Na iLokoloko ena Vuloa

iVakatakilakila

cushion

Ena vuqa na yabaki, au dau sikova na itikotiko nei tinaqu me vukei koya ena nona cakacaka ni vale. Sa yabaki 80 o koya ka lewe ni lotu yalodina ni Lotu i Jisu Karisito ni Yalododonu Edaidai.

E a bula duadua tu o tinaqu mai na gauna a takali kina o tamaqu. Na nona marau levu duadua o ya na sikova na nodratou vale na luvena e tolu, gade vata kei iratou kei ira na makubuna, ka vakasaqara na kakana e vakamarautaka na yalo.

Ena veigauna kece au dau sikova kina na vale nei tinaqu me vakasavasavataka ka raica me tuvai vinaka tu na veika kece, au dau raica e dua na ilokoloko makawa ena vuloa. Au dau tomika cake ka biuta ena dua na idabedabe, ka vosakudrukudru me baleta na vakawelewele nei tinaqu.

Ena gauna me’u lesu tale kina me’u laki sikovi tinaqu ka vukei koya, au na kunea tale na ilokoloko ena vuloa. Au sega vakadua ni bau tukuna e dua na ka vei tinaqu me baleta na ilokoloko, ia ena dua na mataka au sa qai siqema rawa na vuna e dau tu ga kina ena vuloa.

A dau gadreva o tinaqu e dua na vanua malumu me tekiduru ka masu kina. O koya sa marama qase, ia na nona vakabauta sega ni yavalati rawa a vakavuna nona dau tekiduru me masu e veisiga. Ena dau masulaki iratou na luvena kei na makubuna. Ena dau masulaki ira na nona itokani. Ena dau masulaki ira era vakaleqai vakalevu tu. Ka na dau masulaki ira e dau lomani ira o koya, ena gauna sara mada ga sa qase kina, se dau kauwaitaki ira tikoga.

Nikua, au sa sega tale ni qai vosa kudrukudru ni’u raica na ilokoloko ena vuloa. Ena so na gauna, au dau tekiduru ena delana dakoba me’u masu vua na Tamada Vakalomalagi, ka vakaraitaka na vakavinavinaka me baleta na vakabauta kei na ivakaraitaki nei tinaqu.