Rinean te Kawai ae Eti man Irariki iaon te Kawai are Rababa
Iroun Unimwaane Takashi Wada
Man te Itingaun
Iai uoua kawai i matau, ao I ataia bwa bon tii teuana te kawai ae N na ataia bwa enga ae N na toua.
Kamataata n te tamnei iroun Chris Ede
I ikawairake i Nagano, Japan, ma au karo. Te Aro bon mwakoron bwaai ni kabane ake a karaoi au utu. Tamau e katorobubua imatan te bao ni karea n Buddhist ni katoa ingabong ao tairiki. I aki iangoia ae Buddhism bon te aro—bon tein maiura. E na bebete riki irou bwa N na tiku ni kaaina te Buddhist ni kabanea bongin maiu, ma te Atua e a tia ni kakoaua nakoiu n taai aika mwaiti bwa te kawai ae bebete ke ae tabangaki bon tiaki te kawai ae te kabanea n tamaroa.
Boki n Reirei ke te Boki ae Tabu?
Ngke te ataeinimwane ngai ae imarenan 13 ao 19 au ririki, iai au kangaanga ni kinakiu. I titiraki bwa bukin tera I mena iaon te aonaaba aei ao tera arou are N na karekea. Ngke 13 au ririki, te mataniwi n au reirei e anganiia ataei n tatabemaniia te Nu Tetemanti n te Ingiriti ao n Tiaban. “Tiaki ibukin ana kantaninga te aro,” e taku. “Bon ibukin te rairairi ae tamaroa, ngaia are kabongana ni kamatebwaia te Ingiriti.” E ngae n anne ngke I kaukia, e anga kiibu ni koroboki aika a tabu ngkana ko namakina te maroa, kainnanoi kaekaan am titiraki, ke iai am kangaanga. I kona n namakin waaki akanne!
I wareka rongorongon Iesu Kristo. “Bane mai nako Iu, ngkami akana kam kua ao kam rawawata, ao N na motiki rawami.” (Mataio 11:28). “Tabeka [ami] kaibangaki, ao ke iriirai” (Mataio 16:24). Taeka aikai a anaa nanou e ngae ngke I aki rangi ni matata raoi iai. I kan ataia bwa antai Iesu Kristo ao tera nanona bwa ti na karikia bwa ara Tia Kamaiu. I kan ataia ngkana bon tii ngai ae I namakina te reitaki nakon te boki n reirei aei.
Birinako ke Tiku ao Ongora?
Tabeua te ririki imwiina I kaitibo ma tabeman mitinare n te moan tai. Au karo a tia ni kauringai ibukiia Kiritian aika kairake ake a ririaki ni kabwarabwara. Ngke I rianna nakon mweengau, tei i Amerika ae abwabwaki ae te mitinare ma moangarena n akoi e kateai. I aki ataa te bwai ae N na karaoia. I maaku ngkana e taekina taekan ana ekaretia. Ngke arona bwa e karaoia, n na birinako n te kawai are teuana! Te bwai ae titiraki bwa e na kanga ni kunea te tabo ni kanako reta. I kaotia nakoina ao imwiina I rianna nakon mweengau.
Ngke I taonnako, I namakina te bwai teuana. Ngkana I manga noriia riki mitinare, I iango, N na taetae nakoia.
E aki maan imwiin anne, I kaitibo ma mitinare tabeman aika uoman. I tounako bwa te Atua e na kona n ongo n ana tataro te ataei ni mwaane n ai arou, ni karokoa I wareka taekan Iotebwa Timiti. I a tia ni warekia n te Nu Tetemanti bwa N na tataro n tainako, ma e kanga te Atua ni kaoti nakon te aomata? Namakinana e bon kakaawaki ao e eti. Nakon are N na birinako, I kabaea au tai ma ngaiia bwa a na reireinai.
Karaoi anga ni Birinako ke Kunea te Koaua?
Imwiin te namwakaina ni kaitibo ma mitinare, a kaoai bwa N na bwabetitoaki. I aki tangiria ni katua te kakao aei, ma I bon rawa ni kiitana aia katei au karo ao ni kabane ake irarikiu. Iai uoua te kawai ibukiu, ao I ataia bwa tii teuana te kawai ae N na ataia ae N na toua—I riai n tataro n ai aron Iotebwa Timiti. I bubutia Tamara are i Karawa, n aran Iesu Kristo, ngkana bwaai ake a tia n reireinai iai mitnare a bon koaua.
Anne te tai are ana bitaki iai bwaai. Mai imwiin anne, I ataia ibon irou bwa te euangkerio are e kaokaki e bon koaua. Akea temanna ae e kona n anaa te atatai anne mai irou. I ataia bwa tera te kawai ae n na iria, ao akea ae e kona ni bita anne.
Iai au titiraki aika a mwaiti ngke I uarereke. I reiakinna bwa Ngai natin te Atua, E tangirai, iai ana baire ibukiu, ao E tangiria ni kaekai au tataro. Aio te atatai are e bita au taratara iaon te maiu. I reiakinna bwa antai ngai ao te bwai are I karaoia e bon kakaawaki.
Boibuako ke Tei n Onoti?
Imwain atakina bwa Ngai natin te Atua, I tangiria ni boibuako ma aomata nako. I bon maaku bwa N na tei n onoti. Ma imwiin atakina bwa Ngai natin te Atua, I ataia bwa I kona n tei n onoti; I kona ni kaokoro.
Te tataro ao atakina bwa ngai natin te Atua e anganai te ninikoria ni kabwarabwara au namakin nakoia au karo, ma aki rang n ota. A taku bwa I bon rangi ni kakaitara ao n aki tau ni karaoakin au babaire bwa N na bwabetitoaki. A bon mama bwa natiia te mwane e a ira te aro ae kamimi nakon are n aia katei. I ataia bwa antai Ngai ao te bwai are I tangiria, ma I tangiria naba ni karineia au karo ao au kantaninga bwa a na karinea au aro.
Karineia Au Karo ke Katinanikua Aia Raraoma?
I kabwarabwara arou nakoia mitinare aine. E reke aia iango—a kona n roko n taetae ma au karo bwa aonga n namakina ae tamaroa riki ibukin te aro aei. I tuangiia bwa I maaku bwa a na bae n aki kan taetae au karo nakoia. Ngkanne temanna te titita e kaota ana iango bwa ti na ikotaki n aki mamatam.
Ngke I aki kana au kaingabong, tinau e a tabeaianga. “Bukin tera ngkai ko aki amwarake?” e titiraki. I kabwarabwara bwa I aki mamatam, ao anne are e a rangi n tabeaianga riki.
“Te moan ko a nakon te aro ae aki kinaaki, ao ngkai ko a manga aki amwarake. I a rangi n raraoma. I tounako! N na weteia mitinare akekei.”
Tinau e weteia tititati, ao e a karina naba ae a kaoaki nakon te katairiki n ara auti!
E rangi n nakoraoi ara tai ma ngaiia. Mitinare a reireiniia au karo te kuna n taromauri “Ngai Natin te Atua” (Boki n Anene, nambwa. 301), ao ti ikotaki n aneneia. Tamau e tangiria. Imwiin te katairiki ma tititati, akea mairouia au karo ae raraoma ngkana I nako n taromauri. Ao I namakinna bwa I kona ni karineia man maiuakinan te euangkerio ibukina bwa e bon kairai ni bwaai ni kabane ake a reireinai. I iango bwa ngkana I kona n tangiriia ao n akoiia n te tai ae maan, n tokin te tai a na bon oota. E anaa 35 te ririki imwiin au bwabetito, ma tinau e bwabetitoaki ao e nakon te tembora bon tabeua te ririki n nako!
Ataakin ae Ngai natin te Atua e a tia ni kariki bwaai aika a bati ni babaire inanon maiu. I ataia naba bwa ngkana ti ira te Tamnei ao ni karaoi bwaai ake e tuangiira Tamara are i Karawa, riki ngkana e kangaanga, E na bon kakabwaiaira. Anne bon te kabanea n raoiroi n rinerine n tainako.