“Ikōņaan Etal n̄an Paradise”
Ke ikar jar im kajjitōk ippān Anij kōn iaļ in ekāāl, ikar en̄jake eļapļo̧k tōmak kōn m̧ool eo em̧ōj aō loe.
Pija ko jān Getty Images, pija jān model
Ikar juon membōr eo eļap an kate ilo bar juon kabun̄, bōtaab kiō ikar ijjinoe ekkatak kōn katak ko an kōn jikin en̄taan an ro rijerawiwi. Lōmņak in ej katakin bwe jetōb eo an juon, ālkin mej ilo mour in, ej etal n̄an juon jikin āinļo̧k wōt kalbuuj, ijo ej aikuj karreo jān jerawiwi m̧okta jān an etal n̄an paradise.
Ilo aō kar ļōmņak kōn jetōb ko an ro rej en̄taan ilo jikin kapped in, ikar pijaik make mour in jetōb eo aō ilju im jakļaj im jemjerā eo aō ippān Jisōs Kraist. Ikar jinoe jar, “Ta eo ij aikuj kōm̧m̧ane n̄an ko jān jikin en̄taan an rijerawiwi? Ikōņaan etal n̄an paradise.”
Men eo m̧oktata ekar itok n̄an kōļmenļo̧kjeņ eo aō ej n̄an mour kōn Kien ko Jon̄oul. Ikar en̄jake bwe ikar, iakwe eo an Irooj emaron̄ kōtļo̧k eō bwe in jab etal n̄an jikin en̄taan an rijerawiwi. Ikar kapene ippa n̄an kōjparok kien ko im jinoe jitlo̧k ilo iien eo aitok, jar, ekkatak jeje ko rekwojarjar, im kejōkļo̧kjeņ.
Ilo iien in, ikar en̄jake n̄an kajjitōk juon kajjitōk ikar jab ļōmņake kōn juon taktō ilo clinic eo ijo ikar jerbal ie āinwōt juon chief accountant.
“Dr. Thibaut,” ikar ba, “ej ke pād Irooj Jisōs Kraist ilo m̧ōn jar eo kwoj jar ie?”
Ekar kalikkar bwe ej uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Im jān ijin, Jetōb ekar tōl iien kōmeļeļe eo am̧ro. Ikar kajjitōk ippān kōn oktak ko ikōtaan kabun̄ eo ej jar ie im eo ij jar ie. Ekar ba n̄an n̄a kōn Bok in Mormon. Ilo am̧ro wōnm̧aanļo̧k im bwebwenato, būruō ekar obrak kōn lan̄lōn̄. Ikar en̄jake bwe ikar bōk uwaak in jar ko aō.
Ruo raan tokālik mijenede ro rekar letok n̄an eō juon Bok in Mormon, eo ikar riiti im ekkatak kake ippāer. Ikar lo an ļap an em̧m̧an n̄an ekkatak men ko rekāāl jān jeje ko rekwojarjar. Ikar jinoe pokake Naan in Mālōtlōt.
Ke ikar kile bwe ekar jako aō itok limo ilo m̧ōn jar eo ikar jar ie, ijo ekar ļap aō bōk koņaaō ie, ikar ļōmņak ta eo ej waļo̧k. Ikar jar im kajjitōk jipan̄ ippān Anij kōn iaļ in ekāāl. Ke ikar jar, ikar en̄jake eļapļo̧k tōmak kōn m̧ool eo em̧ōj aō loe. Ikar kālet n̄an kobaļo̧k ippān Kabun̄ in, men̄e ikar jeļā bwe inaaj jelm̧ae kaarmejete im en̄taan.
Kaarmejete im en̄taan ekar itok, ak Irooj ekar kōkajoor eō. Ijeļā bwe Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar uwaak eo n̄an akweļap in jar eo aō: “Ikōņaan etal n̄an paradise.” Ijeļā imaron̄ etal n̄ane ālkin aō mej, eļan̄n̄e inaaj pād wōt ilo aō tiljek im kōjparok kien ko an Anij.