iTabagone Qase Cake
Ni da Vakatitiqa, Me Da Tadolava na Katuba ki na Vakabauta
E dina ga ni so na gauna eda na vakatitiqataka beka na veika eda sotava vakayalo, na noda veivakadeitaka e na rawa ni lesu mai vaka yauyau.
Se da a susugi cake ena Lotu se saumaki mai ena mua ni noda bula, e vuqa vei keda eda a rairai sotava na veigauna ni vakatataro se vakatitiqa. Eda a sotava beka na veika totoka vakayalo ia oqo eda taroga tiko: Era a ka dina beka na veika vakayalo a yaco, se au a raitayaloyalotaka ni‘u a vakila na Yalo? Vakacava kevaka e sega ni dina e dua vei ira oqo? Ka vakacava na noqu vakatataro ka ra sa sega ni saumi tiko mai? Ena rawa vakacava me‘u tiko ga ena Lotu kevaka au sega ni vakadeitaka rawa ni sa sega tiko ni dina?
Vei au, au kurabui ni a yaco mai na veitaro oqo ni oti na noqu kaulotu! Au a sa kila tu na dina ena kena yalodina sara kau a gadreva sara me‘u lako i vunautaka vei ira tale na tamata me dua na yabaki veimama—ia oqo au sa mai vakatitiqataka tiko na veika kece au a kila tu ka vakavulica. Sa qai dua na maumau levu kevaka e sega ni dua vei ira e dina. Era a dina beka o ya, na veika kece au a vakatavulica? Se au a vinakata ga me ka dina? Ni‘u sa raici ira na itokani ni ra sa biuta na Lotu ka basa tiko e dua na gauna talega ni yavavala ni noqu bula ni vakabauta, au a vakataroga voli de‘u a rairai lawakitaki au tikoga.
Ena gauna oqori, au a sega ni cegu ena lako ki Lotu se talairawarawa ki na ivakaro baleta ni a levu sara na noqu vakatataro. Ia, ena vuku ni kena tiko na noqu vakatataro, au a saga me‘u muria na ivakasala nei Peresitedi Russell M. Nelson me‘u “vakalevutaka na [noqu] igu vakayalo me‘u ciqoma kina na ivakatakila.”1
Au kila “ni sega ni dua na ka e dolavi lomalagi me vaka na kena veicurumaki na vakalevutaki ni savasava, talairawarawa vakaidina, vakasaqaqara ena yalodina, kana e veisiga ena vosa i Karisito ka ra tiko ena iVola i Momani, kei na soli gauna vakawasoma ki na cakacaka ni valetabu kei na tuva kawa.”2. Au a vakila ni sa ka bibi sara na tiko volekata na Kalou. Ia, o Koya duadua ga ena sauma mai na noqu vakatataro.
iTalanoa kei Eunice
Ena dua na siga ni‘u a wilika tiko na Yalododonu: Na iTalanoa ni Lotu i Jisu Karisito ni Yalododonu Edaidai, au a raica sara e dua na italanoa vakasakiti me baleta e dua na marama ni Vakalesuimai taumada. E vaka me tautauvata na noqu vakatataro kei na lomaleqa kei Eunice Franklin.
A papitaiso o Eunice mai Niu Ioka mai vua e dua na daukaulotu na yacana o Elijah Able. A saumaki dina mai o koya ki na kosipeli ena gauna ni nona papitaiso. Ia, ni sa biubiu me lako ivunai i Canada o Ilaija, sa tekivu me vakatitiqataka na kosipeli kei na veika a kila tu ni dina o Eunice. Sa tekivu me vakataroga o koya kevaka sa parofita dina o Josefa Simici ka sa ivolanikalou dina na iVola i Momani. A sega ni moce ena vuqa sara na bogi, ni vakasamataka tiko de sa lawakitaki.
A vakaraitaka na Turaga na sasaga bula nei Eunice kivei Elijah ena dua na tadra, ka totolo sara na nona lesu o Elijah ki New York. Ni sa tukituki ena nona katuba, a kurabui o Eunice—ni a vakasamataka tiko ni gauna me na raici Elijah tale kina ena tukuna vua ni sa sega tale ni vakabauta. Ia, a vakacurumi Elijah e loma. Ni sa sureti koya o Elijah ki na nona vunau ena yakavi o ya, a lomalomarua ka sega ni via gole. Ia a qai lako yani ka laki vakarorogo ki na veika me na tukuna.
Ena nona vunau, a cavuta kina o Elijah na 1 Pita 4:12, e kaya “kakua ni kidacala e na vuku ni rarawa katakata sa yaco me vakatovolei kemudou.” Na katakata ni veivakatovolei a saga me vakarusa na vakabauta nei Eunice a sega ni qaqa—me vaka a rogoci Elijah o Eunice, ka sa mai waicala ga yani na nona vakatitiqa. Na Yalododonu e kaya kina vakaoqo: “Na veivakadeitaki a vakila tu e liu era sa lesu qaqa mai.”3
Sa Lesu Qaqa Mai na Veivakadeitaki
E tara na yaloqu na veika a sotava o Eunice, ka‘u dau vakasamataka vakatitobu ena veigauna. Me vakataki Eunice ga, au vuli mai na vosa rawarawa ka qaqa nei Elijah. E dodonu me da “kakua ni kidacala” ni da na dau lomatarotaka tiko na noda vakabauta. E donu vinaka tiko! Me vaka ga ni na dau sovaraki mai vakagauna na dina mai lomalagi, ena rairai yaco e muri na gauna eso me da vakila kina e dua na lauqa vakayalo. Eda na vakataroga beka ke da sa vakila vakaidina na uca. Ni sega na kena isau se veivakadeitaki e soli mai, sa rawa me tomani tikoga na noda masulaka na uca ni ivakatakila. Sa rawa ni da vakasaqara e dua na ivakadinadina me kilai ni ka dina e nanoa e se dina tikoga nikua. E vakavulica o Elder Jeffrey R. Holland ena Kuoramu ni iApositolo Le Tinikarua: “Kevaka e sa dodonu ena gauna o masulaka kina ka vakabauta ka bulataka, sa dodonu sara ga oqo. … Mo vorata na nomu vakatitiqa. Lewa na nomu rere.”4
Ena nona dolava tale na katuba vei nona itokani daukaulotu, ena gauna mada ga e vakananuma kina na vuna me vakayacora kina, a tadolava tale o Eunice na yalona. Sa rawa tale ga vua na Turaga me karoni Eunice ka vukei koya me vakila na veivakadeitaki ni veika kece e a kila tu e liu. Ena sala vata oqori, sa rawa kina vei keda yadua me da tadolava na katuba ki na vakabauta ena gauna mada ga eda sotava tiko kina na vakatitiqa. E rawa ni da vakayacora tikoga na veika dodonu ka vakasaqara na ivakatakila—ena gauna mada ga eda sega ni vakadeitaka kina na vuna eda vakayacora tiko kina.
Eda dolava tiko na katuba ena noda tomana tiko me da vakayacora na veika lalai sa tukuna vei keda na Kalou ni sa vinaka ki na yaloda. Eda vakatabuya na Siga ni Vakacecegu ka tiko ena noda soqoni. Me da wilika na ivolanikalou, kevaka sara mada ga me dua ga na tikina ena so na gauna. Me da vakarorogo ki na sere ni Lotu se vosa ni koniferedi. Eda veivosaki kei na Tamada Vakalomalagi me baleta na noda kauwai kei na inuinui ka kerei Koya me vukei keda me da kila na ka dina. Me da maroroya tiko na ivunau, veivutuni, ka vakasaqara na veitokani ni Yalo Tabu.
Kevaka me da na saga me da gadreva na vakabauta, sa rawa ni da tomana tikoga na noda vakayacora na veika lalai ka vakatara na gagadre oya me cakacaka e lomada. Sa rawa me da vakagalalataka na veitiki ni lomada me tubu cake vakalevu kina na vakabauta. (Raica na Alama 32:27.)
Na Ka Au Kila
E dina ni so na gauna au dau vakataroga, vakasamataka, ka yavalati, au sa vulica ka vulica tale vakai au ni oqo na Lotu i Karisito. E dina ga ni o Josefa Simici a rairai tamata tawadodonu, au kila ni a dua na parofita vakauqeti ni Kalou a solia na nona ka kecega ka vakayacora ena nona vinaka taucoko. Au kila talega ni iVola i Momani sa dua dina na ivolanikalou ni itukutuku makawa ka maroroi tu me baleti keda ena noda gauna oqo. E tomana tikoga na Tamada Vakalomalagi me vakadeitaka vei au na dina oqo ena veisiga. Ka‘u marau ni sa vakadeitaka talega o Koya na dina oqo vei Eunice Franklin.
Au kila ni da tadolava tiko na noda katuba kei na yaloda ki na dina, ena vukei keda na Kalou me da vakila na cava e dina kei na cava e sega mai vua na Yalo Tabu. Na veika vakayalo eda sotava ena sega ni cakitaki rawa ena gauna oqo. Ena veigauna yadua ni oti oya, ni da vakila ni sa tekivu me curu tale mai na vakatitiqa, sa rawa ni da vakananumi keda ena veika eda a vakila. Me vaka ga a yaco vei Eunice, na noda veivakadeitaki baleta na dina ni kosipeli ena lesu qaqa mai.
E sega ni ganita me da bula tiko ena lauqa ni vakatitiqa me dua na gauna balavu kevaka me da taura toka ga na veika vakayalo eda a sotava. E kaya o Elder Neil L. Andersen ena Kuoramu ni iApositolo Le Tinikarua mo ni “karona na nomuni veigauna tabu. … Vakabauta ni ra yaco mai vei iko mai vei Tamamuni Vakalomalagi kei na Luvena Daulomani. Laiva me rau kauta mai na yalovosota ki na nomu vakatitiqa kei na kilaka ki na nomu veigauna dredre. Au yalataka ni ko vakadinadinataka ena lomasoli ka mareqeta vakavinaka na veigauna veivakatakilai vakayalo ena nomu bula, ena lako mai vakalevu cake vei iko.”5.
Au kila ni o ira era tovolea me ra vakayacora na veika vou vakayalo ka vakabauta na Karisito, ena dina vei ira na yalayala oqo: “Ia ko koya sa vakabauta na [Karisito] ena sega ni viagunu tale” (Joni 6:35). Ena yaco mai na isaunitaro eda gadreva. Ena rawa ni da curubotea yani na veivakatovolei katakata e viritaka mai o Setani ena noda sala. Ka na rawa ni da yalodina tikoga ki vua na noda Kalou dauloloma ena noda bula taucoko.