Ringim Mi Faswan

Taem we mi mi wan yang mama we mi gat fas bebi blong mi, hasban blong mi i stap yet long skul. Mitufala i wok haf dei blong kasem smol vatu.

Mi stap luk fored blong no wok wan ful dei, mo mi bin plan se bae mi wajem wan olfala muvi long televisen. Hemia i long taem ia bifo i gat DVD o onlaen seves.

Muvi ia, bae i stat long stret taem—10 klok moning.—taem boe blong mitufala bae i slip. Long muvi ia, i gat Cary Grant i plei, we i wan fevret muvi sta blong mi blong Amerika.

Naet bifo long dei blong no wok ia, presiden blong Rilif Sosaeti blong wod i ring i kam. Wan sista long wod blong mifala i kasem wan smol hat atak, mo i nidim blong oli kea long hem long nekis dei kasem taem we boe blong hem i kambak afta long wok.

“Bae mi save mekem miwan, be i gat sam pipol bae oli kam long haos,” presiden blong Rilif Sosaeti i talem. Hem i eksplenem se hem i no gat wan narawan moa blong askem hem, mo hem i talem se bae hem i save lukaot long boe blong mi taem mi go lukaot long sista ia. Mi agri be mi no wantem.

Long nekis moning, mi go putum boe blong mi mo mi go visitim sista ia. Nem blong hem i Louise, mo kwiktaem nomo mi filim wan bigfala filing blong frensip long hem. Hem i olfala semmak olsem bubuwoman blong mi, we i jes ded.

Mi bin helpem Louise blong dresap, mo afta, mi rere long wan moning kaekae blong hem. Hem i go long wan jea ia, mo i onem televisen. I no longtaem bae i 10 klok. Taem hem i stap swijim ol janel wetem kontrol blong TV, hem i talem: “Televisen ia, i no gat gud samting long hem.”

Mi wet smol, afta mi talem: “i gat Cary Grant muvi long janel 11.”

“?I tru?” hem i askem. “Mi lavem Cary Grant!”

Mitufala i wajem muvi mo rili laekem. Afta long hemia, hem i serem sam samting abaot laef blong hem, taem hem i gat semfala yia olsem mi. Hem i tokbaot boe blong hem long mi, mo mi tokbaot boe blong mi long hem. Hem i tokbaot Jos, mo olsem wanem hem i misim Jos.

Taem boe blong hem i kambak, mi promesem hem se bae mi gobak luk hem. Mi talem long presiden blong Rilif Sosaeti se, sapos Louise i nidim wan bakegen, bae hem i ringim mi faswan.

Samtaem afta, long ol nekis tu wik, Louise i kasem wan nara strok bakegen, mo hem i ded bifo mi gat janis blong go luk hem bakegen. Mitufala i serem 9 aoa tugeta mo wan muvi, be hem i kam fren blong mi. Mi tingting long hem plante taem.

Mi talem tangkyu se mi no lusum janis ia blong helpem wan sista we i nidim mi—mo mi nidim hem, i nomata we mi no bin luksave hemia.