Te Kiritimati ae Ururingaki

Ni katoa ririki ngai ma kainnabau ao ara utu ae bubura ti kakaraoa ara bootaki bwa kanoan ara motirawa ni banen te ririki. Ti karekea ara tabo ae e na tau ibukiia ara koraki ao ngkanne ti tiku iai ni bongin te Kiritimati ni karokoa te Ririki ae Boou.

Ara botaki aei bon te tai ae tamaroa ni kakorakoraa reitakira n ara utu. Ao ibukina ae angina ara utu bon kaain Ana Ekaretia Iesu Kristo ibukiia Aika Itiaki ni Boong aika Kaitira, e riki naba ara botaki aei bwa ara tai ni kakorakoraa ara koaua iroun Kristo ma Ana Ekaretia ngkae ti bukamarua Bungiiakina.

N tokin te ririki ae 2020, e reke ara tabo n te kaawa ae Bikenibeu, Tarawa, are bon te mwaneaba (te tabo ni bootaki) are e tau ibukiia ara utu ibukin te matuu. Ao n aron taai nako, butikau ae Meteta, bon raora naba n tain ara bootaki.

E maeka Meteta irarikiu ma kainnabau ao, ai 71 ana ririki, ti taraia bwa bon tinara naba. E bon rangi ni marurung ao ni mwamwakuri, ma e kabonganaa te oko imwiin ana korokoro are karaoia 20 te ririki n nako. Bon maten nanon Meteta te bobotaki ibukin te Kiritimati ao e rangi ni marurung n irii kanoa ma takakaro inanon ara utu.

N 31 bongin Ritembwa, tabeua te aoa imwaain ara botaki ni butimwaea te Ririki ae Boou, e bon rangi n ingainga Meteta. E waekoa n tebokia, e oneia ao e a tekateka inanon te mwaneaba, ngkai e tauraoi ibukin kanoan te tairiki. Ai te arona naba ma ara koraki ake a kawaetataia ni katauraoiia naba.

Ngkanne, ngke e a tabe ni boo te kakatauraoi, e wirikiriki nakoiu Meteta, “I namakina te buee ni bwabwaau.” I katuka te bwai are I karaoia, I wetea kainnabau ao butikau temanna bwa a na kawariira, ao e mwaiti ara koraki ake a kuakuaia ni kakaea buokana.

Bon te bwai ae waekoa rokona. Tebwi ma nimaua te miniti imwiina, e a kakaea ikena Meteta. Kainnabau ma natiu a kakabwaiaa ngke ti tabe n tataningaa te amburanti. E kananokawaki bwa, ai bon akea riki aia kona taokita. Ao ngke ti a roko n te onaoraki, e a motirawa Meteta.

N te tairiki anne, ti bon rangi n rootaki n te nanokawaki. Ngke ti karaurau n okira ara tabo ni bootaki—ni kaongoia ara koraki ni kabane bwa ti a riai moa ni katoka ara bootaki—ngai ma kainnabau ti tabe n iangoa kabanean ana tai ni maiu Meteta. E bane aia kona taokita ni iangoa kamaiuana, ao aomata a kataia ni karau nanora, ma e roko iroura namakinan te rau are e tuangiira bwa e a bon roko ana tai Meteta.

Ara onimaki iroun Iesu Kristo ao ara koaua n Ana Euangkerio e buokiia ara utu ni karekea te rau n te bwai ae riki aei. E bon bane ara wiiki ni bukamaru n aron are bon kakaraoki n te aonaba ao n te aro, ma ngke e a bitaki ara botaki ni kukurei nakon te taunimate, ao aei are e a bita iai ara aonaaba.

Ti rawaawata ni buan Meteta ae tangiraki—ibukina bwa e a tia n riki bwa te tia katoamauaa mweengara, ao e na bon bati te bitaki ngkai ai akea ngaia—ma ngkai e a motirawa, ti maroorokin oin raoi maiura n te aonaaba aei.

Ti kabanei nanora iroun ara Tia Kamaiu ao Ana bwaintangira ae te karietataaki. E korakora ara kakaitau ibukin Matena ibukira ao Ana tokanikai iaon te ruanimate. E riki bwa ara tai ni kabooui maiun tamneira. Ngke ti a ikarekebai ni barongaa man katauraoa kanoan ana bakaborau Meteta, a rairaki ara iango nakon ana Babaire ni Kamaiu Tamara are i Karawa, ao iroun Natina, are bon mairouna ae ti a kona ni manga kaitibo iai ma Meteta, n te tai teuana.

Ara bobotaki n tain te motirawa e bati iai taian kanoa aika kakukurei, te katangitang ma te mwaie, te kaoti tarena, te ngarengare ao te kaunga, ma n te Kiritimati aei, e a kerikaaki korakoran kakukurein ara bobotaki ma e ngae n anne ngkai e a reke iroura te kukurei ni koaua—te kimwareirei are e uotia te Tia Kamaiu Iesu Kristo ngke e bungiaki nakon te aonaaba bwa e na kamaiuira.

Ara atatai n Ana euangkerio boni ngaia ae e uota te rau nakoia ara utu ni motirawan Meteta. E buokiira bwa ti na uringa oin raoi te Kiritimati.