“God I Save Helpem Yumi long Ol Taem we Oli Had,” Liahona, Maj/Epril 2022
Ol Prinsipol blong Wok blong Givhan
God I Save Helpem Yumi long Ol Taem we Oli Had
Mo yumi save yusum wanem we yumi kasem aot long ol tes blong yumi blong helpem ol narawan.
Foto i kam long Getty Images
Marcela Endrek, wan woman Kodoba long Ajentina, i bin sik mo i no glad tumas. Hemia i bin hevi tumas long hem. Long medel blong filing ia se i no gat wan wei aot, hem i harem wan toktok blong konfrens we i bin tokbaot prea. Tingting i kam stret long hat blong hem blong hem i prea strong abaot ol trabol blong hem.
Hem i stat blong prea oltaem blong kasem help. Blong stap prea, i givim hem pis mo kamfot, iven taem we helt blong hem i no bin kam antap gud. Wanem i tru, i we, sik blong hem i stap go nogud moa, kasem taem we hem i nomo save wokbaot. Naoia, hem i gat nara trabol ia blong no save pem ol bil blong hospital.
From se hem i nid, hem i stat blong faenemaot olsem wanem bae hem i mekem wetem ol helt problem blong hem, long sam nara wei. Hem i filim blong lukluk blong jenisim sam fasin blong kakae blong hem, mo hem i bin sapraes hamas hemia i bin helpem hem. Hem i kam oraet kwik, mekem se hem i stat blong stadi ol fasin blong kakae.
Samtaem afta, hem i mitim wan yang woman, nem blong hem Evelyn, we i gat semfala sik mo hem i filim semmak olsem Marcela—i sik, i no glad, mo i lukaotem sam ansa. Marcela i luk hem insaed long niu fren ia. Hem i serem sam samting we hem i bin stap lanem abaot ol joes blong kaekae mo fasin blong kakae. Mo tu, hem i serem wetem Evelyn witnes blong hem abaot paoa blong prea. Hem i invaetem Evelyn blong prea blong mekem se bae hem i filim lav ia blong God mo save se God i savegud hem.
Sam dei afta, Marcela i bin glad tumas blong luk Evelyn bakegen. Wan jenis i stap hapen finis long bodi mo spirit blong Evelyn. Evelyn i letem hem i save se laef blong hem i bin stap jenis, mo hem i bin save filim lav ia we God i gat long hem.
Aot long ol tes mo ol jalenj blong hem, Marcela i kasem lav mo sore, mo i kasem infomesen we hem i nidim blong helpem ol narawan.
Yumi Kam Fri blong Yumi Save Mekem Man I Kam Fri
Josef long Ijip, i kam long Robert T. Barrett
Stori blong Josef long Ijip i wan nara eksampol blong wanem i save hapen taem yumi mekem tingting blong trastem God tru long ol tes blong yumi: i no se Hem i save mekem yumi kam fri nomo, be tu, Hem i save putum yumi long wan posisen blong yusum eksperiens blong yumi blong save helpem ol narawan (luk long Jenesis 37–45).
Josef i gat strong tingting blong trastem God mo obei ol komanmen blong Hem, i nomata we oli salem hem, hem i lusum samting mo oli sarem hem long kalabus. From strong bilif we Josef i gat long God, mo from hat blong hem blong wanem stap strong tru long ol tes ia wetem wan longfala tingting mo ol gud filing nomo, “Lod i bin stap wetem Josef”(Jenesis 39:21) mo i putum hem long wan posisen we hem i save blesem plante man (luk long Jenesis 45:5–8).
Ol Prinsipol blong Tingting long Olgeta
Taem yu stap tingting long ol janis blong yu blong givhan long ol narawan, tingting long ol prinsipol ia we oli soemaot long ol stori ia:
-
Ol jalenj blong yumi oli save kam ol blesing. Sapos yumi”prea oltaem mo stap biliv” taem yumi stap gotru long ol jalenj blong yumi, bae Papa long Heven i save tanem olgeta jalenj ia oli blong gud blong yumi (luk long Doktrin mo Ol Kavenan 90:24; luk tu long Rom 8:28).
-
Ol jalenj blong yumi oli save kam mekem yumi rere. Sapos yumi no stap flas long taem blong ol tes blong yumi, God i save yusum ol eksperiens blong yumi blong tijim yumi mo jenisim yumi (luk long Doktrin mo Ol Kavenan 112:13).
-
Ol jalenj blong yumi oli save kam ol janis blong givhan. Sapos yumi wantem blong trastem Hem, Papa long Heven bae i putum yumi long ol posisen blong yusum wanem we yumi lanem long ol eksperiens blong yumiwan, blong stap helpem ol narawan (luk long Mosaea 24:13–14).
?Wanem Nao Yumi Save Mekem?
Prea blong save olsem wanem eksperiens blong yu save helpem olgeta ia we yu gat wok blong givhan long olgeta. Afta go aot mo help.