Domodra na Yalododonu Edaidai
Yalo Vinaka Lesu Mai
Ena gauna sa tolu kina na luvei keirau, a kaya o Vanessa, “Tou sa gadreva na Lotu ena vale oqo.”
Ni‘u se qai yabaki 12, a kauti rau mai na daukaulotu tudei i vale o tuakaqu, ka vakaveikilaitaki keitou ki Na Lotu i Jisu Karisito ni Yalododonu Edaidai. Sega ni dede, sa tekivu kauti rau na taciqu, kei ganequ, vata kei au ki lotu o tinaqu. Sega ni dede keitou sa papitaiso taucoko.
Ia, lakolako, keitou sa sega ni lako i lotu. Au a dau taleitaka na Lotu, ia ni‘u sa yabaki 17, a muataki au na veika eso ni noqu bula ki na dua tale na sala. Au a saga me‘u dua na tamata vinaka, ka‘u sega vakadua ni bau yalo ca. Ia au sa mai yali tu ka tekivu bulataka na sala kei vuravura. Ni sega tu ni‘u vakila se kidava rawa oqo, sa qumi au o vuravura.
Oti au a qai sotavi Vanessa. Ena dua na siga ni keirau sa mai veiwatini tiko, a kaya o koya, “Tou sa gadreva na lotu ena vale oqo.” Ena gauna o ya sa tolu tiko kina na luvei keirau.
Ni sa vaka tu oqo o vuravura, keirau sa lomaleqataka na veidusimaki vakayalo cava keirau na solia vei iratou na luvei keirau. Au nanuma ni kevaka me‘u na lesu tale ki lotu, au na lesu tale ki na noqu lotu. Au nanuma lesu ni oya na vanua era tiko kina na tamata vinaka.
Au a veitalanoai kei na dua na lewe ni Lotu ka tukuna vua ni‘u sa vakasamataka tiko me‘u sa lesu tale mai ki lotu.
“Yalovinaka lesu mai!” a kaya o koya.
Au a lomaleqataka vakalevu ni ratou na nanuma na luvequ ni lotu e tawayaga ka ratou na sega ni taleitaka, ia e ratou a qai taleitaka. Ni keitou toso tikoga ki lotu, a nanuma o Vanessa ni sega ni dua tale na ka me tautauvata kei na Lotu me vukea rawa kina na matavuvale me ra tubu vata. Sa ikoya sara ga oya na ka a vakasaqara tiko. Keirau a qai vakamau kei Vanessa, ka a papitaiso o koya kei iratou na luvei keirau.
Ia oqo keitou sa toso tiko vakamatavuvale ena sala ni kosipeli. Sa neitou lalawa me keitou vauci vata ena valetabu.
Ena gauna sa tara tiko kina na Valetabu e Rio de Janeiro Brazil, au a dau lako tikiva voleka ni veisiga kece. Au dau kaya vei ira na noqu itokani, “Dua na siga, au na lako ivakamau ena vale oqo.”
“Oi, o cavuta tikoga na ka vata ga oqo e veisiga!” era a kaya.
Au a cavuta oqo ena veisiga baleta ni‘u kila ni sa voleka sara me vakacavari na tara ni valetabu, ka‘u sa via vakananumi au tikoga me‘u vakayacora na veika dodonu me rawa ni vauci vata kina na neitou matavuvale. Oqo na gagadre ni yaloqu.
Au kila ni ra na tekivu vulica vakalevu cake na luvequ na veika ni vuravura ka lako curuma eso na ka vata ga au a lako curuma mai. Ia ni‘u wasea vei iratou na veika au a bula sotava mai, au a qai kaya, “Yalovinaka kakua mada ga ni dou toro voleka ki na veika au a vakayacora baleta ni sega sara ni yaga.”
Au a vakayaloqaqataki iratou na luvequ me ratou vulica na kosipeli i Jisu Karisito ka raimatua tiko me ratou kaulotu ena gauna oqo me rawa ni ratou vakalougatataki ira kina na tamata. Eratou sega ni kila vinaka na veika kece, ia e ratou sa vuli tiko. Oqo na ka au diva tu vei iratou.