« E nehenehe te Atua e tauturu ia tātou i roto i te mau tau fifi », Liahona, Māti./’Ēperēra 2022.
Te mau parau tumu nō te aupurura’a
E nehenehe te Atua e tauturu ia tātou i roto i te mau tau fifi
’E e nehenehe tātou e fa’a’ohipa i te mea e noa’a mai nā roto i tō tātou mau fifi nō te tauturu ia vetahi ’ē.
Hōho’a nā Getty Images
’Ua ma’ihia ’e ’ua ’oto ’o Marcela Endrek, nō Córdoba, Rāparata. E mea teimaha roa te reira i ni’a iāna. I roto i tōna mana’o rāve’a ’ore, ’ua fa’aro’o ’oia i te hō’ē a’ora’a nō te ’āmuira’a tei paraparau mai nō ni’a i te pure. ’Ua tae ti’a roa mai te mana’o i roto i tōna ’ā’au ’ia pure ma te tu’utu’u ’ore nō ni’a i tōna mau fifi.
’Ua ha’amata ’oia i te pure tāmau nō te ani i te tauturu. ’Ua hōpoi mai te pure i te hau ’e te tāmāhanahana i roto iāna, noa atu ē ’aita tōna ea i maita’i roa. Inaha, ’ua ’ino roa mai tōna ma’i ’e e’ita tāna e nehenehe fa’ahou e rave i te ’ohipa. I teienei, ’ua fifi ato’a ’oia nō ’aufaura’a i te mau ha’amau’ara’a nō te rapa’aura’a iāna.
Nō teie vaira’a ataata, ’ua ha’amata ’oia i te ’imi i te tahi atu rāve’a nō te fa’aruru i tōna mau fifi i te pae nō te ea. ’Ua tae mai te fa’aurura’a iāna ’ia rōtahi i ni’a i te tauira’a i tāna huru tāmā’ara’a ’e ’ua māere ’oia i te tauturura’a rahi nō te reira. E mea māere mau te maita’ira’a mai tōna ea, nō reira ’ua ha’amata ’oia i te tuatāpapa hōhonu i te parau nō te mā’a.
I te tahi taime i muri mai, ’ua fārerei ’oia i te hō’ē tamāhine ’o Evelyn te i’oa, tei ma’ihia mai ia Marcela ato’a—tei ’oto ’e tei hepohepo roa nō te fāri’i i te mau pāhonora’a. ’Ua ’ite ’o Marcela iāna iho i roto i tōna hoa ’āpī. ’Ua fa’a’ite ’oia i te tahi o te mau mea tāna i ha’api’i mai nō ni’a i te ma’itira’a i te mā’a ’e te tāmā’ara’a. ’Ua fa’a’ite ato’a ’oia ia Evelyn i tōna ’itera’a pāpū nō ni’a i te mana o te pure. ’Ua ani manihini ’oia ia Evelyn ’ia pure ’ia ti’a ato’a ho’i iāna ’ia ’ite i te here o te Atua ’e ’ia ’ite ē, ’ua ’ite ’oia iāna.
Tau mahana i muri mai, ’ua ’oa’oa roa ’o Marcela i te ’ite-fa’ahou-ra’a ia Evelyn. ’Ua ’ite-a’ena-hia te hō’ē tauira’a i ni’a i tōna tino ’e i te pae vārua. ’Ua fa’a’ite Evelyn iāna ē, ’ua taui tōna orara’a ’e ’ua ti’a ho’i iāna ’ia ’ite i te here o te Atua nōna.
I roto i tōna mau fifi ’e tōna mau tāmatara’a, ’ua noa’a ia Marcela te aumihi ’e te ha’amāramaramara’a tāna i hina’aro nō te tauturu ia vetahi ’ē.
Fa’aorahia ’ia ti’a ia tātou ’ia fa’aora
Joseph in Egypt [Iosepha i ’Aiphiti], nā Robert T. Barrett
Te ’ā’amu nō Iosepha i ’Aiphiti ’o te tahi atu ïa hi’ora’a nō te ’ohipa e nehenehe e tupu mai, ’ia hina’aro pāpū ana’e tātou e ti’aturi i te Atua i roto i tō tātou mau fifi : e nehenehe tāna e fa’aora ia tātou, e ’ere noa rā terā, e nehenehe ato’a tāna e tu’u ia tātou i ni’a i te hō’ē ti’ara’a e ti’a ai ia tātou ’ia fa’a’ohipa i tō tātou ’itera’a nō te tauturu ia vetahi ’ē (hi’o Genese 37–45).
’Ua hina’aro pāpū roa Iosepha ’ia ti’aturi i te Atua ’e ’ia ha’apa’o i tāna mau fa’auera’a noa atu ā te ha’avarera’a, te mo’era’a ’e te vaira’a i roto i te fare tāpe’ara’a. Nō te fa’aro’o o Iosepha i te Atua ’e tōna hina’aro ’ia fa’aruru i tāna mau tāmatara’a ma te fa’a’oroma’i ’e te ’ino’ino ’ore, « tei pīha’i iho rā Iehova ia Iosepha » (Genese 39:21) ’e ’ua tu’u iāna i ni’a i te hō’ē ti’ara’a nō te ha’amaita’i e rave rahi ta’ata (hi’o Genese 45:5–8).
Mau parau tumu e feruri
’A feruri ai ’outou i tā ’outou mau rāve’a nō te aupuru ia vetahi ’ē, ’a feruri i teie mau parau tumu i fa’ahōho’ahia i roto i te mau ’ā’amu :
-
E nehenehe tō tātou mau tāmatara’a e riro ’ei mau ha’amaita’ira’a. Mai te mea e « pure noa [tātou] i te mau taime ato’a, ’e [’ia] ti’aturi noa ho’i » ’a fa’aruru ai i tō tātou mau tāmatara’a, e nehenehe te Metua i te ao ra e huri i te reira ’ei maita’i nō tātou (hi’o Te Ha’api’ira’a Tumu ’e te mau Fafaura’a 90:24 ; hi’o ato’a Roma 8:28).
-
E nehenehe tō tātou mau tāmatara’a e fa’aineine ia tātou. Mai te mea e mea ha’eha’a tātou i roto i te mau tāmatara’a, e nehenehe te Atua e fa’a’ohipa i to tātou mau ’itera’a nō te ha’api’i ia tātou ’e nō te taui ia tātou (hi’o Te Ha’api’ira’a Tumu ’e te mau Fafaura’a 112:13).
-
E nehenehe tō tātou mau tāmatara’a e riro mai ’ei mau rāve’a nō te aupuru i te ta’ata. Mai te mea ’ua ineine tātou ’ia ti’aturi iāna, e tu’u te Metua i te ao ra ia tātou i ni’a i te mau ti’ara’a nō te fa’a’ohipa i tā tātou i ’apo mai i roto i te mau ’ohipa i tupu nō tātou, nō te tauturu ia vetahi ’ē (hi’o Mosia 24:13–14).
E aha tā tātou e nehenehe e rave ?
’A pure nō te ’ite nāhea te mau mea i tupu nō ’outou i te tauturu ia ’outou ’ia ha’amaita’i i te feiā tā ’outou e aupuru nei. I muri iho ’a toro atu i te rima.