Lako Mai, Mo Muri Au
Na Veibuli
A bulia na vuravura o Jisu Karisito ena veidusimaki nei Tamada Vakalomalagi me rawa kina ni dua na noda vanua me da bula kina, vuli kina, ka vakayagataka na noda galala ni digidigi me da cakava kina na digidigi vinaka (raica na Eparaama 3:24–26).
E vakavuvulitaka o Josefa Simici na Parofita ni “veibuli e sega ni kena ibalebale me buli e dua na ka mai na sega; e kena ibalebale me cokonaka, me vaka ga na nona cokonaka e dua na tamata na iyaya eso ka tara e dua na waqa.”1 Na vosa vaka-Iperiu ni “veibuli” e kena ibalebale me vakamoici, ukutaki, tuvanaki, ka vaka vatukanataki (raica na i Vakatekivu 1:1; Eparaama 3:24).
A vakamacalataka o Peresitedi Russell M. Nelson ni “Veibuli vakayago vakaikoya a tuvanaki ena vei iwase lokuci ni gauna,” ka sega ni siga vaka ivolanivula. “Se vakatokai me dua na siga, dua na gauna, se dua na itaba yabaki, na iwase yadua [ni Veibuli] a dua na gauna ena maliwa ni rua na veikayaco kilai—ka dua na tiki ni tawamudu.”2
Matai ni Siga: Rarama kei na Butobuto
“Sa kaya na Kalou, Me rarama mai,” ka sa “wasea na rarama mai na butobuto,” ka buli kina na siga kei na bogi (raica na i Vakatekivu 1:3–5).
iKarua ni Siga: Wai kei na Lomalagi
Sa wasea na wai kei na lomalagi na Kalou. “Sa kaya na Kalou, Me dua na maliwa lala me wasei kina na wai mai na wai. … A sa vakatoka na maliwa lala na Kalou me Lomalagi.” (Raica na i Vakatekivu 1:6–8.)
iKatolu ni Siga: Wasawasa kei Vuravura
“A sa vakatoka na Kalou na vanua mamaca me Vuravura; kei na wai sa soqoni vata tu me Wasawasa” (Vakatekivu 1:10). Sa qai vakarau tu o vuravura me vakatubura na co kei na kau (raica na i Vakatekivu 1:11–12).
iKava ni Siga: Matanisiga kei na i Tabayabaki
A bulia na Kalou na matanisiga, na vula, kei na kalokalo “me wasea na siga mai na bogi” ka “me ivakatakilakila talega ni vei tabayabaki kei na siga kei na yabaki” (raica na i Vakatekivu 1:14–16).
iKalima ni Siga: Veika Bula
A bulia na Kalou “na ka kecega sa bula ka yavavala” (Vakatekivu 1:21). Era a vakaroti na veika bula oqo me ra vakatubu kawa ka vakasinaita na vuravura kei na wasawasa (raica na i Vakatekivu 1:22).
iKaono ni Siga: Atama kei Ivi
Na nona bulia na Kalou na veika bula e a tomani yani vei ira na “manumanu tawa lasa ni vanua,” “manumanu yavai va,” kei na “ka kecega sa qasi voli” (Eparaama 4:24–25). A qai buli Atama kei Ivi o Koya “me ratou veiucui kaya” (Mosese 6:9) ka vakaroti rau me rau “vakaluveni ka tubu me lewe vuqa, ka vakatawai vuravura, … ka lewa … na veika bula kecega” (Vakatekivu 1:28).
iKavitu ni Siga: Siga ni Vakacegu
Ni vakaotia na Nona cakacaka, a sa vakacegu na Kalou ena ikavitu ni siga. “A sa vakalougatataka na kena ikavitu ni siga na Kalou ka vakatabuya: baleta ni sa vakacegu kina ko koya mai na nona cakacaka kecega sa bulia ka kitaka” (Vakatekivu 2:3).
E muri sa qai vakarota na Kalou vei keda talega meda “nanuma na siga ni Vakacecegu, mo vakatabuya” (Lako Yani 20:8).
E rawa ni da vakatabuya na Siga ni Vakacecegu ena noda laki lotu, vakaivotavota ena sakaramede, ka nanuma na iVakabula. E vakavuvulitaka na Turaga, “Ni sai koya dina oqo na siga sa lesi vei iko mo vakacegu kina mai na nomu cakacaka, io mo qaravi koya ga sa Cecere Sara ena gumatua.” (Vunau kei na Veiyalayalati 59:10).
Ena Siga tabu, “na noda vakanananu, ivalavala, kei na keda irairai era ivakatakilakila eda solia vua na Kalou ka sa ivakaraitaki ni noda loloma vei Koya.”3