ʻI Hoʻo Fakakaukaú pea ʻI ho Lotó

Naʻe faʻa muimui maʻu pē ʻa Nia ki hono lotó. ʻI he ngaahi fili ʻo e moʻuí, hili e lotua fakamātoato ʻene ngaahi filí, naʻá ne falala ki heʻene ngaahi ongó ke fakahinohino ia ki he fili ʻoku totonú.

“ʻOkú ke ʻiloʻi nai e ʻuhinga ʻoku mahuʻinga ai ke ke fakafanongo ki ho lotó? Naʻá ne fakamatala, “koeʻuhí ko e founga ia ʻoku talanoa mai ai ʻa e ʻEikí kiate kitautolú ʻo fakafou mai ʻi he Laumālie Māʻoniʻoní.”

Ne tupu hake ʻa ʻEtinā Nūnia ʻEteʻaki (Nia Palu), ʻi he Siasi Uēsiliana Tauʻatāina ʻo Tongá, ʻa ia naʻe takilotu ai ʻene tangataʻeikí, ka naʻe ʻi ai honau ngaahi kaungāmeʻa mo e fāmili tokolahi naʻa nau hoko ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe faʻa ʻaʻahi ange ki honau ʻapí ʻi Houma, Tongatapu ha taha ʻo e ngaahi kaungāmeʻa ʻiloá ke nau kai meʻakai pea mo pōtalanoa fuoloa mo fiefia mo e tamai ʻa Niá. Ko e kaungāmeʻa ko ʻení ko ʻĒliki B. Samuei, ʻa ia naʻá ne lolotonga hoko ko e Palesiteni ʻo e Misiona Nukuʻalofa Tonga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe toki fakanofo pē ʻa e hingoa matāpule ʻo ʻEletā Samueí pea naʻe tokoni ʻa e tamai ʻa Niá kiate ia ke mahino ki ai hono fatongiá.

Neongo ne faivelenga ʻene tamaí ʻi he Siasi naʻá ne kau ki aí, ka naʻe ʻikai ke ne fakafisingaʻi ha fakaafe ke ʻaʻahi ai ki he Siasi ne kau ki ai ʻa ʻEletā Samueí. ʻOku manatuʻi ʻe Nia ʻene maʻu houalotu sākalamēniti mo iá pea naʻá ne sioʻi fakalongolongo pē ʻa e founga lotu ʻo e Kāingalotu ʻi he Ngaahi ʻAho Kimui Ní. Naʻa nau fai ha meʻa naʻe ongo moʻoni kiate ia ʻo ne tākiekina e tūkunga ʻo ʻene moʻuí.

ʻI he ʻosi ʻene feinga akó, naʻe faiako ʻa Nia ʻi he ʻapiako Kolisi ko Kuini Sāloté, ʻa ia ʻoku fakalele ʻe he Siasi Uēsiliana Tauʻatāina [ʻo Tongá]. ʻI heʻene taʻu uofulu tupu siʻí, naʻá ne fakakaukau lahi ke mali ka naʻá ne ongoʻi taʻefiemālie.

Naʻe pehē ʻe Nia, “Naʻá ku fakakaukau ko hoku husepāniti he kahaʻú ʻe ʻikai ko ha taha inu [kava mālohi] pea ifi [tapaka] koeʻuhí ko ʻeku ngāué, ne u fakakaukau kapau te u fie maʻu ke u ngāue, ʻoku totonu ke loto fiemālie hoku husepānití ke ne tokangaʻi ʻema fānaú.”

Naʻe fuʻu mafatukituki ʻa e fakakaukau ʻo e malí ʻi he ʻatamai ʻo Niá. ʻI ha ʻaho ʻe taha, naʻá ne maʻu ha ueʻi fakalaumālie mālohi: naʻá ne fie maʻu ha ngāue foʻou.

Naʻá ne pehē, “Naʻá ku ongoʻi pē ʻi hoku lotó ʻe pau ke u faiako ʻi Liahona,” ʻi heʻene ʻiloʻi ko e ʻapiako māʻolunga fakalotofonua ia ʻoku fakalele ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ko e angamahení, ko e kau mēmipa mālohi pē ʻo e Siasí ʻoku nau faiako ʻi Liahoná, ka naʻe fuʻu mālohi ʻa e ongó ʻo ʻikai ke loto siʻi ai ʻa Nia. Naʻá ne kole ki heʻene faʻētangata, ʻoku ʻiloa ʻi he Siasí ʻi Tonga, ke tokoni ange ki heʻene tohi kole ngāué, hili ha taimi siʻi mei hono fakahuú, naʻe maʻu ʻe Nia e ngāué.

Ne teʻeki ke lava ha māhina kuó ne kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní peá ne fetaulaki vave ai pē mo hono hoa taʻengatá; naʻá na hoko ai ko ha fakafofonga tangata mo fefine ki he houalotu Kau Taautaha Kei Talavou ʻi he Siteiki Haʻakamé.

Kuo laka ʻi he taʻu ʻe 25 talu mei he muimui ʻa Nia ki hono lotó ki Liahoná. Ne ō fakataha e ngāue leleí, mo ʻene fili ne tataki ia ki he Siasí, nofo-mali ʻofeina pea mo ha fānau fakaʻofoʻofa ʻe toko fā—toko tolu kuo nau ʻosi ngāue fakafaifekau pea toko taha ʻoku teuteu ke mali ʻi he temipalé.

“Ko e temipalé ko ha tāpuaki fungani ia ʻo e Siasí Ni,” ko e lea ia ʻa Nia hili ʻa e toki mālōlō ʻa hono husepāniti ʻofaʻangá. “Naʻe ʻosi silaʻi homau fāmilí ʻi he temipalé ki taimi mo ʻitāniti.” Ko e nonga ʻi he ʻiloʻi ʻe toe fakataha mo iá ko ha tāpuaki mo ia ʻo e Siasí ni. “ʻOku ou ʻiloʻi ʻoku muʻomuʻa ʻa hoku husepānití ʻo teuteu homau ʻapí maʻamautolu,” mo ne malimali.

ʻI he ʻaho ní, ʻoku fakamālohia ʻa e ngaahi ueʻi fakalaumālie ʻa Niá ʻi he tataki ʻa hono tāpuaki fakapēteliaké. ʻOku uiuiʻi ia ʻe hono tāpuakí ki he tānaki ʻo ʻIsilelí, pea kuo mamata ʻa Nia ki hono fakahoko ʻo e ngaahi palōmesí ʻi heʻene hoko ko ha taki ʻi hono fāmilí mo e komiunitī fakalotofonuá.

ʻI he ngaahi ʻahó ni, ʻoku fakalahi ʻe Nia hono uiuiʻí ʻaki hono talitali—mo fafanga—ʻa e kau pataloni temipale mei Nuʻusila ʻoku nau ʻaʻahi mai ki he Temipale Tonga Nukuʻalofá lolotonga ia hono fakaleleiʻi honau temipalé. “ʻOku ou fai ʻeni koeʻuhí ʻoku ou ʻiloʻi ʻa ʻenau feilaulauʻi honau taimí mo e paʻanga ke omi ki Tonga ke moihū ʻi he Fale ʻo e ʻEikí.” Naʻá ne toe pehē, “Ko hono moʻoní, kapau ʻoku ʻi ai ha taha ʻoku fie maʻu ke haʻu ki he temipale ʻi Tongá, ʻoua ʻe hohaʻa kapau ʻoku ʻikai ke ke ʻilo ha taha heni pe ʻoku ʻikai te ke fakapapauʻi pe te ke nofo ʻi fē, haʻu pē. Ko hoku fāmilí ko ho fāmilí ia. Te mau tokangaʻi koe.”

ʻOkú ne fai foki ia koeʻuhí, “ʻi he taimi ʻokú ke ongoʻi ai ʻa e Laumālié ʻi ho lotó, te ke ʻiloʻi ʻoku ʻi ai hoʻo ngāue ke fai, pea he ʻikai lava ʻe ha meʻa ʻo taʻofi koe,” ko ʻene leá ia.