Ruwainene n̄an Māākjiin In
Laļ in Eaikuji Kōrā ro Retiljek
Kōmeļeļe ko jān Toni Oka
Jān raan ko m̧oktata an Jined Iv, kōra ro ewōr juon aer eddo eo eļap an aurōk ilo jipan̄ kakūrm̧ool karōk eo an Anij n̄an Ajri ro Nejin. Allōn̄ in, ewōr ad bar iien n̄an ekkatak eļapļo̧k kōn jet iaan kōrā ro rekar painieer ilo raan ko m̧oktata in Jepļaaktok eo an gospel in. N̄an waanjon̄o̧k, ilo peij 16 jemaron̄ riit kōn Jane Manning James im waanjon̄o̧k eo an kōn peran in kijejeto. Ilo ad ekkatak Katak im Bujen Ko 25, jej ron̄ naan ko an Irooj n̄an Emma Smith kajjitōk ippān n̄an kōm̧m̧ane juon kakkobaba in al ko rekwojarjar n̄an juon bok.
Jepļaaktok eo ej wōnm̧aanļo̧k wōt ilo raan kein ad, im laļ in ej aikuji eļapļo̧k jān kar m̧okta jipan̄ ko reļļap an kōrā ro retiljek. Ilo peij 12, komaron̄ riit kōn wāween an kōm ro rej jerbal āinwōt Opiija ro Routiej ilo Kabun̄ in m̧ōj am lo an kajoor in priesthood eo jerbal ilo mour ko am. Kajoor in priesthood in, eppeļo̧k n̄an jim̧or em̧m̧aan ro im kōrā ro, ej ta eo ej kōtļo̧k bwe jerbal eo an Anij en wōnm̧aanļo̧k wōt ilo laļ in.
Mekarta kwe em̧m̧aan ak kōrā, iiō, kūl, ak jekjek ko jet, jej aolep ajri ro rejitōnbōro nejin Anij ro ewōr ippāer jolet eo ekwojarjar im ewōr maron̄ eo eļap ippāer.
Ilo kautiej,
Būreejtōn Joy D. Jones
Būreejtōn eo Eutiej an Būraimere