Me Yaco na Nomuni Lewa

Na noda iVakabula o Jisu Karisito e noda ivakaraitaki cecere ni kena vakatarai me yaco na lomai Tamada. Ena were mai Kecisemani, ni masu tiko na Karisito vua na Tamana, Nona colata na ivalavala ca, na rarawa, kei na malumalumu ni kai vuravura kecega, au sega vakasamataka rawa na titobu ni mosi kei na rarawa ni yalo A sotava tiko a kaya, “I Tamaqu, kevaka e rawarawa, me lako tani mada vei au na bilo oqo,” ia na loloma cava sa uasivi kei na Nona talairawarawa A vakaraitaka ena nona cavuta ena icegu vata o ya, “ia me kakua ni vaka na noqu lewa, me vaka ga na nomu lewa.”¹

Ena ivolanikalou eda wilika kina baleti ira na tisaipeli yalodina ka ra wasea vata kei na iVakabula na itovo ni yalo vakaoqori ka vakatara me vakayacori ga na loma i Tamada. Ni bera nona dregata na parofita Apinatai na nona ivakadinadina kei na nona bula a wasea ena yaloqaqa na itukutuku ni kosipeli ka kaya, “Ia au sa na vakaotia mada ga na noqu itukutuku; . . . veitalia na vanua au lako kina, ka meu vakabulai ga.”²

Me vakataki, Setareki, Mesake kei Apiteniko ena nodratou vakatusa vei Tui Nepukanesa, “Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni bukawaqa, ia ena vakabulai keitou mai na ligamuni na tui.

“Ia ke sega, mo ni kila, koi kemuni na tui, ni keitou sa bese ni qarava na nomuni kalou, keitou sa bese talega ni vakarokoroko ki na matakaukoula ko ni sa vakaduria.”³

Kei Amoni, na luvei Tui Mosaia, ena yaloloma titobu me “vunautaka na vosa ni Kalou ki na dua na mata tamata, yalo kaukauwa ka itovo vakarerevaki,”⁴ na nona gagadre titobu a vakalekalekataki ena nona kaya vei Tui Lamonai: “Ia, au sa via tiko vata mada kei ira na tamata oqo me dua na gauna; io, ena rairai yacova sara na gauna au mate kina.”⁵

O ira na tisaipeli yaloqaqa ni Turaga era a sega ni yavalati ena nodra ivakadinadina me vaka na iVakabula, era vakatara me yaco na loma I Tamada mai na nodra dui bula yadua.

Au nanuma na gauna au se gone kina, niu dau vakarogoca na italanoa ni nona saumaki o Tamaqu. Ena gauna e kau yani kina na kosipeli i Jisu Karisito ki Samoa, e sega ni ciqomi sara vakavinaka. E vuqa era a vakarerei ena lotu vou oqo ka veivala ka vakacacani ira era digitaka mera curu kina. E vuqa na saumaki vou era cemuri mai na nodra vale ena koro ka vuqa era dro ki na vanua ni ivakaruru. O tamaqu, me vaka ni gonetagane ka dau via kila na ka, a vaqara me kunea se cava e vakavulica na lotu vou oqo. Ni toso tiko na gauna a papitaisotaki ki na Lotu i Jisu Krisito ni Yalododonu Edaidai.

E tete na itukutuku e loma ni koro ni sa lewena na Lotu o Tamaqu, e dua na itokani mai na nona koro a lomaleqa ka vakasalataki koya ni sa rogo tiko na italanoa me na vavi bulabula ena lovo (na ovani vatu katakata e dela ni qele), ka dro kina o tamaqu ka laki maroroi vei Malietoa Talavou Pe’a Fitisemanu kei Alisa Fitisemanu. E dina ni vakarerei na nona bula e yalodina tiko ga ki na nona vakabauta vou. Me vaka e vakavulica na iVakabula “dou na kilai ira ena vuadra.”⁶ Na veivakalougatataki ni Kosipeli i Jisu Karisito Vakalesuimai ena neirau bula vakaveiwatini kei na nodra vuvale na luvei keirau, era vua ni vakabauta i tamaqu.

Peresitedi Russell M. Nelson e vakavulica, “Na taro vei keda yadua, se matatamata cava ga eda lewena, e tautauvata. O sa tu vakarau beka mo laiva me qaqa tiko ga na Kalou ena nomu bula? O sa tu vakarau beka mo laiva na Kalou me dau ni veivakayarayarataki bibi duadua ena nomu bula? Ko na vakatara na Nona vosa, Nona ivakaro, kei na Nona veiyalayalati me vakayarayarataki kina na veika o cakava e veisiga? Ko na vakatara na Domona me liu mai vei ira na vo domo kece? O sa tu vakarau mo laiva na veika cava ga e gadreva o Koya mo cakava, me bibi duadua main a vei sasaga kecega? O sa tu vakarau mo solia na nomu gagadre kece me Nona?”⁷

Au vakavinavinakataka vakalevu na ivakaraitaki i tamaqau, ko ira na italai yalodina ni Turaga ka ra tukuni oqo kei ira na tisaipeli kei na tamata yalodina i Karisito. Au vakavinavinaka tawamudu ki na ivakaraitaki uasivi ni noda iVakabula, ni dau solia na Lomana vei Tamana.

Ni da ciqoma na veisureti nei Peresitedi Nelson mo “digitaka mo ni laiva na Kalou me qaqa tiko ga ena noda bula”,⁸ eda na vakadinadinataka vakai keda ni Kalou e “Kalou ni cakamana.”⁹ au vakabauta ni sa na qai rawa meda kaya ena loma e talairawarawa ka yalomalumalumu, Noqu Kalou, “me kakua ni yaco na noqu lewa, me yaco ga na nomuni lewa.”¹⁰