Rūm̧m̧an Ded ro
N̄e Ewōr Pere, Kōpeļļo̧k Kōjem n̄an Tōmak
Men̄e tōre ko jemaron̄ pere jetōbin en̄jake ko ad, ad jeļā emaron̄ itok m̧ōkaj.
Men̄e jaar rūttotak ilo Kabun̄ in ak tokālik oktaktok, elōn̄ iaad raar en̄jake iien ko n̄an kajjitōk ko ak pere. Emaron̄ kar wōr ad jetōb in en̄jake ko rekabwilōn̄lōn̄ ak kiiō jej bwilōn̄ ippād make: jetōb in en̄jake kein rekar ke m̧ool, ak ikar ke baj antoone en̄jake in Jetōb? Ta n̄e ejjeļo̧k iaan menin ej m̧ool? Im ta kajjitōk ko aō me rejjan̄in wōr uwaakier? Imaron̄ ke pād wōt ilo Kabun̄ in n̄e ijjab jeļā em̧ool?
N̄an n̄a, ikar bwilōn̄ kōn kajjitōk kein ālkin kar jerbal in mijen eo aō. Ikar jeļā m̧ool eo kōn tōmak me ikar kōņaan etal im kwaļo̧k naan n̄an ro jet ilowaan juon iiō im jimettan—im kiiō ikar pere kōn aolep men ko ikar jeļā im kwaļo̧ki. Ej juon iien ejjeļo̧k tokjen n̄e ejjeļo̧k iaan men kein rekar m̧ool. Kōn menin ekar ke m̧ool, aolep men ko ikar kwaļo̧ki? Ak ikar ke baj kōņaan bwe ren m̧ool? Ālkin an ro m̧ōtta etal jen Kabun̄ in im kalimjōk make apan̄ ko ad kōn tōmak, iaar ļōmņak n̄e ij m̧ōņe eō make.
Ilo iien in, ekar bōjrak aō etal im jar ak pokake kien ko kōnke ebwijin aō kajjitōk. Ijoke, kōnke elōn̄ aō kajjitōk, iaar kajjieon̄ ļoor kapilōk eo an Būreejtōn Russell M. Nelson n̄an “kōļapļo̧k jetōb eo [aō] n̄an bōk revelesōn.”1
Ijeļā bwe “ejjeļo̧k juon men ej kōppeļļo̧k lan̄ āinwōt kobain an ļapļo̧k erreo, jejjet pokake, tiljek kappukot, emakijkij kwojkwoj ioon naan ko an Kraist ilo Bok in Mormon, im aolep iien kallim̧ur n̄an etal n̄an tampeļ im jerbal in menmenbwij.”2. Iaar en̄jake n̄an pād epakeļo̧k Anij. Ālkin aolep men, E eo wōt ekar maron̄ uwaake kajjitōk ko aō.
Bwebwenato eo an Eunicea
Juon raan ke iaar riiti Ro Rekwojarjar: Bwebwenato in eo an Kabun̄ eo an Jisōs Kraist im Armej ro Rekwojarjar ilo Raan ko Āliktata, iaar ron̄ juon bwebwenato ekabwilōn̄lōn̄ kōn juon kōrā ilo raan ko jinoin an kar Jepļaaktok gospel eo. Eunice Franklin ekar wōr ejja kajjitōk im n̄ūrbōktak ko āinwōt n̄a.
Eunice ekar peptaij ilo New York jen juon mijinede etan Elijah Able. Liin ekar lukkuun oktak tok n̄an gospel in ilo iien eaar peptaij. Ak tokālik, ālkin an Elijah kar etal n̄an Canada in kwaļo̧k, Eunice ekar jino pere kōn gospel in im ta eo ekar jeļā jinoin ekar m̧ool. Liin ekar jino ļōmņak n̄e Josep Smith ekar lukkuun juon rikanaan im n̄e Bok in Mormon ekar m̧ool in jeje ko rekwojarjar. Liin ekar jab kiki elōn̄ bon̄, ļōmņak kar bōlen m̧ōņe.
Irooj eaar kwaļo̧k n̄an Elijah ilo ettōņak kōn idajon̄jon̄ eo an Eunice, im eaar m̧ōkaj in ro̧o̧l n̄an New York. Ke ej kaļļaļļaļ ilo kōjem eo an, Eunice ekar bwilōn̄—liin ekar pepe bwe en ba n̄an e ke ekar jab tōmak ke enaaj bar lo e. Ijoke, liin ekar kōdeļo̧n̄ e. Ke Elijah ekar karuwaineneik e n̄an kwaļo̧k eo an joteen eo, eaar āliklik im kar jab kōņaan etal. Ak liin kōņaan im kar etal im ron̄jake ta eo ej tin ba.
Ilo kwaļo̧k eo an, Elijah eaar kout jen 1 Piter 4:12, eo ej ba “kom̧win jab bwilōn̄ kōn men in kijeek enaaj itok bwe en māllejon̄ kom̧. Men in kijeek ekar kajjieon̄ kakkure tōmak eo an Eunice bwe en jab tōprak—ke Eunice eaar ron̄ an Elijah kōnono, eaar jako an pere. Rikwojarjar ro rej kwaļo̧k bwebwenato in: “Jeļā eo ekar bar ro̧o̧ltok.”3
Jeļā ko Rej Bar Ro̧o̧ltok
En̄jake eo an Enice ekar kabwilōn̄ eō, im iaar ļōmņake im bar ļōmņake. Āinwōt Eunice, iaar jeļā bwe naan ko an Elijah rekar laam waan im kajoor. Jej aikuj “jab bwilōn̄” n̄an būki kajjitōk kōn tōmak eo ad. Elukkuun in EMMAN! Ilo an m̧ool eo maron̄ in lutōktok jān lan̄, emaron̄ wōr iien ko rem̧m̧an tokālik ijo jemaron̄ en̄jake juon jetōbin pere. Jemaron̄ in ļōmņak n̄e jej lukkuun en̄jake wōt. Kōn ejjeļo̧k uwaak im kapene ko kar kwaļo̧ki, jemaron̄ in jar wōt kōn wutidikdik an revelesōn. Jemaron kappukot juon kam̧ool n̄an jeļā bwe ta eo ekar m̧ool inne enaaj m̧ool wōt rainin. Elder Jeffrey R. Holland jān Doulul eo an Jon̄oulruo Rijilōk ro ekar kwaļo̧k: “N̄e ejim̧we am̧ kar jar kake im kar lōke im kar mour kake, ejim̧we kiiō. … Jelm̧ae pere ko am̧. Anjo̧ ioon mijak ko am̧.”4
N̄an bar kōpeļļo̧k kōjem eo n̄an mijinede eo m̧ōtta, men̄e eaar ļōmņak etke ej aikuj, Eunice eaar bar kōpeļļo̧k būruwōn. Irooj eaar bar im̧we Eunice im jipan̄ e en̄jake juon kam̧ool kōn aolep men ko ekar jeļā m̧okta. Ilo juon jekjek em̧m̧an, kajjojo iaad emaron̄ in kōpeļļo̧k wōn kōjem eo n̄an tōmak men̄e ioon apan̄ ko kōn pere. Jemaron̄ kōm̧m̧ane ta eo ejim̧we im kappukot revelesōs—men̄e jejjab lukkuun jeļā ta eo jej kōm̧m̧ane.
Jen kōpeļļo̧k wōt kōjem eo ilo ad kōm̧m̧ani men ko reddik Anij ekar jiron̄ kōj rem̧m̧an n̄an jetōb ko ad. Jen kōjparok raan in Jabōt im pād ilo kweilo̧k ko ad. Jen riiti jeje ko rekwojarjar, men̄e juon eoon ilo jidik iien. Jen ron̄jake al in jar ak kōnono ko ilo kweilo̧k eo eļap. Jen kōnono n̄an Jemedwōj Ilan̄ kōn n̄ūrbōktak ko im kōjatdikdik ko ad im kajjitōk Ippān n̄an jipan̄ kōj jeļā kōn m̧ool eo. Jen kōjparok kien ko, ukweļo̧k, im pukot jemjerā eo an Jetōb Kwojarjar.
N̄e eban bōk eļapļo̧k ijelo̧kin juon ikideelel n̄an tōmak, jemaron̄ kōm̧m̧ani wōt men ko reddik im kōm̧m̧an bwe ikideelel eo en jerbal ilo kōj. Jemaron̄ kōm̧m̧an jikin tōmak ilo būruwōd bwe en ļapļo̧k. (Lale Alma 32:27.)
Ta eo Ijeļā
Men̄e jet iien ij bwilōn̄, ļōmņak, im jab tōmak, iaar jeļā im bar jeļā kōn n̄a make bwe en̄in ej Kabun̄ eo an Kraist. Men̄e Josep Smith emaron̄ kar juon em̧m̧an eo ejjab wānōk, ijeļā ke ekar juon rikanaan an Anij kar im̧we eo ekar kaarmejete aolep men im kar kadedeļo̧k jerbal eo an. Ij bar jeļā bwe Bok in Mormon ej juon ļo̧o̧k in etto im jeje ko rekwojarjar kar kepooje n̄an kōj ilo tōre in ad. Jemedwōj Ilan̄ ej kapen wōt m̧ool kein n̄an n̄a aolep raan. Im ij m̧ōņōņō bwe Ekar bar kapen m̧ool kein n̄an Eunice franklin.
Ijeļā bwe ilo ad kōpeļļo̧k būruwōd n̄an m̧ool eo, Anij enaaj jipan̄ kōj en̄jake ta eo em̧ool im ta eo ejjab jen Jetōb Kwojarjar. En̄jake ko ad ilo jetōb eban mejkun ilo iien eo. Im ālkin men otemjeļo̧k, n̄e jej en̄jake pere jen bar ro̧o̧l liktak, jemaron̄ kakeemej kōj make elmen ad en̄jake. Āinwōt an kar waļo̧k n̄an Eunice, ad jeļā kōn m̧ool ko an gospel in emaron̄ bar ro̧o̧ltok.
Jejjab aikuj in mour kōn mour in pere eo eaetok kitien eļan̄n̄e jenaaj dāpdep wōt ilo jetōbin en̄jake ko ad. Elder Neil L. Andersen jen Doulul eo an Jon̄oulruo Rijilōk ro ekar ba “dāpij ememļo̧kjeņ ko ami rekwojarjar. … Lōke bwe rej iwōj n̄an eok jān Jemedwōj Ilan̄ im Nejin Emake Wōt. Kōtļo̧k bwe ren bōktok kijenmej n̄an pere ko am im meļeļe apan̄ ko am. Ij kallim̧uri kom̧ bwe ilo am kile im lukkuun kaorōk jetōb in alikkar eo ilo mour eo am, elōn̄ļo̧k renaaj itok n̄an eok.”5
Ijeļā bwe ro rej kajjieon̄ in kōkāāl jetōbin en̄jake ko im kōjerbal tōmak ilo Kraist, kallim̧ur in em̧ool: “Eo ej lōke [Kraist] e jāmin maro” (Jon 6:35). Uwaak ko jej aikuji renaaj itok. Jemaron̄ dipuk men in kijeek ko ej litok n̄an kōj. Im jemaron̄ tiljek wōt n̄an Anij eo ad jej iakwe aolep raan in ad mour.