“Mi Jusum blong Lisin Gud long Hem,” Liahona, Maj/Epril 2022
Ol Voes blong Ol Lata–dei Sent: Ol Woman we Oli Gat Fet
Mi Jusum blong Lisin Gud long Hem
Taem wan sista i tokbaot wan kek long taem blong testemoni blong hem, mi lukluk i go antap mo stat blong lisin.
Mi bon insaed long Jos, mekem se mi mi bin stap go long Praemeri mo ol yut aktiviti. Mi bin laekem tumas Praemeri from ol singsing mo ol lesen.
Taem mi kam yangfala, naoia mi stat blong go longwe afta we mi muv i go long wan niu wod. Mi bin stap go long ol yut aktiviti plante wik, be mi stap miwan nomo, mo mi no tekpat tumas. Mi no bin stap laekem jos long Sandei, mekem mi stap go wanwan taem. Mi luksave se mi mi no rili jenisim laef blong mi i go long gospel mo ol tijing blong gospel. Mi no bin gat wan testemoni blong miwan.
Olsem wan taem, long taem blong wan fast mo testemoni miting, maen blong mi i stat go olbaot. Mi no rili stap lisin taem ol memba blong wod oli bin stap serem ol testemoni blong olgeta, be mi talem amen long en blong wanwan testemoni. Nao, wan sista i go long pulpit mo i stat blong talem testemoni blong hem. Taem hem i tokbaot wan kek long blong hem, mi lukluk i go antap mo stat blong lisin.
“Oltaem mi stap toktok long Papa long Heven, iven taem mi stap bekem wan kek,” hem i talem. “Mi talem wan smol prea se kek ia blong i solap gud mo bae i tan gud. Mi save se Hem i stap ansarem ol prea blong yumi.”
Mi no tingting tumas long testemoni ia kasem taem we trak blong mifala i no wantem stat mo mifala i nid blong go long stoa blong pem sam kaekae. Long tetaem ia, mi tingbaot ol toktok blong sista ia. Mekem se, mi gobak long bedrum blong mi blong askem God blong helpem mifala, blong mekem se trak ia bae i stat. Mi nildaon mo prea. Taem mi finis, mi tekem ol ki blong trak, mo pusum i go long trak. Mo nao, ansa blong prea blong mi i kam—saon blong trak we i stat.
From ansa blong simpol prea ia, mi aot long wan rod we mi bin stap go blong foldaon, mo hemia i bin helpem mi blong kasem wan testemoni blong miwan, mo mi jenisim laef blong mi fulwan i kam long gospel. Ol toktok blong Praemeri singsing we mi laekem tumas i kambak long maen blong mi: “Filim Lav blong Sevya;” 1 ol toktok ia oli kam moa bitim ol toktok blong wan singsing. Oli kam ol filing ia we mi rili stap filim.
Mi stap prea abaot evri samting naoia. Mo i nomata se ansa, o taem blong ansa, i no oltaem wanem we mi wantem, mi stap jusum yet blong stap harem mo lisin gud long Hem taem mi stap tingbaot ol toktok blong Nifae: “yufala i mas prea oltaem, mo no letem tingting blong yufala i foldaon” (2 Nifae 32:9).