Kairake n Ikawai
Bukin tera Tamara are i Karawa e Tangirai bwa N na Karekea te Reirei
N aki tabe bwa tera nanom aika raraoi ake ko tangiri, Tamara are i Karawa e na katauraoa te kawai ibukim bwa e na reke iroum.
Ngke te ataeinnaine ngai, I tatangiria n tainako bwa Tamau are i Karawa ao au utu ae ngkai ao ae e na roko a na kakatonga irou. I tangiria bwa N na karekei reirei ni kabane ake I kona ni katamaroa iai arou ao maiu.
I abau, Peru, te reirei ae rietata e rangi ni bobuaka ao, n tabo tabeua, e bon kaangaanga rekena. Aki reke irouia kaain au utu bwai ni kabane ake a kainnanoi ni boutoka au reirei. Ma au karo a reireinai bwa te mwakuri korakora, te mwakuri mwaaka, ao butiian Tamara are i Karawa ibukin te ibuobuoki e kona ni kakoroi bukin ara kantaninga aika a raraoi. Ao I baireia bwa N na mwakuri korakora.
N te moanrinan ao te kauarinan, I mwakuri korakora n au kamatebwai ni kona ni katamaroa arou ni katoa ririki. Imwiin te reirei te kauarinan, I karinaki bwa ataein te iuniwetiri ae te kabanea mai eta i Peru ao I karekea te tikaoratibu ae nakoraoi. N tiku ikekei, I mwakuri ma tabeua bootaki, n ikotaki ma karekean kataneiai ni bootaki ni mwakuri n te aonaaba, ao e reke au tai ni kairii aekakin nako karikirake n aekakiia nako.
N tain te kataneiai anne, I namakinna bwa bon te tai ae tamaroa ibukiu ni karekea au reirei n te Ingiriti. Ngaia are I a baireia bwa N na kamwaingaki nako Brigham Young University–Idaho. I namakina te rawawata, ma I ataia bwa Tamau are i Karawa e na buokai ni karekea te kouru aei—I bon riai n onimakinna ao ni karaoa tibwangau.
Bitakin te Baire
I a tauraoi n nako BYU–Idaho, ma inanon kanoakin beeba ni karinrin, I namakina te wirikiriki ae korakora bwa I riai moa n nako ni mitinare imwain ae I kamwaingaki nako ikekei. Ngaia are I a ira ana kantaninga Tamau are i Karawa ao I a weteaki bwa N na beku i Trujillo, Peru. Ngke I a okira mweengau, I baireia bwa N na oki nakon te iuniwetiri i Peru ibukina bwa I kona ni waekoa ni karekea au tikurii ikekei. E ngae n anne, I kunea bwa au tikaoratibu ikekei e a kamaunaaki ibukina bwa I kiitana au kamatebwai n te maan ae raka iaon teuana te ririki ni karaoa te mwakuri ni mitinare.
I bon rangi n rootaki ao n aki rau. I aki ataa te bwai ae N na karaoia. I aki ataia bwa bukin tera I a tia n namakinna bwa N na nako ni mitinare ngkana tokina bon kabuan au tai ni karekea te tikurii n te kaoreti.
Ma n te bong teuana, I uringnga au mition beretitenti ae e tuangai taekan te BYU-Pathway Worldwide. E kaoira bwa ti na katamaroa ara Ingiriti ao ni karekea te tibwanga aei ngkana ti okiri mweengara—ao I karaoia!
Mwanangau ma te BYU-Pathway Worldwide
I ataia bwa tuangakiu iroun au mition beretitenti taekan te BYU-Pathway bon tiaki te bwai ae maninnanti. Ngke I moan wakina te burokuraem iaon te Pathway, e tangiraki bwa N na mwananga e kaniia teniua te aoa ni katoa wiiki ni kaitibo ma kain au kurubu. I anganano n ae bati, ma I ataia bwa karekean te reirei e bon kakaawaki nakoiu ao nakon te Uea. Ao anganano akanne e kairi nakon kakabwaia aika a bati.
BYU-Pathway Worldwide bon wintoon te tibwanga are I kakakaea. E anganai karekean te reirei n te roo ae I kona ni kaitara, ao e anganai au tai ni mwakuri, ao ni buokai ni karekea au reirei n te Ingiriti. Ao rinanon aikai ni kabane, I karekeia raraou aika tamaroa ake a kaungaai bwa N na ninikoria ao n reitinako ni mwakuriia au kouru. I namakina korakoran riki tamneiu ao ni kona n riki bwa ana reirei Iesu Kristo ae tamaroa.
N tokina, I a riki bwa te moan ataei n te aonaaba ni karekea te baetura tikurii rinanon te BYU-Pathway Worldwide. Te reirei e a tia ni kauki tibwanga aika a raraoi ibukiu. I a riki ngkai bwa te tibetioriti ibukin te maiuraoi ao te riki n toronibwai ibukin Amerika Maiaki n te Aono are MeangMainiku n te Ekaretia, ao I riki naba bwa te mitinare n anganano ibukin te BYU-Pathway i Peru. I noora te ota ae bati irouia ataein te reirei n tatabemaniia, ao I kaungaia bwa a na waaki nako n aron kaungaakiu irouia raoraou n au tai n reirei. Rinanon te mwananga aio, I ataia bwa Tamara are i Karawa e a tia n raonai n rinanon mwaneka nako ake I rinanona.
Tamara are i Karawa e Tangirira bwa Ti na Tokanikai
Au mwananga e a tia ni kamatoa au koaua iaon te reirei. Ao I teimatoa ni baireia bwa N na teimatoa n rikirake ao n reiakina ae mwaiti ake I kona ni katoa bong. Ti mena iaon te aba bwa ti na tokanikai, ni kataaki, n rikirake, ni kakoaua arora n ongotaeka ni katan iaon te Tia Kamaiu ao n tau n oki nakon Tamara are i Karawa. Iroun te Atua, “bwaai ni kabane … bon bwain te tamnei”—n ikotaki ma te reirei (taraa Reirei ao Berita aika Tabu 29:34). Taneiai ni kabane ake ti karekei ao atatai ake ti karekei iaon te aba e na buokiira n riki n ai aron riki te Tia Kamaiu ao e na katauraoira ni karaoi babaire aika raraoi, ni beku n ae tamaroa riki n te aonaaba, ao n riki bwa bwaai ni mwakuri ni Baina.
Te reirei e katauraoa te kawai ni karekea te rabakau ao imwiina ni mwakuri, n tei ibukin te koaua ao te eti, ao ni maiuakina te maiu are e tangiriira bwa ti na maiuakinna Tamara are i Karawa—te maiu ae kaonaki n te kimwareirei.
I ataia bwa Tamara arei Karawa e kakabwaiai ara mwakuri, riki ngkana nanora e kan tokanikai ni beku ibukina ma Natina. I ataia bwa ngkana e anganiia Natina te kaetieti “E na bon katauraoa te kawai ibukiia are a na kona iai ni kakoroa bukin te bwai ae tua nakoia bwa a na karaoia” (1 Nibwaai 3:7). E tangirira bwa ti na tokanikai!
Ngaira n tatabemaniira ti riai ni kabonganai raoi tibwanga n reirei ao n rikirake ake e kaki iaon kawaira te Uea, ngkana tao rinanon BYU Pathway ke anga n reirei riki tabeua. E tangiriira ao e na bon kairiira n tainako. E tangiriira bwa ti na reiakin ni kabane ake ti kona ikai iaon te aba. Ao I ataia bwa ti kona n rinanon kakai aika korakora ngkai ti mwakuri ma te kimwareirei ao te mwakuri korakora ao n onimakina Ana kairiiri. I ataia bwa I a tia n rinanona.