?Yu Yu Stap Lukaotem Kraes Evri Dei?

I Kam long Orson S. Franco

Eksperiens blong mi insaed long tempol i bin helpem mi blong luksave se mi nidim blong lukaotem blong save faenem Kraes evri dei.

Woman ia we i raet i stap long Gwatemala.

Pikja

wan yang adalt we i wan man, i stap ridim olgeta skripja long saed blong wan windo we i open

Taem mi smol, mi stap askem ol kwestin long miwan, olsem: “?Tabu Spirit ia, Hem i save toktok?” “?Taem bae mi go long heven, bae mi luk God?”

Naoia, mi mi olfala smol, mi save lukbak mo luk se, oltaem nomo, Papa long Heven i bin stap soem rod long mi, mo i bin soem mi pruf ia se Hem i laef i stap, be mi nao, mi no bin save luksave han blong Hem insaed long laef blong mi. Mi bin kasem blesing ia blong mi groap insaed long wan hom wetem gospel blong Jisas Kraes we i kambak i stap insaed long hem; be mi bin laef wetem wan testemoni we i blong wan nara man blong wan longfala taem. Hem i bin had long mi blong biliv se, i tru, God i wan ril man.

Wan dei, taem mi gat samples 15 yia, bisop blong mi i bin anaonsem se bae i gat wan wod tempol trip. Mi mi bin stap go oltaem nomo long tempol wetem famli blong mi, mekem se mi no ting se hemia i wan bigfala samting. Mi neva filim plante samting, mo mi no bin andastanem hamas ol kavenan mo ol odinens we oli bin stap mekem insaed long tempol, oli impoten tumas.

Taem we dei ia i kam, mi go insaed long tempol mo go jenisim klos, mi werem waet longfala klos ia. Taem mi wokbaot pasem wan mira, ae blong mi i kasem mi we mi dresap waet mo bigfala smael long fes blong mi. Taem mi bin stap wet long ol nara memba blong wod blong mi, nao mi mi sapraes tumas i stap. Mi stap lukluk ples blong baptaes ia, we mi luk se i naes tumas, mo ol peinting we oli stap. Kwiktaem, mi filim Spirit i tajem hat blong mi sloslo.

Bae mi neva fogetem ol toktok we oli kam long maen blong mi: “Orson, hemia i haos blong Lod.” Hem i lavem yu. Hem i wantem yu blong yu jenisim laef blong yu mo yu traehad blong kam wan man we i gud moa, smol tedei smol tumoro i go.”

Mi filim plante lav long ol toktok ia, be kwiktaem mi harem wan bigfala sem i kavremap mi. Mi no bin tekem tempol i series kasem long dei ia. Mekem se mi talem wan prea long hat blong mi, mo mi bin askem Papa long Heven blong Hem i fogivim mi.

Mo mi bin save se Hem i bin harem prea blong mi from se mi bin filim plante pis insaed long hat blong mi.

Long dei ia, mi bin mekem bilif blong mi i strong moa, mo mi bin kasem wan tru testemoni abaot gospel, we mi bin wantem tumas. Long dei ia, mi bin save talem strong olsem tufala disaepol blong Jon i bin talem: “Ei, mifala i faenem Mesaea finis” (luk long Jon 1:41).

Ol Simpol Wei blong Konek

Stat long eksperiens ia, mi bin traehad blong luksave moa paoa blong Papa long Heven insaed long laef blong mi taem mi stap lukaotem Jisas Kraes evri dei. I nomata se wol ia i save mekem i had blong harem voes blong Sevya long sam taem, mi mi save naoia se, i tru, Hem i wan ril man, mo Hem i stap wetem mi.

Plante long yumi i gat ol dei olsem, we yumi filim se yumi kolosap moa long heven bitim oltaem. Mo tu, yumi gat ol dei we oli had taem yumi stap gat hadtaem blong filim paoa blong Hem nomata yumi traehad, o gat ol bisi dei we yumi no save faenem inaf taem blong stap lukaotem Hem. Be mi mi save se, sapos yumi gat wan tru hat blong lukaotem Hem, bambae yumi luk han blong Hem insaed long laef blong yumi.

Taem yu filim se yu no joen wetem Sevya, askem yuwan: “Mi mi stap traehad blong faenem Mesaea evri dei?

Taem yumi stap lukaotem blong stap olsem Ol Aposol blong bifo, mo lego ol net blong yumi oli stap (luk long Matiu 4:20) mo ol nara responsabiliti mo intres blong wan smol taem, blong save tanem yumi i go long Hem, bambae yumi faenem Hem.

I gat ol ples we paoa long spirit i stap, we i save helpem yumi. Profet Alma i mekem yumi tingbaot tu se, “tru long ol smol mo ol samting we i no strong, ol bigfala samting i kam blong hapen” (Alma 37:6). Ol smol aksen blong fet mo nara praktis long saed blong spirit we yumi mekem evri dei, oli save helpem yumi blong mekem paoa blong yumi blong luksave Lod insaed long laef blong yumi, i kam antap moa.

Samfala long ol tul ia long saed blong spirit, oli save ol samting olsem:

Prea wetem strong bilif.
Stap stadi long ol skripja wetem tru tingting mo wetem mining.
Blong givim seves mo fogetem yuwan
Serem testemoni blong yu wetem wan fren
Stap lisin long ol hym o miusik long saed blong spirit
Go long institiut
Stap Kipim Sabat dei i tabu
Livim Kakae
Stap go long tempol oltaem

Plante moa samting oli save helpem yumi blong faenem Jisas Kraes, be ki, hem i blong gohed blong stap lukaotem Hem. Presiden Russell M. Nelson i tijim: “Taem yumi stap lukaot blong stap ol disaepol blong Jisas Kraes, ol hadwok blong yumi blong stap lisin gud long Hem i mas kam wetem moa tru tingting. Hem i minim se yumi hadwok wetem tingting, oltaem, blong fulumap evri dei laef blong yumi wetem ol toktok blong Hem, ol tijing blong Hem, mo ol trutok blong Hem.” ¹

?Yu Yu Faenem Hem Tedei?

Iven sapos yu no stap kasem evri ansa we yu stap lukaotem naoia, !yu gogohed! I simpol nomo. Yu lukaotem Kraes mo yu jusum blong gat fet long Hem. Sapos yu traem blong faenem Hem evri dei tru long ol smol aksen, mi save se bambae yu kam blong filim se Hem i stap long heven mo Hem i agri. Mi save se hemia i tru from se mi bin filim hemia.

Papa long Heven i luksave ol hadwok blong yumi. Hem i no kea tumas se ol samting we yumi stap mekem blong mekem spirit blong yumi i kam antap, i go bigwan olsem wanem, sapos we, evri dei, mo evri dei, bae yumi save talem wetem tru save se: “!Tedei, mi mi faenem Mesaea!”

Hem i prea blong mi se bae yumi save mo lavem Sevya blong yumi, evri dei. Se bae yumi mekem olsem we Moronae i bin talem, mo bae yumi “lukaotem Jisas ia” (Ita 12:41). Bambae yu mo mi i faenem, long en blong evri dei, wan ia we Moses mo ol nara profet oli bin raetem: Jisas blong Nasaret. Taem yumi stap lukaotem Kraes, bambae yumi luk han blong God insaed long laef blong yumi. Mo moa bae yumi stap lukaot Kraes evri dei, moa bambae yumi faenem Hem mo save haremsave voes blong Hem, we i stap lidim, mo i stap soem rod long yumi evriwan truaot long laef blong yumi.