Faatuatuaina Au Peresitene o Korama a Toeaina ma le Aualofa

Noa atu ā i teie taime ’ati nō te ma’i pe’e TŌVĪ-19, tē tāmau noa ra te tupura’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei. Nō te here o te Atua ia tātou, tē arata’i nei ’oia ia tātou nā roto i tō tātou peropheta ora, te peresideni Russell M. Nelson.

E’ita te mau ha’api’ira’a tumu ’e te mau parau tumu o te ’evanelia e taui terā rā ’ua ’ite au ē e nehenehe te tahi atu mau tauira’a e hōpoi mai ia tātou i te mau ha’amaita’ira’a rahi i roto i te ’Ēkālesia ’e i te fare. Te hō’ē o te mau tauira’a hope’a roa, ’o te tītaura’a ïa i ni’a i te mau peresidenira’a nō te pupu peresibutero ’e te Sōtaiete Tauturu ’ia fa’aō rahi atu ā i roto i te ’ohipa nō te fa’aorara’a.

I roto i te hō’ē rata i te feiā fa’atere nō te titi ’e nō te pāroita i te 6 nō ’Ātopa 2018 ra, ’ua tu’uhia te mau hōpoi’a nō te ’ohipa mīsionare a te mau melo, ’e te ’ohipa nō te hiero ’e nō te ’ā’amu ’utuāfare i roto i te pāroita, i roto i te rima o te mau peresidenira’a pupu peresibutero ’e Sōtaiete Tauturu. E mea ti’a ato’a i teie mau peresidenira’a ’ia hi’o ’e ’ia fa’anaho i te mau tauto’ora’a nō te aupurura’a ’e nō te ha’apa’ora’a i te feiā tei hina’aro i te tauturu.¹

’Auē te fa’ahiahia o teie tauira’a ! Tē māuruuru rahi nei au nō teie tauira’a.

E aha te aura’a nō teie tauira’a fa’ahiahia ? Nō’u, te aura’a, ’oia ho’i e nehenehe i te pupu nō te mau peresibutero ’e nō te Sōtaiete Tauturu e tauturu rahi atu ā i te ha’amāmāra’a i te hōpoi’a a te mau ’episekōpo nā roto i te fa’ahaerera’a i te ’ohipa misiōnare, te ’ohipa hiero ’e te ’ohipa ’ā’amu ’utuāfare, ’e te mau ’ohipa totauturura’a i mua.

’A hi’o noa ai te ’episekōpo i te tauturura’a moni ’e te fa’a’ohipara’a i te mau ō nō te ha’apaera’a mā’a i roto i te pāroita, e ’ohipa te mau peresidenira’a nō te pupu peresibutero ’e te Sōtaiete Tauturu i pīha’i iho i te mau ’utuāfare nō te ha’api’i i te mau parau tumu nō te fa’arava’ira’a iāna iho, ’e nō te ’āparau i te feiā pa’ari nō ni’a i te ’ohipa, te tāpura ha’amāu’ara’a, ’e ’aore rā te mau fifi i roto i te mau aura’a ’utuāfare.

E ti’a i te mau ’episekōpo ’ia fa’atumu i ni’a i te ha’apūaira’a i te feiā ’āpī—te feiā fa’atere ananahi nō te u’i nō muri mai—’ia vai noa i ni’a i te ’ē’a nō te fafaura’a.

E ti’a i te mau melo ato’a ’ia māramarama i teie tauira’a rahi. E aha ïa tā tō tātou mau melo e nehenehe e rave ?

1. E ’ohipa ’e te mau peresidenira’a nō te pupu peresibutero ’e nō te Sōtaiete Tauturu.

E mata na tātou i te pe’e i te mau parau tumu rahi nō te here, fa’a’ite ’e tītau manihini i te mau ta’ata ato’a ’ia haere mai i te Mesia ra. E mata na tātou i te rave i te ’ohipa i pīha’i iho i te mau misiōnare. E mata na tātou i te mau i te hō’ē parau fa’ati’a mana nō te hiero, ’e i te ’imi i te mau ’ioa o tō tātou mau tupuna ’e i te ’āfa’i te reira i te hiero. E mata na tātou i te ani i te mau tauturu ’ohipa hiero ’e ’ā’amu ’utuāfare, nō te tauturu.

2. E ti’aturi i te mau peresidenira’a nō te pupu peresibutero ’e nō te Sōtaiete Tauturu.

’Ia fa’aruru ana’e tātou i te mau fifi nō te ’ohipa, te faufa’a moni, te mau aura’a ’utuāfare, te mau tamari’i ’aore rā nō te fa’aipoipora’a, e mea ti’a ia tātou ’ia haere i tō tātou mau peresidenira’a nō te pupu peresibutero ’e nō te Sōtaiete Tauturu nō te ani i tā rātou tauturu. E nehenehe rātou e hōro’a mai ia tātou i te fa’aurura’a, te arata’ira’a ’e te a’ora’a ’a ’imi ai rātou i te fa’aurura’a nā roto i te mau pāpa’ira’a mo’a, te buka arata’i a te ’Ēkālesia ’e tā rātou mau pure i te mau mahana ato’a.

’Ua a’o mai te tuahine Jean B. Bingham, peresideni rahi nō te Sōtaiete Tauturu : « ’Eiaha e ha’amata nā ni’a i te ’episekōpo, tītauhia i te mau melo ’ia ha’api’i i te ha’amata nā ni’a i te peresidenira’a Sōtaiete Tauturu ’e te peresidenira’a pupu peresibutero ».²

3. Rave itoito i te aupurura’a.

’Ia au i te buka Arata’i a te ’Ēkālesia, te aupurura’a ’o te tāvinira’a ïa ia vetahi ’ē mai tā te Fa’aora i rave (hi’o Mataio 20:26–28). ’Ua here ’oia, ’ua ha’api’i, ’ua pure, ’ua tāmarū, ’e ’ua ha’amaita’i i te feiā ato’a ’ati a’e iāna (hi’o ’Ohipa 10:38). ’Ei mau pipi nā Iesu Mesia, tē ’imi nei tātou ’ia aupuru i te mau tamari’i ’a te Atua.

Tē hina’aro nei te Fatu ’ia fāri’i te mau melo ato’a o tāna ’Ēkālesia i te reira aupurura’a. Nō reira e fa’auera’a ’ohipa tō te mau taea’e nō te autahu’ara’a ’ei mau taea’e aupuru nō te mau ’utuāfare ato’a o te ’Ēkālesia. ’Ua fa’ata’ahia te mau tuahine aupuru nō te mau tuahine pa’ari ato’a. E tauturu teie mau fa’auera’a ’ohipa ’ia ha’apāpū ē tē ha’amana’ohia nei ’e tē ha’apa’ohia nei te mau melo o te ’Ēkālesia (’a hi’o Moroni 6:4).

Te aupurura’a e rāve’a faufa’a roa ïa nō tātou nō te ha’apa’o i te mau fa’auera’a ’ia here i te Atua ’e ’ia here i tō tātou ta’ata tupu (’a hi’o Mataio 22:36-40). E rāve’a faufa’a ato’a te reira nō te tauturu i te ravera’a i te ’ohipa nō te fa’aorara’a ’e te fa’ateiteira’a.

Tē tauturu nei te mau peresidenira’a nō te pupu peresibutero ’e nō te Sōtaiete Tauturu i te mau taea’e ’e te mau tuahine aupuru ’ia ha’api’i e nāhea rātou ’ia aupuru ia vetahi ’ē. E hōro’a ato’a rātou i te fa’aurura’a, te arata’ira’a ’e te pāturura’a. E nehenehe rātou e rave i te reira i roto i te mau uiuira’a aupurura’a³, i roto i te mau rurura’a i te Sābati, ’e i roto i te mau tāu’ara’a parau tāta’itahi.⁴

Te mau taea’e ’e te mau tuahine, ’a mata na tātou i te aupuru ma te itoito, mai tā te Fa’aora i rave.

4. E ti’aturi i te mau taea’e ’e te mau tuahine aupuru.

’Ua a’o mai ’o Elder Paul B. Pieper, Hitu ’Ahuru huimana fa’atere rahi : « E tītauhia ia tātou ’ia ti’aturi ē ’ua pi’ihia tō tātou mau taea’e ’e mau tuahine aupuru ’e e fa’auera’a ’ohipa tā rātou nā te Atua nō te tauturu ia tātou. E ti’a ia tātou ’ia ti’aturi ē ’o te rēni mātāmua te reira nā te Fatu nō te toro mai i te rima ia tātou. Tītauhia ia tātou ’ia fa’a’ohipa ia rātou.

« E nehenehe rāua to’opiti e fa’arahihia mai te mau ’episekōpo nō tē pāhono i te mau hina’aro o te mau melo. ’Aita e tītauhia ia ’outou ’ia haere i te ’episekōpo ra nō te tītau i taua mana autahu’ara’a ra ».⁵

’A tāvini ai tātou ia vetahi ’ē ’ei mau taea’e ’e mau tuahine aupuru, e nehenehe tātou e ha’amau i te bāsileia o te Atua i roto i tō tātou ārea.

5. ’A tāmau noa i te tauto’ora’a fa’atumuhia i ni’a i te ’utuāfare ’e pāturuhia e te ’Ēkālesia.

’Ei ta’ata hō’ē ’e ’ei ’utuāfare, e mea ti’a ia tātou ’ia tāmau noa i te rave i te ha’api’ira’a ’evanelia i fa’atumuhia i ni’a i te ’utuāfare. Nā roto i te ravera’a i te tuatāpapara’a pāpa’ira’a mo’a i te fare, e ha’apūaihia tō tātou fa’aro’o ’e tō tātou ’itera’a pāpū ia Iesu Mesia.

Tē parau pāpū nei au ē ’ua here ’e ’ua ’ite tō tātou Metua i te ao ra ’e tāna tamaiti here ’o Iesu Mesia ia tātou. Tē arata’i nei rāua ia tātou i teie mahana nā roto i tō tātou peropheta ora, te peresideni Russell M. Nelson. Tē māuruuru roa nei au nō tāna fa’aterera’a ’e tōna huru orara’a ’ei pipi. ’A mata na tātou i te ti’aturi ’e i te pāturu i tō tātou mau peresidenira’a nō te pupu peresibutero ’e nō te Sōtaiete Tauturu, ’e i te ’ohipa ’e ’o rātou. ’Ia nā reira tātou, e vata roa atu ā tō tātou ’episekōpo ’e te ’episekōpora’a nō te tauturu i te ha’apūaira’a i tō tātou feiā ’āpī i roto i te ’evanelia a Iesu Mesia.

Nā roto i te i’oa o Iesu Mesia, ’āmene.

Buka arata’i rahi