Jipan̄ Ikkijeen Kōkajiriri
Ta eo Būruum̧ Eo Ekar Katakin Eō kōn Mour in Kōkkaajririik Ajri ro Nejid
Rijeje eo ej jokwe ilo Utah, USA.
Jerbal ko ilo m̧weo an ajri ro nejū rekar jipan̄ uwaake jar eo aō.
Kōmeļeļe jān David Green
Ikar rūj juon jibbon̄ im en̄jake aō m̧ōk. Eddo ko aō āinwōt juon pāāren relukkuun eddo, im ikar ekkōl kōn m̧ōjņo̧ ko aō. Āinwōt juon kōta e eļap ikōtaan wāween aō pijaikļo̧k n̄a āinwōt juon pāāren im jekjek in lukkuun n̄a kiiō.
Ikar bukwelōlō im jar im kar ba n̄an Jemedwōj Ilan̄ kōn jon̄an aō iakwe E. Ikar ba n̄an E kōn jon̄an aō iakwe ajri ro Nejin ekar kōjeraam̧m̧an baam̧le eo aō kake. Im ikar jino ba n̄an E wāween aō kajjeon̄ erom̧ juon pāāren eo em̧m̧an, bōtaab ikar en̄jake bwe ikar jab kōm̧m̧ane juon jerbal ebwe an em̧m̧an. Ke ikar jar, ikar ļōmņak kōn jon̄an an ļap im em̧m̧an naaj kar ajri ro nejū n̄e Anij enkar Make kajiririik er.
Innem juon pija ekar itok n̄an kōļmenļo̧kjeņ. Ikar pijaikļo̧k an ajri ro nejū būruumi jikin kōmat eo. Menin ej m̧ōttanļo̧k jerbal ko rellōn̄ em̧ōj aō karōke n̄an er n̄an kōm̧m̧ane n̄an jipan̄ baam̧le eo am. Jet iien lale aer kōm̧m̧ane ekōm̧m̧an menin aō ettōn̄dikdik kōnke rej ekkatak wōt im elōn̄ jikin ko relikjab jāni n̄an būruum̧i. Ak ij kōtļo̧k bwe ren kōm̧m̧ane, ejjeļo̧k oktak jān jerbal ko jet, kōnke ewōr juon aō visiōn eļapļo̧k kōn er. Ijeļā bwe kōn aolepān kōmālmel kein rejjab jim̧we, renaaj ekkatak im eddōkļo̧k. Ejjab to, renaaj maron̄ kōm̧m̧ane ilo m̧ōkaj im jejjōt āinwōt aō maron̄ kōm̧m̧ane. Visiōn eo me kōn aer erom̧ ro rej kōm̧m̧ani kālet ko aer make im lale er make eļapļo̧k an em̧m̧an jān eļan̄n̄e inkar make tōn kōm̧m̧ane aolep men. Ijjab kajiririik ajri ro n̄an aer kōm̧m̧an tōprak eo ekadu kitien—ij kajjeon̄ jipan̄ er n̄an kōm̧m̧an tōprak ilo juon iien eaitok kitien.
Im ļōmņak eļan̄n̄e bōlen juon men rōt in ej m̧ool n̄an ro Jined im Jemed Ilan̄ barāinwōt. Jemedwōj Ilan̄ ejeļā bwe jejjab maron̄ jejjōt ilo ad kōm̧m̧ane jerbal eo āinwōt pāāren ro. Jet men ko jej kōm̧m̧ani renaaj bōlen kōm̧m̧an bwe E en ilbōk, ak E ej kōtļo̧k bwe kōnke E ejeļā bwe jej ekkatak im eddōkļo̧k. E ewōr ippān kōjtadikdik im ļōmņak kōn iien eo aitok kitien. E ej pijaikļo̧k kōj ad oktak n̄an pāāren ro juon raan āinwōt E, maron̄ iakwe ilo ejjeļo̧k kalijōkļo̧k, katakin ilo kijejeto, im kōm̧m̧an waanjon̄o̧k ilo jejjōt. Ilo ad kōm̧m̧an jidilo̧k, E ejeļā bwe jej ejaaki jeļā ko raorōk ko āinwōt kijenmej im iakwe em̧ool. Im em̧ool, jeļāļo̧kjeņ eo An, E ej kōtļo̧k ad jerbal im wōtlo̧k im bar kajjeon̄.
Eļap aō kōņaan bwe in juon pāāren eo ekadede jejjōt! Āinwōt an kar Josep Smith je, Emakijkij aō loe aō make likjab “into many foolish errors” (Joseph Smith—History 1:28). Ak ij lo kainem̧m̧an ilo aō jeļā bwe Anij emeļeļe kōn būruo, eo ej meļeļein E ejeļā bwe ij kajjieon̄ n̄an jeļā katakin. Ij en̄jake lan̄lōn̄ n̄e ajri ro nejū rej kajjitōk, “Ekōjkan aō maron̄ em̧m̧anļo̧k aō kōm̧m̧ane menin?” im ij lo aer kōņaan em̧m̧anļo̧k. Ebwe bwe imaron̄ āinwōt in n̄an Jemedwōj Ilan̄.
Āinwōt an aolepān ļōmņak kein pād ilo kōļmenļo̧kjeņ eo aō, ekar bar wōr juon aō inepata. “Ak eļan̄n̄e bōd in aō jerbal āinwōt juon pāāren ej kōmetak ajri ro nejū” Iaar kajjitōk. “Ijjab kōņaan kabōjrak er, men̄e inaaj erom̧ juon men eo eļap an em̧m̧an ilo wōnm̧aanļo̧k in jerbal in.”
Bar juon alen, aō pijaikļo̧k ajri ro nejū karreo ekar jiktok ilo kōļmenļo̧kjeņ eo aō. Ālkin an kar leddik eo nejū lukkuun kate kajjeon̄ m̧aabwe m̧weeo im kiiō ekkairirļo̧k im ikkure ak kam̧ōje bar juon jerbal, eiten aolep iien n̄aij kwaļ jikin ko me redepdep. Im ikar ļōmņak kōn iakwe eo an ejjeļo̧k jem̧ļo̧kin im kajoor eo an Jisōs Kraist, eo me Pinmuur eo An ej jelōt aolepān jekjek ko rejjab em̧m̧an ilo mour in. An iakwe ebōk jikin m̧ōjņo̧ ko ad āinwōt juon pāāren, āinwōt an iakwe eo An bōk jikin metak ko ajri ro nejū rej en̄taan kaki kōn m̧ōjņo̧ ko ad. Ilo juon wāween eo me ejjeļo̧k juon iaad emaron̄ kōmeļeļeik, Pinmuur eo An emaron̄ kōmour aolepān .
Ij bōk juon kaeņōm̧m̧an eļap ilo revelesōn in aō make ikar bōke raan eo. Ikar en̄jake an Jetōb katakin eō bwe kijejeto ko aō rem̧m̧antata, ilo jerbal ippān doon ippān Irooj, rebwe. Ijeļā bwe Jemedwōj Ilan̄ enaaj wōnm̧aanļo̧k wōt im jerbal ilo mour ko an ajri ro nejū, jikin kōn jidik, n̄an kajjejōt ta eo ij kōm̧m̧an im ejjab jejjōt. Kōn jipan̄ eo An, ajri ro nejū remaron̄ juon raan romaak ilo jim̧we eo aer make, jon̄an meram in wōt eļan̄n̄e Jemedwōj Ilan̄ ekar kajiririik er jinointata. Ijoke karōk eo An ej barāinwōt jerbal n̄an ukot n̄a ilo aō wōnm̧aanļo̧k im kajjieon̄—kōkwojarjar im ļōme n̄a n̄an erom̧ eļapļo̧k āinwōt E. Ewi jon̄an an ļap jeļāļo̧kieņ eo an ad Anij!