo nga magtinguha sa Espiritu Santo ug mohimo og inyong kaugalingong mga tumong samtang maningkamot kamo nga mahimong mas sama sa Manluluwas, si Jesukristo! Ganahan ko sa pagsalig nga gipakita niini diha kaninyo, ang talagsaong batan-ong mga babaye sa Ang Simbahan ni Jesukristo sa mga Santos sa Ulahing mga Adlaw.
Uban sa suporta sa inyong bishopric ug mga kapangulohan sa Young Women, kamo usab giyahan pinaagi sa mga kapangulohan sa klase—ang inyong mga kaedad kinsa gitawag ug gi-set apart sa pagplano ug pag-implementar sa programa sa Young Women. Adunay sobra sa tunga ka milyon nga batan-ong mga babaye sa tibuok kalibutan karon nga gipangulohan sa ilang mga kaedad!
Ang tanang batan-ong mga babaye nagkahiusa pinaagi sa usa ka tema, nga naglakip niining sukaranang mga baruganan: ikaw hinigugmang anak nga babaye sa langitnong mga ginikanan; ikaw usa ka disipulo sa pakigsaad ni Jesukristo; ikaw magtinguha ug molihok sumala sa personal nga pagpadayag nga moabut pinaagi sa Espiritu Santo; ug ikaw usa ka mahayag nga saksi sa Dios samtang maningkamot ka nga mahisama sa atong Manluluwas, si Jesukristo, ug mangalagad sa uban sa Iyang Balaan nga ngalan.
Kamo Gihigugma ug Gikinahanglan!
Isip hinigugma nga mga anak nga babaye sa buhi ug mahigugmaong Langitnong Amahan, kamo talagsaong giandam nga mahimong “mga manluluwas sa Bukid sa Zion.”3 Sama sa gisulti ni Presidente Russell M. Nelson: “Ang matag propeta naghisgut kalabut sa atong panahon, diha nga ang Israel pagapundukon ug ang kalibutan andamon alang sa Ikaduhang Pag-anhi sa Manluluwas. Hunahunaa kini! Sa tanang katawhan nga nakapuyo niining kalibutana, kita ang makahimo sa pag-apil niini nga kalihokan sa katapusan, dakong panagpundok.”4
Usa kini ka sagradong imbitasyon sa pag-apil diha sa buhat sa templo ug family history, pagserbisyo sa mga posisyon sa pagpangulo, pagpangalagad sa inyong isig ka mga sister, ug pagpaambit sa inyong pagpamatuod ngadto sa inyong pamilya ug mga higala. Gimahal kamo, ug gikinahanglan kamo!
Akong minahal nga mga higala, ang Langitnong Amahan adunay dakong buhat nga ipabuhat kaninyo agig pagpangandam alang sa Ikaduhang Pag-anhi sa atong Manluluwas nga si Jesukristo! Mahinungdanon kamo nga bahin niana nga buhat. Siya nahigugma kaninyo; Siya gusto nga moapil kamo sa Iyang buhat. Siya misalig kaninyo!
Akong idugang ang akong pagtuo ug pagsalig diha kaninyo ngadto nianang sa atong minahal nga propeta, si Presidente Nelson, kinsa mipahayag: “Apil kamo sa labing maayo nga gipadala sa Ginoo sukad dinhi sa kalibutan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibutan kay sa nangaging henerasyon!”5
Nag-ampo ko nga inyong tugutan ang mga pulong sa tema sa Young Women nga motuhop og maayo sa inyong kasingkasing ug mahinamong moapil sa bag-ong programa, mohangop sa matag oportunidad nga mas mapaduol sa Manluluwas ug magkat-on pa mahitungod Kaniya. Pagmahimong tawo nga gusto Niya nga kamo mamahimo. Nasayud ko nga kon buhaton ninyo kini, ang inyong kinabuhi mapuno og mga oportunidad sa pagpaambit sa Iyang kahayag ug sa Iyang gugma ngadto sa inyong mga pamilya, mga higala, ug sa tanan nga naglibut kaninyo. Samtang maningkamot kamo sa pagsunod Kaniya, ang inyong pagpamatuod mahimong lig-on ug dili matarug.
Gilitratohan ni Leslie Nilsson
Mga paghulagway pinaagi ni Corey Egbert
Gilitratohan ni Matt Reier