Katak ko Repidodo an Gospel eo
Jemedwōj Ilan̄ Ekōņaan Bwe Jen Mōņōņō
Ilo ad keememej karōk in m̧ōņōņō eo an Anij, jemaron̄ lo lan̄lōn̄ men̄e epen mour in.
Aolep pija, ijeļo̧kin tuabwijmaron̄, jān J. Kirk Richards
Mokta jen ad kar lo̧tak ioon laļin, jaar aolep mour ippān Jemedwōj Ilan̄ āinwōt ajri in jetōb ro Nejin. Eaar kwaļo̧k juon karōk n̄an jipan̄ ro Nejin ekkatak im eddōkļo̧k. Kōn karōk in An, jemaron̄ kar erom̧ āinwōt E im erreeo n̄an m̧ōņōņōik mour indeeo. Karōk in em̧m̧an kōnke Nejin Anij, Jisōs Kraist, ekar itok n̄an laļin n̄an en̄taan kōn jerawiwi ko ad, juon en̄taan etan Pinmuur.
Karōk eo an Jemedwōj Ilan̄ etan ej karōk in
-
m̧ōņōņō (lale Alma 42:8).
-
lo̧mo̧o̧r (lale Moses 6:62).
-
pinmuur (lale Jekab 6:8); ak
-
tiriam̧o (lale Alma 42:15).
Ilo an men kein im eoon ko jet kalikkar, Jemedwōj Ilan̄ ekōņaan bwe jen erom̧ āinwōt E, jepļaakļo̧k n̄an Ippān, im lukkuun m̧ōņōņō (lale Moses 1:39).
Jaar Itok n̄an Laļin n̄an Ekkatak im Eddōkļo̧k
Anij ekar jilkintok kōj n̄an laļin, ijo jemaron̄ in bōk juon ānbwin kanniōk (lale Jenesis 1:26–27). Jej aikuj ānbwin n̄an jipan̄ kōj en̄jake mour ioon laļin.
Anij ekar jeļā bwe jenaaj en̄jake m̧ōņōņō aolep iien. Jej en̄jake ebweer, metak, im em̧ool mej. Ak kōn apan̄ ko an mour in, Jemedwōj Ilan̄ ej jipan̄ kōj ekkatak im eddōkļo̧k.
Anij eaar bar letok n̄an kōj anemkwoj, maron̄ eo n̄an kālet em̧m̧an ak nana. Ej kōtļo̧k ad kālet n̄an kōj make ta eo jej ļōmņake im kōm̧m̧ane. E ekar letok n̄an kōj jeje ko rekwojarjar im rikanaan ro remour n̄an jipan̄ kōj ekkatak n̄an kālet ta eo ejim̧we (lale Ebream 3:25).
Kajjieon̄ āinwōt Jisōs Kraist
Anij ekar jab jilkintok kōj n̄an laļin ilo an ejjeļo̧k juon waanjon̄ak n̄an ļoore (Jon 13:15). Anij eaar jilkintok Nejin, Jisōs Kraist, n̄an kwaļo̧k n̄an kōj iaļ eo. N̄an ekkatak kilen ļoor E, jemaron̄ riiti jeje ko rekwojarjar n̄an jeļā wōn E im ta eo E ekar kōm̧m̧ane ilo mour eo An ioon laļin. Jemaron̄ bar kōm̧m̧ane ijo konaad em̧m̧antata n̄an āinwōt Kraist n̄an pokake Anij im iakwe ro jet.
N̄e jej kōm̧m̧an bōd, jej kajjitōk n̄an jeo̧rļo̧k bōd im epaakeļo̧k kajoor in Pinmuur eo an Jisōs Kraist n̄an jipan̄ kōj oktak. Jemaron̄ m̧ōņōņō ilo ad kajjieon̄ kajjojo raan n̄an erom̧ āinwōt E.
Mej Ejjab Jem̧ļo̧k eo
Ilo mej, jetōb ko ad rej ilo̧k n̄an laļ eo an jetōb. Ijeņ rej wōnm̧aanļo̧k wōt im ekkatak ilo ad keppopo n̄an Jerkakpeje.
Ilo iien Jerkakpeje, ānbwinnid im jetōb ko ad renaaj bar koba. Ānbwinnid enaaj weppān, im jeban bar mej ak nan̄inmej. (Lale Alma 11:44–45.) Āinwōt an kar Jisōs Kraist mej im bar mour, jenaaj bar mour.
N̄e Anij enaaj ekajete kōj, E enaaj kile kōn jerbal im ikideelel ko ad. N̄e jaar kajjieon̄ in kōjparok kien ko im kallim̧ur ko jaar kōm̧m̧an ippān Jemedwōj Ilan̄, innām jenaaj bar mour Ippān.
Mour ippān Anij im Baam̧le ko Ad ilo Lan̄
Ilo laļ eo an celestial, jenaaj mour ippān Anij im Jisōs Kraist. Jenaaj bar maron̄ mour ijeņ ippān baam̧le ko ad indeeo n̄e jaar liāp ippāer. Jenaaj lo aenōm̧m̧an, m̧ōņōņō, im kakkije (lale Mosaia 2:41).
Mour eo ad ioon laļin emaron̄ in pen, ak n̄e jej ļoor Jisōs Kraist, jemaron̄ lo lan̄lōn̄ ilo mour in im m̧ōņōņō indeeo ilo mour eo tok juon.
Ta eo Jeje ko Rekwojarjar rej Ba kōn Karōk in M̧ōņōņō Eo?
Wāween ad mour kōn mour ko ad eaorōk. Anij enaaj ekajete im nōbar kōj ekkar n̄an ļōmņak im jerbal ko ad. (Lale Alma 41:3)
Setan ej rikōjdāt n̄an m̧ōņōņō eo ad. Ej kapoik kōj n̄an kalikjab mour eo ad ioon laļin n̄an jerawiwi. Ekōņaan bwe jen būrom̧ōj āinwōt e. (Lale 2 Nipai 2:27).
N̄e jej tōmak ilo karōk eo an Anij n̄an kōj, jemaron̄ bōk aenōm̧m̧an jekdo̧o̧n ta apan̄ ko jej iooni. Jemaron̄ reim̧aanļo̧k n̄an mour indeeo ippān Anij. (Lale Katak im Bujen ko 59:23.)