E Tiko Eke e dua Na iVola i Momani!

iVakatakilakila

hand holding a copy of the Book of Mormon

iTaba mai vei Jacob A. Brown

Ena dua na Vakarauwai ena loma ni vulaibatabata, keirau a vakayagataka vakaveiwatini e dua na siga vinaka ka batabata me keirau kila vakavinaka cake kina na vanua keirau vakaitikotiko kina. Keirau se qai toki walega mai, mai na neirau itikotiko ki na Tokalau kei Amerika rauta ni udolu na maile na kena yawa ena sasagataki ni madigi ni vuli kei na cakacaka.

Keirau nanuma me keirau taubale ki na dua na univesiti voleka ka se bera ni dua vei keirau sa sikova. Vakalailai keirau a qai kunea na valenivola levu ni univesiti. Keirau dau marautaka na wilivola, o na watiqu, e dua na gonevuli qeretueti, e a via kila me raica se ivurevure cava e rawa ni kunea me baleta na nona vuli. Baleta ni vulica tiko o koya na itukutuku makawa vakalotu, keirau a vakacereka na ibinibini ivola ena iwasewase ni veikavakalotu ni valenivola. Ni keirau vakacereka vakatotolo eso na iulutaga taleitaki, a toboka na mataqu e dua na ivola lailai waqa karakarawa kilai levu.

“E tiko eke e dua na iVola i Momani!” Au a vakasolokakanataka ena marau.

Au a taura na ivola mai na vatavata. E a dua na kena ilavelave makawa, ka’u vakananuma se vakacava na dede ni gauna a tu kina e kea. Na ka dina a dreta na mataqu o ya e dua na tikiniveva ka dregati toka ena loma ni waqana e liu.

Na tikiniveva o ya e a dua na ivakadinadina lekaleka mai vei rau e dua na veiwatini mai Blackfoot, Idaho, Amerika. Ena nodrau ivakadinadina, erau vakamacalataka kina se cava na iVola i Momani kei na vuna e bibi kina. Erau a wasea e dua na ivakadinadina lekaleka ka kaukauwa ni ivola, ka rau sureti koya e wilika me masulaka me kila se sa dina.

E rawarawa na nodrau vosa, ia na nodrau itukutuku e lako vakadodonu ki yaloqu. E rairai beka erau nakita na veiwatini oqo me wiliki na nodrau ivakadinadina mai vei ira eda sega ni vakabauta vata. De rairai rau a solia beka na ilavelave oqo vua e dua erau kila. O cei e kila na levu ni tamata era a taukena se vica na maile sa lakova oti me mai tini kina ena valenivola ni univesiti?

Ni’u taura tu na ivola e ligaqu, a vakasinaita na yaloqu na Yalotabu. Ena dua na gauna lekaleka sara, au vakila ni savai tani na noqu icolacola ena loloma katakata ni iVakabula.

Na siga oya ena valenivola e tomana tiko me vakananumi au ena veivakalougatataki au ciqoma ena noqu wilika na iVola i Momani kei na bibi ni wasei ni noqu ivakadinadina baleta na ivola. E rawa ni lutu na noda ivakadinadina “ena vanua veivatu” se “ki na vanua vinaka” (raica na Maciu 13:3–9), ia sa ka bibi meda wasea. Na Kalou ena raica me soli ena gauna donu, ena vanua donu, ki vei ira na tamata donu.