Ainikien ko an Armej ro Rekwojarjar ilo Raan Ko Āliktata
Kōjeraam̧m̧an an Ro Jibū im Jim̧m̧aō
Ke iaar bōk kōjeraam̧m̧an in petriak eo aō, būruwō eaar obrak kōn iakwe n̄an ro jibū im jim̧m̧aō.
Pija ko jān Richard M. Romney
Iaar lo̧tak ilo Cameroon, kapijuknen eo an ro jibū im jim̧m̧aō. Innām iaar em̧akūtļo̧k n̄an France, ijo iaar jokwe ie, iaar jikuuļ, im kar jerbal āinwōt juon nōōj ilo bar juon aujpitōl ilo Paris. Kiiō ij jokwe ilo Montreal, ijo ij jerbal wōt āinwōt juon nōōj.
Iaar pukot kabun̄ eo em̧ool an Jisōs Kraist elōn̄ iiō ko. Ke iaar ioon mijinede ro ilo Paris, Jetōb Kwojarjar eaar kapen n̄an n̄a ke em̧ōj aō lo ta eo iaar kappukote—Kabun̄ eo an Jisōs Kraist im Armej ro Rekowjarjar ilo Raan Ko Āliktata. Iaar kanooj obrak kōn lan̄lōn̄ me iaar ļōmņak ikar pād lan̄! Ikar ļōmņak n̄an lukkuun mour kake gospel eo im katak ko ie.
Kar katakin eō ke ij aikuj in pukot ro jibū im jim̧m̧aō n̄an kōm̧m̧ani bujen ko ilo etaer ilo tampeļ. Ke iaar bōk kōjeraam̧m̧an in petriak eo aō, kar ba n̄an eō ke inaaj erom̧ juon rilo̧mo̧o̧r ioon To̧l Zaion n̄an bōktok lo̧mo̧o̧r n̄an baam̧le eo aō. Būruwō eaar obrak kōn iakwe n̄an er; iban meļo̧kļo̧k er. Jen tōre eo, iaar lukkuun jerbal kōn menmenbwij an baam̧le eo aō.
Iaar aolep iien jeļā bwe ikar lo̧tak n̄an baam̧le eo an Cameroon juon bōtōktōk in irooj, baam̧e eo an Bamoun. Ilo m̧anit im bwebwenato armej rein raar itok jān Assyria im koba ippān armej ro jet ilo em̧m̧akūt ko aer. Raar kōjparok wōt menmenbwij eo aer im kar je bwebwenato ko aer je AD 1300. Pepa kein repād ilo ļāibrare eo an im̧ōn irooj ro. Ilubwiljin elōn̄ bwebwenato ko jet, rej kwaļo̧k bwebwenatoon ļōļļap eo jim̧m̧an jim̧m̧aō Fon-gouhouo, irooj in tōl jān 1818 n̄an 1863.
Ikar maron̄ in jepļaakļo̧k n̄an ļām̧oren eo aō, im āinwōt juon ro uwaan baam̧le eo an Bamoun, iaar maron̄ in bōk mālim n̄an būki peba kein. Ikar bar loļo̧k kiin̄ eo, ioon rikien ro jet, im kar kōnono n̄an rutiej ro kōn Kabun̄ in im itok-limo eo kōn menmenbwij an baam̧le. Iaar m̧ōņōņō kake, kam̧m̧oolol kōn jepļaaktok eo an gospel in, imaron̄ kōm̧m̧ane ijo kuņaō n̄an kōjeraam̧m̧an ļāmo̧ren eo aō im ro jibu im jim̧m̧aō.