’A fa’aitoito i te fa’atoro i te rima

E fa’a’ohipa te Atua ia tātou nō te fa’atupu i te hō’ē vāhi ta’a ’ē mai te mea e vī te fē’a’a ia tātou.

Hōho’a

paraparaura’a e piti ta’ata ma te mata ’ata’ata

’Ei feiā fa’aro’o, ’ua tītau-rahi-hia te itoito i teie tau, i roto ato’a i tā tātou mau ’ohipa aupurura’a. ’Ua fa’auehia John (’ua tauihia te i’oa) ’ia aupuru ia Peter, e melo tei ’ore roa i haere ana i te mau rurura’a pāroita. ’Ua taiā ri’i ’o John i te fārerei atu ia Peter, nō te mea ’aita ’oia i fārerei a’e nei iāna ’e ’aita ho’i i ’ite i tōna ’ā’amu. ’Ua ha’amana’o rā ’oia i te a’o « ’ia here, ’ia fa’a’ite ’e ’ia tītau manihini », ’e ’ua pure John nō te fāri’i i te arata’ira’a ’e i muri iho, ’ōpua ihora ’ia riro nā mua roa ’ei hoa mau nō Peter. ’Ua rave ’oia i te taime nō te ha’amātau ia Peter, nā roto i te mau fārereira’a pinepine, te niuniura’a iāna, ’e te tāmāra’a i te tahi po’ipo’i ’e ana i te fare tāma’ara’a. Tupu rahi atu ra tō John mātau ia Peter, ’āre’a ’o Peter ra, ’ua tupu ïa i roto iāna te ti’aturira’a i tō rāua hoara’a. I tōna hina’arora’a i te tauturu, ’ua ’ōhie roa nōna ’ia tītau ia John, tei pāhono mai ma te ’oa’oa.

I te hō’ē mahana, ’ua tupu te mana’o pūai i roto ia John ē, ’ua ineine paha Peter i te fāri’i i te anira’a e ho’i mai i te purera’a. I roto i te hō’ē o tā rāua fārereira’a, tu’u atu ra ’oia i te reira mana’o, ’ua matara noa mai. Fa’aea noa atu ra Peter. ’E ’ia oti, nā ’ō atu ra : « 17 matahiti tō’u āteara’a i te ’ēkālesia. » « ’Ua ’ite rā ’oe, tē mana’o nei au, e nā reira vau ». I tō Peter tāpaera’a i te pāroita, tei reira ’o John nō te fāri’i iāna ’e nō te pārahi i pīha’i iāna. ’Ua ’ī John i te ’ā’au mēhara i te vīra’a iāna tōna fē’a’ara’a mātāmua. Nā roto i teie mau tauto’ora’a, riro mai nei nā ta’ata to’opiti nei ’ei hoa mau, ’e ’ua ha’amaita’i te reira i tō rāua orara’a.

Tītauhia te itoito ’āpī

Hōho’a

Esetera i mua i te ari’i

Esther before the King [Esetera i mua i te ari’i], nā Minerva Teichert

Tē ha’api’i nei te ’ā’amu nō Esetera i roto i te Faufa’a Tahito (hi’o Esetera 1–10) i te mau parau tumu e rave rahi, terā rā e mea mātau-maita’i-hia paha te reira ’ei ’ā’amu nō te itoito. E vahine ’āti Iuda ’āpī roa ’o Esetera i te taime ’a mā’itihia ai ’oia ’ei ari’i vahine ’e ’a fa’a’ite ai ’oia i te itoito rahi ’a tu’u ai ’oia i tōna ora nō te fa’aora i tōna mau ta’ata.

Nā roto i te ha’avare, ’ua rāmāhia te ari’i nō te tu’u i te fa’auera’a ’ia taparahi-pohe-hia te mau ’āti Iuda ato’a o te bāsileia. ’Ua feruri Esetera i te hō’ē ’ōpuara’a tē tītau i te fa’aro’o rahi ’e ’o te reira ho’i te rāve’a hō’ē roa nō te taui i te mana’o o te ari’i.

I roto i te ta’ere o tōna fenua, ’ia ha’afātata atu ’oe i te ari’i ma te ’ore i tītau-manihini-hia, e ’ati pohe tō muri mai. ’Ua ha’apa’o rā ’oia ma te itoito i tāna ’ōpuara’a ’e ’ua ani i tōna nūna’a ’ia ha’apae i te mā’a nā muri iāna (hi’o Esetera 4:16). Nā roto i tāna mau ravera’a itoito ’e te mau ravera’a a vetahi atu, ’ua mana tōna reo i mua i te ari’i ’ia taui i tāna fa’auera’a mana. ’Ua pāhonohia mai te pure a Esetera ’e a tōna nūna’a.

E nehenehe tātou e fa’ariro ia Esetera ’ei hi’ora’a nō te itoito, mai te reira ato’a i roto i te aupurura’a, e ha’apae tātou i tō tātou mau fē’a’ara’a nō te ha’amātau i te ta’ata ’e nō te tauturu ia rātou i roto i tā rātou mau fifi.

Te mau parau tumu e tāpe’a mai

E aha tē ti’a ’ia rave ’ia ’ite ana’e tātou ē tei rāpae tātou i tō tātou ’āua marumaru ’a aupuru ai tātou ?

’Ua pure John nō te fāri’i i te arata’ira’a a te Atua. Nā roto i te tauturu a te Atua, e vī te fē’a’a ia tātou (hi’o Salamo 34:4).
E pure ato’a tātou nō te fāri’i i te here o te Fatu nō vetahi ’ē. « E pe’e te mata’u i te aroha ti’a mau ra » (1 Ioane 4:18).
Mai ia Esetera, e nehenehe tātou e ha’apae i te mā’a ’e e pure ho’i nō te ha’apūai i tō tātou fa’aro’o i roto i te ’ohipa (hi’o Esetera 4:3).
E nehenehe tātou e ti’aturi ē e mana tō roto i te ha’apa’ora’a i tā tātou mau fafaura’a (hi’o Te Ha’api’ira’a Tumu ’e te mau Fafaura’a 110:9). Nā roto i te orara’a i tā tātou mau fafaura’a, e fāri’i tātou i tāna tauturu.
E nehenehe tātou e ha’apūai i tō tātou fa’aro’o nā roto i te ha’apaera’a mā’a ’e te tu’ura’a i roto i tō tātou ’ā’au i tei fafauhia e te Fatu ia tātou. ’A feruri na i te mau mea i fafauhia i roto i teie mau ’īrava : Deuteronomi 31:6 ; Isaia 41:10 ; 2 Timoteo 1:7 ; Te Ha’api’ira’a Tumu ’e te mau Fafaura’a 6:33.

E nāhea tātou ?

’A fa’aitoito i te fa’atoro i te rima Nō te ha’amātau ānei i te ta’ata ’aore rā nō te ani manihini ia rātou ’ia rave i te hō’ē mea e ha’amaita’i ai i tō rātou orara’a, e tauturu mai te Atua ia ’outou.