E haere ’ē ānei au ?

Hōho’a

hō’ē vahine e hi’o ra i te hōho’a o te Fa’aora

Tu’uhia ’ei hi’ora’a

I muri noa iho i tō’u tomora’a mai i roto i te ’Ēkalesia, tē ha’uti ra te hō’ē ti’a fa’atere nō te Sōtaiete Tauturu nō ni’a i te tahi mau tupura’a ’ārearea. I reira iho, ’ua ha’amata ’oia i te ha’uti nō ni’a iā’u i mua i te mau ta’ata ato’a. ’Ua huru ’ē roa vau ’e ’ua ino’ino vau.

Tō’u mana’o mātāmua ’o te ’orera’a ïa e ho’i fa’ahou i te pāroita. ’Ua ’īriti mai au i tā’u pāpa’ira’a mo’a, ma te tāmata i te ’imi i te tāmāhanahanara’a. ’A tai’o ai au, ’ua ’ite au i te hō’ē īrava i reira Iesu i te anira’a i te feiā tei ’ino’ino i tāna mau ha’api’ira’a, « E haere ’ē ato’a ānei ’outou » ? (Ioane 6:67).

’Ua pāhono ’oi’oi au i roto i te ferurira’a ē, « E’ita, e’ita vau e haere ē ! »

’Ua niuniu vau i te peresideni nō te Sōtaiete Tauturu, tei parau mai iā’u ’ia niuniu i te tuahine tei hauti ha’ama’au mai iā’u. ’Ua niuniu vau iāna ’e ’ua fa’a’ite atu i tō’u mau mana’o. ’Ua fa’aoti a’era māua ē, e mea fa’ahiahia te huru fa’a’āreareara’a ’eiaha rā e ha’uti ha’ama’au i te hō’ē ta’ata ’aita tātou i mātau i mua i te hō’ē pupu ta’ata. ’Ua parauparau ato’a māua, ’ia vai araara noa i te mau melo ’āpī o te pāroita.

’Ua tāmau noa vau i te haere i taua pāroita ra ’a ora ai au i roto i taua ’oire ra. ’Ua fāri’i au e rave rahi mau ’itera’a fa’ahiahia i muri a’e i tō’u fa’afāriura’a i te ’evanelia.

I roto i tō’u iho tere nō te upo’oti’a i ni’a i te mau fa’a’ino’inora’a, ’ua ’itehia iā’u teie mau parau tauturu a tō tātou feiā fa’atere o te ’Ēkālesia :

« Mai te mea e parau mai te hō’ē ta’ata ’e ’aore rā, e rave ’oia i te hō’ē ’ohipa ’o tā tātou e fa’ariro nei ’ei ’ino’inora’a, tā tātou tītaura’a mātāmua ’o te pāto’ira’a ïa i taua ’ino ra, ’e i muri iho, e ’āparau ’ōmo’e ma te parauti’a, i mua roa i taua ta’ata ra ». ¹

« Tē fafau atu nei au ia ’outou ē, ’ia mā’iti ana’e ’outou ’eiaha e ’ino’ino … , e ’ite ïa ’outou i te here ’e te fāri’ira’a a [te Fa’aora] ». ²

Tē māuruuru nei au i te mea ē, ’ua mā’iti au ’eiaha e fa’aru’e i te ’Ēkālesia nō te hō’ē mana’o fifi ’ore. ’E tē māuruuru nei au i te rirora’a ’ei melo nō te ’Ēkālesia tei fa’aho’i-fa’ahou-hia mai, i reira tō’u fāri’ira’a i te pūai nō te ha’apa’o ’e nō te tāmau noa i ni’a i te ’ē’a nō te ti’ara’a pipi. Tē māuruuru nei au i te a’ora’a a te mau peropheta ’e te mau ’āpōsetolo, ’o tē ha’api’i nei ia tātou nāhea ’ia ’ohipa ’e tō tātou mau taea’e ’e te mau tuahine i roto i te ’evanelia.

E nehenehe au e tāmau noa i te ha’apa’o ’e ’eiaha e mā’iti ’ia ’ino’ino. E nehenehe au e rōtahi i ni’a i tā’u iho mau tauto’ora’a ’ia riro mai te Mesia te huru ’e ’ia ’ite i te here ’e te fāri’ira’a a te Fa’aora.

E haere ’ē ānei au ? ’Aita. Tē vai nei tō’u ’itera’a pāpū ē, teie te ’Ēkālesia a Iesu Mesia i fa’aho’i-fa’ahou-hia mai i ni’a i te fenua nei i teie mahana ’e tei roto ho’i i te reira « te mau parau nō te ora mure ’ore » (Ioane 6:68).