E na Kanga, Bukin Tera, Nningai, ao Te Tabo Raa ni Kawakinan te Mwane

Tao ko taraa te mwane bwa e nako mai karawa ke bon te riaboro, bon ngaia ae riai. Ma n aroia kairake n ikawai, n tabetai ti namakinna bwa e aki tau ibukin kainnanora n te bong ae koraki, n aki tarai bwaai ake a na riki aika karina! Anne bukina ngkai e rang kakawaki bwa e na iai te kawakin mwane.

Ibukin buokam, aikai iango aika nimaua ibukin wakinan katean am kawakin mwane ni moantaai bwa ko aonga n namakina te kakabwaia n teimatoan am kawakinan mwane n taai rimwi.

• Ni kanga? Waaki man katean te kataumwane. Taraia raoi ni bairea mwaitin am karekemwane are e na nakon te kabwianibwai ao kainnanom (kabwaka mwane, amwarake, taarau, a mwaiti riki.). Ngkana iai nako te nikira ane e na anganiko te iango bwa mwaitira ae ko kona ni kawakinna ni katoa namwakaina ao mwaitin are e na tiku are kona kabanea ni bwaai ake ko tangiri.

  Tuoia ma te bootaki ni mwane iaon iango ake kona kabebetea iai te karinmwane, n aron karinan bwa iraua te katebubua man am karekemwane are e na nakon n am akaunti ni kawakin mwane ni katoa namwakaina. N te aro anne, bwa ko aonga n aki tabeaianga iai! Ao kakoaua bwa ko kabongana raoi n aekakin nako am kawakinmwane n te ritaea ae e na kona n anga am tia kammwakuri.

• Ningai? Ngkai! … Ke ngkana ngaia waaki ma am bwakabwai are imwiina. Ko kona n namakinna bwa akea nnen moa te kataumwane ni kawakinna n te tai aei, ma man kawakinana te mwaiti ae uarereke ni katoa namwakaina, kona katea te anua are e na kakabwaiako n taai aika a na roko!

• Mwaitira? Kawakina ae mwaiti n aron are ko kona n am kataumwane. Ngkana e aki tau ke ko taarau, kona bae n tangiria ni kawakina 5 te betienti ni katoa namwakaina. Ma ngkai e rikirake am karekemwane, ko kona ni karikirakea nakon 10 ke 15 te betieti ke e raka riki ngkai e waaki nako te tai. Te kouru ae tamaroa bon karekean tao kaokoroan te mwane teuana te namwakaina ibukin bwaai aika karina. Ngkanne waaki ni kawakina ae tau bwa e na kona n tau ibukin 3 nakon 6 namwakaina ao reitinako karikirakea.

• Iaara? Bon te iango ae tamaroa bwa kona katuka am kawakin mwane ni bon ana akaunti—anne ae e na kawakiniko man te kaririaki man kaboakin bwaai ni katoabong. Ngkana ko katikumwane ibukin te bwai ae onoti, kataia katea te akaunti ae onoti are ko kona n aranna n (aron “kaintekateka” ke “raebutaobu”) ni kauringngko n am kouru.

Ngkana ko teimatoa n iai am titiraki, nakon te atuwaitia n te mwane. A kona ni buokiko ni karaoa am kouru iaon te kawakin mwane are e boboto iaon aron am karekemwane.

Iaon aei ni kabane, uringnga bwa te moan mwaneka ni kamanoan am mwane bon kabwakaan moa am kabwianibwai! Onimakina ana berita te Uea are E na “kauki mataroan nako karawa, ma n nurakina kakabwaiami, ni karokoa aki reken nena” (Maraki 3:10; 3 Nibwaai 24:10). N tabetai ti kantaningai kakabwaia akanne bwa a na roko n tein te mwane are e na bwaro nako aora, ma kawakinna n ami iango bwa kakabwaia aikai a kona naba n raonaki ni bwain te tamnei (taraa David A. Bednar, “The Windows of Heaven,” Riaona, Nob. 2013, 17–20).

E taku te Uea bwa “bon [Ana] kantaninga bwa N na katauraoi kainnanoia [Ana] aomata aika Itiaki” (Reirei ao Berita aika Tabu 104:15). Kawakinan te mwane e kona n taraa ni matoatoa—riki ngkai te kairake n ikawai, ngkana a mwaiti bwaikoraki ni maium aika aki tiku n aroia—ma teutana imwiin teutana, ko kona ni karaoia. Tamara are i Karawa e na buokiko ni bita anuam ao baike ko moanibwai bwa kona riki n toronibwai ao ni mano n te mwane.