Jemedwōj Ilan̄ Ekōņaan Bwe Jen Ro̧o̧lļo̧k

Ewi jon̄an ad jeraam̧m̧an āinwōt Armej ro Rekwojarjar ilo Raan ko Āliktata n̄an jeļā bwe gospel eo em̧ōj an jepļaaktok. Karōk in lo̧mo̧o̧r ej lukkuun “karōk in m̧ōņōņō eo eļap” (Alma 42:8). Armej ro retōmak im m̧ool, renaaj bōk nōbar eo indeeo im̧aan mejen Anij.

Āinwōt an waļo̧k ilo Katak im Bujen Ko, emaron̄ aolep ro nejin Jemedwōj Ilan̄ renaaj deļo̧n̄e juon aiboojoj in laļ. Kōn Pinmuur eo an Rilo̧mo̧o̧r, ro renaaj “ilo jerkakpeje eo an ro rem̧m̧an” (Katak im Bujen Ko 76:17) naaj weppān im jolete aiboojoj eo an celestial.

Aolep membōr ro an Kabun̄ eo an Jisōs Kraist im Armej ro Rekwojarjar ilo Raan ko Āliktata rej bōk katak in. Jerata eo, jet rejjab tōmak ke ej bar n̄an er make. Rej kōm̧m̧an bōd. Mour in jetōb eo aer ej wōnm̧aanļo̧k wōt, men̄e edim, jidik wōt an wōnm̧aanļo̧k. Rej baj ļōmņak eļan̄n̄e enej bwe aer em̧m̧an n̄an deļon̄e laļ eo an celestial.

N̄e kwoj lo eok make ilo kurup in, keememej naan ko an Irooj n̄an kurup in ritōmak ro jet: “Kotak bōrami im kom̧in ineem̧m̧an, bwe I jeļā kōn bujen eo kom̧ ar kōm̧m̧ane n̄an Eō” (Mosaia 24:13).

Anij ej iakwe kōj im ekōņaan bwe jen ro̧o̧l n̄an im̧aan Mejen. Kwoj epaakeļo̧k n̄an bōk lo̧mo̧o̧r im jepļaakļo̧k n̄an Ippān jen am̧ baj ļōmņake.

Pija

woman resting her head in her hands

Ilo Katak im Bujen Ko 76, Irooj ej kwaļo̧k wāween an ro Nejin maron̄ jolete laļ eo an celestial. N̄e kwe juon membōr in Kabun̄ eo im wōr juon naan in kam̧ool, em̧ōj am̧ jino iaļ in am̧, āinwōt an kar kōmeļeļeiki ilo Katak im Bujen Ko.

• Jej aikuj bōk “naan in kam̧ool kōn Jisōs” im tōmak “ilo etan” (eoon 51).

• Jej aikuj peptaij kōn tulo̧k ilo dān (lale eoon 51).

• Jej aikuj “bōk Jetōb Kwojarjar jen likūt pā ko ioon bōrad” jen juon eo ewōr mālim in priesthood (eoon 52).

Jon̄ak ko jet, ijoke, ebōk iien kōn kijejeto, im jet membōr rej en̄jake ebweer n̄e rej likjab. Jej aolep jerbale men kein rekkar. Kam̧m̧oolol kōn Pinmuur eo an Jisōs Kraist, jemaron̄ kōttōpraki aolep.

• Kōjparok kien ko im “kwaļkwoļ im karreo jān aolep jerawiwi ko [ad]” (eoon 52).

• “Anjo̧ ioon kōn tōmak” (eoon 53).

• Im “liāp jān Jetōb Kwojarjar in kallim̧ur” (eoon 53), eo ej Jetōb Kwojarjar “n̄an Jemān ej bwe kain̄i in lo̧mo̧o̧r ko [ad] kar kōm̧m̧ani im bwe bujen ko kar ekkeijel n̄ani kar kōjparoki.”¹ Kallim̧ur ko an Jemed kōn liāp in n̄an “aolep ro rej jim̧we im m̧ool” (eoon 53).

N̄an “jim̧we im m̧ool,” Būreejtōn Ezra Taft Benson ekar kwaļo̧k (1899–1994), ej “juon en̄jake eo n̄an ro reperan kōn naan in kam̧ool eo kōn Jisōs. Rej ro reperan n̄an jurake m̧ool im wānōk. Rein rej membōr in Kabun̄ in ro rej kakūrm̧ool kūr ko aer ilo Kabun̄ in (lale K&K 84:33), kōļļā juon m̧ōttan jon̄oul im jāān in jortak ko aer, mour erreeo, rejetake ritōl ro aer ilo Kabun̄ in ilo naan im jerbal, kōjparok raan in Jabōt āinwōt juon raan ekwojarjar, im pokake aolep kien ko an Anij.”²

Jolete aiboojoj eo eutiejtata ilo laļ eo an celestial, eo ekkā ba āinwōt mour ijo eutiejtata, ijo āliktata ekkar. Jej aikuj deļo̧n̄e “bujen in m̧are eo ekāāl im ejjeļo̧k jem̧ļo̧kin” (Katak im Bujen Ko 131:2), kar kōm̧m̧an ilo tampeļ kōn mālim eo an priesthood. Ekkar n̄an karōk in tiriam̧o eo an Jemed, jejeļā bwe kōjeraam̧m̧an ko an celestial naaj waļo̧k ilo mour eo juon n̄an ro raar jab wōr aer iien em̧m̧an n̄an kain̄i ko an liāp ilo tampeļ ilo mour in ak ro raar m̧ool n̄an jem̧ļo̧kin.

Jej ekkatak ilo Bok in Mormon bwe aolep ro nejin Anij ro rej kōjparok kien ko An im m̧ool, jekdoon jekjek rot ko ilo mour in, naaj jeraam̧m̧an im “naaj bōk er n̄an lan̄, bwe ren maron̄ ” jokwe ippān Anij ilo wāween m̧ōņōņō eo ejjeļo̧k jem̧ļo̧kin” (Mosaia 2:41). Aolep iien ewōr kōjatdikdik n̄an kōj kōn tiriam̧o im iakwe in ilo karōk in lo̧mo̧o̧r in an Jemedwōj Ilan̄.

Pija

man praying

Pija jān Hyun Lee

Rikanaan eo ad ejitenbōro, Būreejtōn Russell M. Nelson, ekar kwaļo̧k: “Irooj ejjab kōtmāne wāppen jān kōj ilo wāween in ilo ad eddōkļo̧k n̄an indeeo. Ak Ej kōtmāne bwe en ļapļo̧k ad erreoļo̧k. Ukweļo̧k aolep iien ej iaļ eo n̄an erreo, im erreo ej bōktok kajoor.”³

Būreejtōņ Nelson ekar bar ba bwe “kōm̧m̧ani im maron̄ kōm̧m̧an em̧m̧anļo̧k kajjojo raan” ej bōktok n̄an kōj “kajoorļo̧k.”⁴ Ilo ad kōjerbal kajoor in ņae biktokin em̧m̧aan ak kōrā rot kōj (lale Mosaia 3:19), jej ro̧o̧lļo̧k ilo iaļ in n̄an ippān Jemed.

Kōnke ejjeļo̧k juon men ettoon emaron̄ deļo̧n̄ im̧aan mejen Anij (lale Moses 6:57), jej jerbal kajjojo raan kōn jetōbin keppopo—ilo ļōmņak ko ad, ikdeelel ko ad, im m̧willid. Ilo naan ko an Rijilōk Paul, jej kappukot n̄an erom̧ menin kōm̧anm̧an ko rekāāl ilo Kraist, jidik kōn jidik n̄an men ko ṃokta re ļotļo̧k, lo, rej erom kāāl (lale 2 Korint 5:17). Oktak in ej itok ļain ioon ļain ilo ad kajjieon̄ in em̧m̧anļo̧k jidik aolep raan.

Ļoor Rilo̧mo̧o̧r n̄an kajjieon̄ in erom̧ āinwōt E ej juon jerbal in kaarmejjete, eo E ekar kalikkar āinwōt bōk ad debwāāl (lale Matu 16:24–26). Jej bōk ad debwāāl ilo ad:

• Lale kōņaan ko ad, wāween ad m̧ōn̄ā, im ikdeelel ko.

• Ilo kijenmej “ajeļo̧k e aolep men ko Irooj ej lo ekkar n̄an kaddoik ņa” iood (Mosaia 3:19).

• “Karmejete kom̧ make jān aolep men ko rejjab em̧m̧an” (lale Moronai 10:32).

• Leļo̧k ankilaad n̄an ankilaan Jemed, āinwōt kar Rilo̧mo̧o̧r.

Im ta eo jej kōm̧m̧ane n̄e jej bōd? Jej wōnm̧aanļo̧k iien otemjej n̄an ukweļo̧k im akweļap n̄an Anij n̄an “kōjerbal bōtōktōkin pinmuur eo an Kraist bwe jen maron̄ bōk jeorļo̧k in jero̧wiwi ko ad” (Mosaia 4:2). Jej bar kajjieon̄ in anjo̧ ioon m̧ōjņo̧ ko im eļļā jen jerawiwi. Jej jar kōn jouj, n̄an “bōk kajoor im jetōbin kōmour” kōn Jisōs Kraist.⁵ Jej bōk ad debwāāl im bar jino iaļ in ad, jekdo̧o̧n eto im pen, n̄an āneen kallim̧ur eo im̧aan Mejeer.

Mour wanbanban in ad im mour indeeo rej jerbal im aiboojoj eo an Anij (lale Moses 1:39). Jerbal eo ad ej n̄an bōk aiboojoj in me ekoba peran kōn naan in kam̧ool eo ad ilo laļin.

Ilo visōn eo, Rikanaan Josep Smith ekar lo bwe ro retiljek “renaaj anjo̧ ioon aolep men otemjeļo̧k” (Katak im Bujen Ko 76:60). Tokālik, ekar kwaļo̧k, “Aolep tūroon ko im mo̧jen ko, tōln̄an ko im kajoor ko, naaj kwaļo̧ki im likūti ioon aolep ro rekar kijenmej ilo peran kōn gospel eo an Jisōs Kraist” (Katak im Bujen Ko 121:29).

Ilo ad lōke kallim̧ur kein, jenaaj make ebweer, ioon ro rejitenbōro ippād, ak ro jet nejin Anij. Jenaaj kajjieon̄ kōm̧m̧ane ijo em̧m̧antata ilo kōj im jipan̄ ro jet kōm̧m̧an ejja āinwōt in. Ilo kōj make, ejjeļo̧k juon iaad enaaj em̧m̧anļo̧k an bōk lo̧mo̧o̧r ilo laļ eo an celestial, ijelo̧kin “kōn tōllo̧ke, im tiriam̧okake, im jouj an Messaia Ekwōjarjar” (2 Nipai 2:8), kōjeraam̧m̧an in ej pād wōt n̄an tōpare.

Ilo ad tiljek wōt, ij kam̧ool bwe jenaaj jolete “m̧ōņōņō eo ejjeļo̧k jem̧ļo̧kin” ilo im̧aan mejen Jemed im Nejin. “O keememej, keememej bwe men kein rem̧ool; bwe Irooj Anij eaar kōnono kake” (Mosaia 2:41).