Ira na Marama Taumada ni Vakalesui mai
Nuitaka na Turaga
Baleta ga ni a kila na Turaga mai na ivolanikalou, na vakabauta titobu nei Mary Ann a vakadeitaka tiko na lomana me “sa maravu tu ga ena cava kecega.”1
Droini mai vei Toni Oka
A kalougata o Mary Ann Angell ni a tubu cake mai ena dua na vuvale e dau vakaliuci kina na wili ivolanikalou. A dau taleitaka vakabibi na ivakavuvuli ni iVakabula.2 A vulica taumada ena nona bula ni rawa ni rogoca na domo ni Turaga mai na ivolanikalou ka kunea na vakacegu ena Nona ivakavuvuli.
A rogoca na kena vunautaki na kosipeli vakalesui mai nei Jisu Karisito ena Yanuyanu o Rhode, Amerika, ena 1831, a saumaki mai o Mary Ann ki na kosipeli, ena gauna a wilika oti kina na iVola i Momani.
A toki ki Kirtland, Ohio, ena 1833, ka a sotavi Brigham Young kina, ka a vakamautaka ena itekivu ni 1834. Ena 48 na yabaki ka tarava, mai na vuqa na veitokiyaki kei na veivakatovolei, a rogoca tikoga o Mary Ann Angell Young na domo ni Turaga ka sega ni veivukiyaki na nona nuitaki Koya tikoga.
Me kena ivakaraitaki, a gole yani o watina me a lako ikaulotu ki Peritania ena 1839 ni oti toka ga e 10 na siga nona na vakasucu vei luvedrau yalewa o Alice. Ena 20 na vula ka tarava, a sotava na veika dredre o Mary Ann kei na ono na luvedrau. Eratou a vakararawataki ena tauvimate ka ratou a bula tu ga ena madrai sila, sucu, kei na vica na kakana draudrau ena iteitei.3 A qai raica rawa o Mary Ann e dua na cakacaka lailai me rawa ni vukea kina na nona qarava na nona matavuvale kei iratou na luvena malumalumu. Ia a vukei iratou na Turaga ena gauna ni veivakatovolei oqo. “Oqori e dua na ka cecere,” a vola vei watina, me “nuitaki tiko na Turaga.”4
Ena nona vakararavi ki na nona kila ka ni ivolanikalou, e vaka me kila ena veivakadeitaki titobu o Mary Ann ni Turaga e sa dau tiko vata kei koya, lomani koya, ka kilai koya vinaka, vakabibi ena vuqa na nona vakatovolei. “Me dusimaki keda na Turaga ena ka kecega ka vosa veivakacegui ena vei auwa butobuto ni veivakatovolei” a nona masu.5