Te Waekon ae Uarereke ae Nnen te Kariki
E maeka te tia korokaraki i Vermont, USA.
“Ngkana kam beku ibukiia raomi ao kam bon beku naba iroun Atuami” (Motiaea 2:17).
E kaurei matana Sammy ao e aa. E aroka te bwai ae boi kangkang.
Mmmm, Papa e karaoa te kariki! E iango Sammy.
E kamwaa te kariki Papa ibukin te utu ni katoa Kaonobong. E mamataku Sammy irouna ni kaotinakoi kariki aika raewaewa ao ni buraaun man te ainumuum. E aki toki Papa n angan Sammy te moan kariki are e koreaki.
Ma te bong aei bon tiaki te Kaonobong, e iango Sammy. Bukin tera ngkai e a bon kamwaa te kariki Papa?
E teirake mai aon ana kainiwene Sammy ao n nako n te tabo ni kuuka. E titirakina Papa tera ae e a bon riki.
“Ko uringa te bwai are e tuangiira bitiobi bwa ti na karaoia?” E titiraki Papa.
E katoutoua atuuna Sammy. “E butiira bwa ti na buokiia aomata. Ao I buoka Titita Martin n uota ana baeki nako eeta, ko uringnga?”
“E tamaroa te mwakuri ae ko karaoia,” e taku Papa. “I tataro bwa N na kanga n ibuobuoki. E a reke au iango bwa N na kamwaa te kariki ao n tibwatibwaia.”
Sammy e taratara man wintoon te ainumuum. E wareki taian kariki.
“Teuana … uoua … teniua … aua. Antai ae ko na anganiia kariki aikai?”
“Anne te bwai ae I kainnanoa iai am ibuobuoki,” e taku Papa. “Iai teaina te kariki ibukin Titita Martin. Ao uaai ibukin te utu ae Miller. Antai ae ti na anganna te ka aeai ni kariki?”
E tabe n angoia Sammy.
“Ao ibukin Mr. Lee?” E titiraki Sammy. E maeka Mr. Lee n aia karinan n auti. E aki bati n otiotinako. Angin te tai e tatataraiia aomata man ana wintoo.
“Anne bon te iango ae moan te nakoraoi,” e taku Papa.
Imwiin kamwaakin te kariki, Sammy e buoka Papa n niira te kariki. Imwiina e anaa ana waekon. A nnei taian kariki inanona.
“Te waekon ae nnen te kariki e nang tauraoi ni butinako!” E taku Sammy.
Papa e buoka Sammy ni katika te waekon. E tamaroa ana namakin Sammy ao n aabue n aron kariki ake a nang tibwatibwai nako! ●