Sasagataki ni Salatu ni Bula Marau
Mai vei Elder Quentin L. Cook
Ena Kuoramu ni iApositolo Le Tinikarua
E rawa ni da susugi ira cake na gone yalododonu, vakasinaiti ena inuinui ena vanua cava ga e vuravura kevaka era yavutaki dei vua na iVakabula.
iTaba mai vei Jim Lillywhite
Ena vuqa na yabaki sa oti, eso vei ira na tavalequ gone era a lesi me ra cakava e dua na tavi ni veiqaravi ena were nei Tutu Crozier Kimball. Me kedra isau, a yalataki vei ira na keke totoka nei Bubu Clara1 ka vakabutari ga e vale.
Ni ra sa vakacavara na nodra itavi, era a gole sara ki valenikuro me ra veisaumi. Ia, a vakalatilati tu e katuba ni valenikuro o tutu. Na tavalequ o Kathy Galloway, ka sa yabaki 14 ena gauna oya, a nanuma lesu ni a dabe sobu ena dua na idabedabe ni taba piano ka sureti ira na tavalequ me ra dabe ena vuloa. A vakavinavinakataki ira ena nodra cakacaka kaukauwa ka qai kaya ni tiko e dua na ka bibi me wasea ni bera ni ra kania na kedra keke.
“Ena yaco mai e dua na gauna ena nomuni bula o ni na gadreva kina moni kila ka cakacakataka na veika au vakarau wasea oqo vei kemuni,” a kaya.
A vakamacalataka ni o tukana o Heber C. Kimball (1801–68) kei ira na tubuna painia tale eso era a sotava eso na bolebole dredre vakayago. E kaya o tutu ni ra a kila vakatotolo na painia ni ke ra via bula, e dodonu me ra cakacaka vata ka veilomani ka veiqaravi vakai ira.
“Oqo e dua vei ira na iyau cecere era biuta tu mai vei kemuni!” e kaya o koya ni sa tekivu me drodrova sobu na baluna na wai ni matana.
“Ena noqu veikacivi vakapeteriaki ka tukamuni, ni’u rai yani ki na veigauna sa bera mai, e tagi na yaloqu ena vukumuni,” a kaya. “O ni na sotava na bolebole ni yalo kei na loma ka sega ni rawa ni ra a raitayaloyalotaka mai e levu vei ira na tubuda painia.”
Vakavo ga ke ra vakamareqeta na itabatamata gone na nodra ivakaraitaki cecere ni loloma kei na veiqaravi na painia, a tomana o koya, “e vuqa vei kemuni ena druka baleta ni na sega ni rawa mo ni bula taudua ga vakai kemuni.”
Sa qai tinia o Tutu Kimball, me semati keitou vata vaka yalo: “Eda veigadrevi vakaikeda. Me ikuri ni noda veiwaseitaka vakai keda na noda ivakadinadina ni kosipeli, sa noda itavi meda veilomani ka veiqaravi ka veivaqaqacotaki ka veisusugi ka veitokoni ka veivakaukauwataki vakai keda, vakabibi ena noda matavuvale. Yalovinaka nanuma tiko ena iotioti ni gauna, na nomuni bula tiko ena rawa ni vakatau ena nomuni lomasoli mo ni cakacaka vata ka veilomani ka veiqaravi vakai kemuni. Ia oqo, me da lako yani ka kania na keke!”
Eda Veigadrevi Vakai Keda
iTaba mai vei Wendy Gibbs Keeler
Me vaka e vakaraitaka tu na tiko yavavala e vuravura ka sa wavoliti keda tu, ka vaka talega na nona a raica taumada mai o Tutu Crozier Kimball, eda veigadrevi vakai keda. Eda gadreva na matavuvale dauloloma, kuoramu kei na iSoqosoqo ni Veivukei vakasinaiti ena veiqaravi, kei na veitabana, tabanalevu, kei na iteki dau veitokoni.
“Na Kalou e vinakata meda cakacaka vata ka veivukei vakai keda,” e a kaya o Peresitedi Nelson. “O ya na vuna e talai keda mai kina ki vuravura o Koya vaka matavuvale ka tuvanaki keda vaka tabanalevu kei nai teki. O ya na vuna e kerei keda kina o Koya meda veiqaravi ka veirairaici vakai keda. O ya na vuna e kerei keda kina o Koya meda bula e vuravura ia ka sega ni vakavuravura. Eda rawa ni rawata e levu sara na ka ni da cakacaka vata mai na noda cakacaka taudua tu ga.”2
Na bula ena noda ikarua ni itutu e dredre. Ena vuku ni Lutu nei Atama kei Ivi, eda sotava kina na soni kei na ka votovotoa, na veivakatovolei kei na veitemaki. Na veika e sotavi vakaoqori era tiki ni ituvatuva ni marau, ia eda veivukei vakai keda ena vorata na cava ni bula.
Me vakataki Atama kei Ivi, erau a “vakatalai … mai na were ko Iteni” (Vakatekivu 3:23), eda sa talai mai na noda itikotiko ni vakavakarau ena bula taumada ki na vuravura lutu oqo. Ia me vakataki Atama kei Ivi, eda reki ena noda kila na ituvatuva ni Kalou me baleti ira na Luvena:
“Ia mai na siga ko ya sa vakarokorokotaka na Kalou ko Atama ka sa vakasinaiti, a sa tekivu me parofisaitaka na veika e baleti ira na veimatavuvale e vuravura, ka vaka: Me vakarokorokotaki tiko ga na yaca ni Kalou, ena noqu talaidredre sa tadola rawa kina na mataqu, io me’u kila na marau ena bula oqo, ka raica tale na Kalou ena yagoqu.
“Ia sa rogoca na veika kece oqo ko Ivi na watina, ka sa marau kina, ka kaya: Kevaka keirau a sega ni talaidredre ke a sega na neirau kawa, ka na sega ni rawa ni keirau kila na vinaka kei na ca, kei na reki ena neirau sa vueti, ka vakakina na bula tawamudu sa solia na Kalou vei ira sa talairawarawa”.(Mosese 5:10–11; raica talega na 2 Nifai 2:25).
“Tiki ni Nona iNaki Vakalou”
Na kena vakayacori na “tawamate rawa kei na bula tawamudu” sai koya na “cakacaka kei na lagilagi” nei Tamada (Mosese 1:39). “O keda,” me vaka e vakatavulica o Peresitedi Nelson, “eda sa tiki ni Nona inaki vakalou.”3
Na Mataveiliutaki Taumada kei na Kuoramu ni Apositolo Le Tinikarua eratou sa vakaraitaka me vaka ni da sa luvena tagane kei na yalewa na Kalou ena noda bula mai liu, eda a “kila ka dau qarava na [noda] Kalou me vaka ni Tamada Tawamudu ka ciqoma Nona yavu ka na yaco kina vei ira na Luvena me nodra e dua na yago vakalewe ka mai bulataka na bula oqo ena nodra vakacokotaki me ra taucoko ka kila deivaki kina na nodra icavacava vakalou ni ra itaukei ni bula tawamudu.”4 Kei Peresitedi Dallin H. Oaks, iMatai ni Daunivakasala ena Mataveiliutaki Taumada, a vakatavulica wale toka ga, “Ena ituvatuva ni Tamada Vakalomalagi, [o Jisu Karisito] a ‘bulia na lomalagi kei na vuravura’ (Vunau kei na Veiyalayalati 14:9) me rawa vei keda me da sotava yadua na veika e gadrevi me da vakasaqara kina na noda icavacava vakalou.”5
Na ivolanikalou kei ira na parofita ni gauna oqo era vakamatatataka na itavi bibi ni yagoda ena ituvatuva ni Kalou. Sa noda icavacava meda lesu tale ki na Nona iserau ena yago sa vakaturi cake mai na mate, ka vakacerecerei ka bula tawamudu vakamatavuvale.
“Na noda veimaliwai kei ira tale eso, na noda rawa ni kidava ka cakacaka me sala vata kei na dina, vakakina na noda rawa ni muria na ivakavuvuli kei na cakacaka vakalotu ni kosipeli i Jisu Karisito e yaco ena vakaitavitaki ni yagoda,” a cavuta o Elder David A. Bednar ena Kuoramu ni iApositolo Le Tinikarua. “Ena bula vakayago oqo, eda vakila na yalololoma, loloma, veilomani, marau, rarawa, nuinuicala, mosi ka vaka sara mada ga kina na bolebole ni yalani ni bula vakayago ena veisala eso ka vakarautaki keda ki na tawamudu.”6
Vakatavuvulitaki Karisito
Ena veisiga oqo ni vakatitiqa kei na veilecayaki, na kilai ni ituvatuva ni marau sa ka bibi ki na noda vakabulai tiko vakayalo. Ia e sega ni rawa ni da namaka na vuravura me susugi ira na luveda ena ivakavuvuli ni marau tawamudu. Ni da itubutubu, e gadrevi me da vakavulici ira na luveda me baleta na nodra itekitekivu kei na icavacava vakalou.
Eda tekivu ena noda vukei ira me ra tara cake e dua na ivakadinadina kei Jisu Karisito kei na Nona Veisorovaki, ka uto tiko ni ituvatuva ni veivakabulai. Au vakabauta ni rawa ni da susugi ira cake na gone yalododonu, ka vakasinaiti ena inuinui ena vanua cava ga e vuravura kevaka era yavutaki dei vua na iVakabula.
Ena lotu vakamatavuvale, ena masumasu vakamatavuvale kei na vuli ivolanikalou, ena itaviqaravi vakamatavuvale kei na ivalavala tudei, ka vakakina ena gauna sara mada ga ni veivakadodonutaki, “eda veivosakitaki Karisito, eda reki ena vukui Karisito, eda parofisaitaki Karisito, me rawa ni ra kila kina na noda kawa na sala me bokoci kina na nodra ivalavala ca” (2 Nifai 25:26).
Eda vukei ira na luveda me ra kila ni ena yavu ni veivakabulai, na veivutuni e dua na “lewenivuli ni bula taucoko”7 e kauta mai na inuinui kei na veivakabulai ni kauta tani nai colacola ni yalo ka vakararamataka na veisiga ni mataka.
Ni ra tara cake na luveda na vakabauta na Veisorovaki i Karisito, era na qai kila ni se tiko na inuinui ka waraki ira tu na Turaga ena yalololoma ni veiciqomi. Eda vukei ira me ra kila vakavinaka ni “cava ga e dodonu [meda] biuta tani meda muria kina na salatu ki na [noda] itikotiko vakalomalagi, ena sega ni okati me dua na solibula ena dua na siga.”8
Vakasoqoni Ira Na Luve ni Kalou
Eda na sega ni yacova na noda iyacoyaco vakalou vakaikeda ga. Me vaka ni da Yalododonu Edaidai, sa noda itavi bibi meda sureti ira na tani ena noda ilakolako ki na noda itikotiko vakalomalagi. Na vuravura e gadrevi ira tu na Yalododonu Edaidai era tuvakarau tu me ra vakacilava na rarama ni Veivakalesui mai ena nodra ivakadinadina, ivakaraitaki, kei na lomasoli me ra wasea na kosipeli. Ni da ivakaraitaki vinaka, eda sa rawa ni vakasoqoni ira mai na tamata ki na lotu.
Ni da tukuna tiko na vakasokumuni,” e kaya o Peresitedi Nelson “eda sa kaya tiko na ka dina oqo: ni luvena yadua na Tamada Vakalomalagi, ena yasa ruarua ni ilati, e dodonu mera na rogoca na itukutuku ni kosipeli vakalesuimai i Jisu Karisito. Era na lewa ga vakai ira ke ra gadreva me ra kila eso tale na ka.”9
O koya gona, me vaka na ivakasala nei Tukaqu o Crozier, meda wasea na noda ivakadinadina ni kosipeli i Jisu Karisito. Eda loloma ka veiqaravi, veivaqaqacotaki ka veisusugi, ka tokona ka vukei ira na noda daulomani kei ira na wekada.
Ni da vukei ira na tani ena salatu ki na nodra icavacava vakalou, eda sa vukei keda tiko ena sala vata oqori, “me da curu ki na matanitu i Tamada ka sega ni curu tale ki tuba, ka tiko vata kei na Kalou mai lomalagi me tawamudu” (3 Nifai 28:40).